ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນໂອກາດ ວັນໄວຫນຸ່ມສາກົນ 2022, ອົງການ UNDP, ອົງການຢູນິເຊັບ ເເລະ ໂຄງການ UNV, ໂດຍຮ່ວມກັບ ສະຖານທູດ ສະຫະລັດອາເມລິກາ ໄດ້ເຕົ້າໂຮມໄວໜຸ່ມ ເເລະ ບຸກຄົນທີ່ມີຜົນງານດີເດັ່ນໃນການພັດທະນາປະເທດ ເພື່ອປຶກສາຫາລືກັນກ່ຽວກັບການແກ້ໄຂບັນຫາຕ່າງໆທີ່່ໄວໜຸ່ມປະເຊີນຢູ່.
ນະຄອນຫຼວງວຽງຈັນ, ວັນທີ 12 ສິງຫາ 2022 – ເພຶ່ອສະເຫຼີມສະຫຼອງ ວັນໄວຫນຸ່ມສາກົນ 2022, ອົງການ ສະຫະປະຊາຊາດ ເພື່ອການພັດທະນາ (UNDP), ອົງການຢູນິເຊັບ ເເລະ ໂຄງການ ອາສາສະໝັກ ອົງການສະຫະປະຊາຊາດ (UNV), ໂດຍຮ່ວມກັບ ສະຖານທູດ ສະຫະລັດອາເມລິກາ ປະຈຳ ສປປ ລາວ ໄດ້ເປີດເວທີສົນທະນາ ເພື່ອປຶກສາຫາລືກ່ຽວກັບບັນຫາທີ່ໄວໜຸ່ມລາວໄດ້ປະເຊີນຢູ່ໃນປະຈຸບັນ ເເລະ ວິທີທີ່ຄົນລຸ້ນຕ່າງໆສາມາດເຮັດວຽກຮ່ວມກັນເພື່ອເເກ້ໄຂບັນຫາເຫຼົ່ານີ້.
ງານດັ່ງກ່າວໄດ້ຈັດຂຶ້ນທີ່ ສູນອາເມລິກາ ເເລະ ໄດ້ເຕົ້າໂຮມເອົານັກເວົ້າ 5 ຄົນ ຈາກລຸ້ນຕ່າງໆ ເເລະ ເຂົ້າຮ່ວມງານຫຼາຍກວ່າ 40 ຄົນທີ່ ສູນອາເມລິກາ, ພ້ອມຍັງມີຜູ້ຊົມເຂົ້າຮ່ວມຈາກທົ່ວປະເທດຜ່ານທາງອອນໄລນ໌ອີກເຊັ່ນດຽວກັນ.
“ສະຖານທູດ ສະຫະລັດອາເມລິກາ ມີຄວາມພາກພູມໃຈທີ່ໄດ້ເປັນເຈົ້າພາບຈັດກິດຈະກຳນີ້ຢູ່ທີ່ ສູນອາເມລິກາ ແລະ ໄດ້ສະໜອງພື້ນທີ່ປອດໄພໃຫ້ໄວໜຸ່ມສາມາດສົນທະນາໃນຫົວຂໍ້ທີ່ໃກ້ຕົວພວກເຂົາ,” ກ່າວໂດຍ ທ່ານ ເກຣັກກໍຣີ ອໍຣິສ ຈາກຝ່າຍ ປະຊາສຳພັນ ຂອງ ສະຖານທູດ ສະຫະລັດອາເມລິກາ.
ວັນໄວໜຸ່ມສາກົນ ເເມ່ນສະເຫຼີມສະຫຼອງໃນວັນທີ 12 ເດືອນສິງຫາຂອງທຸກໆປີ ໂດຍມິຈຸດປະສົງເພື່ອຍົກໃຫ້ເຫັນເຖິງບົດບາດຂອງໄວໜຸ່ມໃນການຊຸກຍູ້ການພັດທະນາແບບຍືນຍົງ ແລະ ເພື່ອຮຽກຮ້ອງໃຫ້ມີການເອົາໃຈໃສ່ຫຼາຍຂຶ້ນຕໍ່ການເເກ້ໄຂບັນຫາສິ່ງທ້າທາຍຕ່າງໆທີ່ພວກເຂົາປະເຊີນຢູ່.
ການສະເຫຼີມສະຫຼອງປິນີ້ໄດ້ຈັດຂຶ້ນພາຍໃຕ້ຫົວຂໍ້ຫຼັກ “ຄວາມສາມັກຄີລະຫວ່າງລຸ້ນ” ເເລະ ການເປີດເວທີສົນທະນາຄັ້ງນີ້ໃນ ສປປ ລາວ ເເມ່ນໄດ້ສຸມໃສ່ຄວາມສຳຄັນຂອງການມີສ່ວນຮ່ວມຂອງໄວໜຸ່ມ ເເລະ ວິທີທີ່ຄົນລຸ້ນຕ່າງໆຈະສາມາດສະໜັບສະໜູນໄວໜຸ່ມໄດ້ດີຂຶ້ນ. ໃນເວທີສົນທະນາດັ່ງກ່າວ, ຍັງໄດ້ມີການປຶກສາຫາລືກ່ຽວກັບຫົວຂໍ້ຍ່ອຍເຊັ່ນ: ການສຶກສາ ແລະ ການຟື້ນຟູຈາກຜົນກະທົບຂອງ ໂຄວິດ-19, ການເຮັດວຽກເປັນອາສາສະໝັກ, ຄຽງຄູ່ກັບສິ່ງທ້າທາຍຕ່າງໆທີ່ຄົນພິການ ແລະ ຄົນກຸ່ມ LGBTQI+ ກໍາລັງປະເຊີນໃນປັດຈຸບັນ.
ທ່ານນາງ ຣີຄາດາ ຣີເກີ, ຜູ້ຕາງໜ້າ ອົງການ UNDP ປະຈຳ ສປປ ລາວ, ໄດ້ກ່າວວ່າ: “ຄາດວ່າຈໍານວນໄວໜຸ່ມໃນ ສປປ ລາວ ຈະເພີ່ມຂຶ້ນຕື່ມອີກໃນສິບປີຂ້າງໜ້າ. ຍ້ອນການຫັນປ່ຽນທາງດ້ານປະຊາກອນດັ່ງກ່າວນີ້, ສປປ ລາວ ມີໂອກາດພິເສດທີ່ຈະຜັນຂະຫຍາຍເສດຖະກິດຂອງປະເທດ ແລະ ສິ່ງສຳຄັນແມ່ນພວກເຮົາຕ້ອງລົງທຶນໃສ່ຄົນລູ້ນໃໝ່ໃນມື້ນີ້ເພື່ອສ້າງອະນາຄົດທີ່ດີກວ່າໃຫ້ແກ່ພວກເຂົາ ແລະ ຄວາມຈະເລີນຮຸ່ງເຮືອງຂອງຊຸມຊົນລາວ.”
ການສົນທະນາດັ່ງກ່າວ ຍັງຈະປະກອບສ່ວນເຂົ້າໃນ ບົດລາຍງານການພັດທະນາມະນຸດແຫ່ງຊາດ ຮອບທີ 6 ຂອງ ອົງການ UNDP, ເຊີ່ງຈະຊ່ວຍໃຫ້ຂໍ້ມູນ ເເລະ ຄຳເເນະນຳເເກ່ລັດຖະບານ ກ່ຽວກັບການລົງທຶນຕ່າງໆເພື່ອສະໜັບສະໜູນ ແລະ ພັດທະນາຄວາມສາມາດຂອງໄວໜຸ່ມລາວ.
ພ້ອມກັນນັ້ນ, ທ່ານນາງ ປອ. ເພຍ ເຣເບນໂລ ບຣິໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ, ກໍ່ໄດ້ກ່າວວ່າ: “ຂ້າພະເຈົ້າມີຄວາມເຄົາລົບນັບຖືຢ່າງເລິກເຊິ່ງຕໍ່ສາຍສຳພັນອັນເເໜັ້ນເເຟ້ນທີ່ມີຢູ່ລະຫວ່າງຄົນລາວທຸກລຸ້ນ, ບໍ່ວ່າຈະຢູ່ໃນຄອບຄົວ ຫຼື ຊຸມຊົນ.ໃນຂະນະທີ່ພວກເຮົາເຮັດວຽກເພື່ອສ້າງໂລກຫຼັງການລະບາດຂອງພະຍາດ, ມັນກໍ່ເເມ່ນສິ່ງສຳຄັນຫຼາຍທີ່ພວກເຮົາຕ້ອງສຶືບຕໍ່ເສີມສ້າງສາຍສຳພັນດັ່ງກ່າວໃຫ້ເເໜັ້ນເເຟ້ນຂຶ້ນຍິ່ງກວ່າເກົ່າ ເເລະ ສ້າງເວທີີໃຫ້ໄວໜຸ່ມສາມາດສະເເດງຄຳເຫັນ ເເລະ ມີອິດທິພົນຕໍ່ເລື່ອງທີ່ສົ່ງຜົນກະທົບຕໍ່ຊີວິດຂອງພວກເຂົາໂດຍກົງ. ບົດບາດຂອງ ອົງການຢູນິເຊັບ ແມ່ນປູກຈິດສໍານຶກຂອງເດັກນ້ອຍ ແລະໄວໜຸ່ມກ່ຽວກັບສິດທິຂອງພວກເຂົາເຈົ້າໃນການມີສ່ວນຮ່ວມໃນການເເກ້ໄຂບັນຫາທີ່ກ່ຽວຂ້ອງກັບຊີວິດຂອງພວກເຂົາ ແລະ ສະໜອງພື້ນທີ່ທີ່ປອດໄພໃຫ້ເຂົາເຈົ້າສາມາດປະກອບ ແລະ ສະແດງຄວາມຄິດເຫັນຂອງຕົນ.”