ໃນວັນທີ 8 ມິຖຸນາ 2021, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດແມ່ນ້ຳຂອງ-ແມ່ນ້ຳລ້ານຊ້າງ(MLC)ຄັ້ງທີ 6 ພາຍໃຕ້ຫົວຂໍ້ “ສາມັກຄີຕໍ່ສູ້ຕ້ານພະຍາດລະບາດ, ສົ່ງເສີມການພັດທະນາໃນຍຸກສະໄໝຫຼັງ ພະຍາດລະບາດ” ທີ່ ເມືອງຊົງຊິງ, ສປ ຈີນ ໂດຍການເປັນປະທານຮ່ວມຂອງ ທ່ານ ຫວາງ ອີ້, ທີ່ປຶກສາແຫ່ງລັດ, ລັດຖະມົນຕີຕ່າງປະເທດ ສປ ຈີນ ແລະ ທ່ານວຸນາ ມ່ອງ ວິນ, ລັດຖະມົນຕີຕ່າງປະເທດ ສສ ມຽນມາ ແລະ ໄດ້ມີບັນດາຄະນະຜູ້ແທນຈາກປະເທດສະມາຊິກເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ຈັດຂຶ້ນທາມກາງບັນຍາກາດຂອງການສະເຫລີມສະຫລອງຄົບຮອບ 5 ປີຂອງການສ້າງຕັ້ງຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ. ກອງປະຊຸມໄດ້ຕີລາຄາສູງຕໍ່ຫມາກຜົນສຳເລັດທີ່ຂອບການຮ່ວມມືດັ່ງກ່າວຍາດມາໄດ້ຕະຫລອດໄລຍະ 5 ປີຜ່ານມາ ເຊິ່ງຖືເປັນຂອບການຮ່ວມມືທີ່ສຳຄັນໜຶ່ງທີ່ໄດ້ເຕີບໃຫຍ່ຂະຫຍາຍຕົວທັງໃນລວງເລິກ ແລະ ລວງກວ້າງຢ່າງໄວວາ.ພ້ອມດຽວກັນນັ້ນ, ກອງປະຊຸມໄດ້ທົບທວນຄືນການຈັດຕັ້ງຜັນຂະຫຍາຍຜົນກອງປະຊຸມລັດຖະມົນຕີຕ່າງປະເທດຄັ້ງທີ 5 ແລະ ກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 3 ທີ່ ສປປ ລາວ ໄດ້ເປັນເຈົ້າພາບໃນປີ 2020 ເປັນຕົ້ນແມ່ນ ຄວາມຄືບຫນ້າໃນການຈັດຕັ້ງປະຕິບັດຖະແຫລງການວຽງຈັນ ລວມທັງແຜນປະຕິບັດງານ 5 ປີ ແມ່ນ້ຳຂອງ-ແມ່ນ້ຳລ້ານຊ້າງ (2018-2022) ທີ່ປິ່ນອ້ອມ 3 ເສົາຄ້ຳ (ການເມືອງ-ຄວາມໝັ້ນຄົງ, ການພັດທະນາແບບຍືນຍົງ, ແລະ ການແລກປ່ຽນວັດທະນະທຳ -ສັງຄົມ) ແລະ 5 ຂົງເຂດບູລິມະສິດ (ການເຊື່ອມຈອດ, ການຄຸ້ມຄອງຊັບພະຍາກອນນ້ຳ, ການຄ້າຂ້າມຊາຍແດນ, ການສ້າງຂີດຄວາມອາດສາມາດໃນການຜະລິດ ແລະ ກະສິກຳ ແລະ ລືບລ້າງຄວາມທຸກຍາກ) ໂດຍຜ່ານການປະຕິບັດບັນດາກິດຈະກຳ ແລະ ໂຄງການກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ ອັນໄດ້ນຳຜົນປະໂຫຍດຕົວຈິງມາສູ່ປະເທດສະມາຊິກ ກໍ່ຄືພາກພື້ນແມ່ນ້ຳຂອງ ເຖິງວ່າຈະໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດ ໂຄວິດ-19ໃນຊຸມປີຜ່ານມາກໍ່ຕາມ. ກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງໄດ້ຮັບການສ້າງຕັ້ງຂື້ນໃນປີ 2017 ໂດຍການປອບສ່ວນທຶນ 300 ລ້ານໂດລາສະຫະລັດຂອງ ສປ ຈີນ ເຊິ່ງປັດຈຸບັນຫລາຍກ່ວາ 400 ໂຄງການລວມເປັນມູນຄ່າທັງຫມົດ 60 ກ່ວາໂດລາສະຫະລັດໄດ້ຮັບການສະຫນັບສະຫນູນຈາກກອງທຶນພິເສດດັ່ງ, ໃນນັ້ນ ສປປ ລາວ ເຮົາໄດ້ຮັບ 53 ໂຄງການຄິດເປັນມູນຄ່າລວມ 15 ກ່ວາລ້ານໂດລາສະຫະລັດ.

ສຳລັບການຮ່ວມມືໃນຕໍ່ໜ້າ ກອງປະຊຸມໄດ້ເນັ້ນໃສ່ການຮ່ວມມືດ້ານສາທາລະນະສຸກ, ການຄ້າ-ການລົງທຶນຜ່ານລະບົບອອນລາຍ, ພັດທະນາວິທະຍາສາດ, ເຕັກໂນໂລຊີ ແລະ ການສື່ສານ, ພັດທະນາພື້ນຖານໂຄງລ່າງ ແລະໂຄງບົນ, ການພັດທະນາແບບຍືນຍົງ ແລະ ສີຂຽວ, ປົກປັກຮັກສາຊັບພະຍາກອນທຳມະຊາດ ແລະ ພັດທະນາຊັບພະຍາກອນມະນຸດແນໃສ່ຟື້ນຟູເສດຖະກິດ-ສັງຄົມ ຂອງພາກພື້ນຈາກຜົນກະທົບຂອງການແຜ່ລະບາດຂອງໂຄວິດ-19.

ກອງປະຊຸມ ໄດ້ຮັບຮອງເອົາເອກະສານສຳຄັນ ຈຳນວນ 3  ສະບັບ ຄື: ຖະແຫຼງການຮ່ວມວ່າດ້ວຍການຮັດແໜ້ນຄວາມຮ່ວມມືເພື່ອການພັດທະນາແບບຍືນຍົງໃນຂົງເຂດພາກພື້ນແມ່ນ້ຳຂອງ-ແມ່ນ້ຳລ້ານຊ້າງ(Joint Statementon Enhancing Sustainable Development Cooperationof the Lancang-Mekong countries); ຖະແຫຼງການຮ່ວມວ່າດ້ວຍລົງເລິກການຮ່ວມມືເພື່ອປ້ອງກັນ ແລະ ປິ່ນປົວພະຍາດລະບາດ ໂດຍນຳໃຊ້ຢາພື້ນເມືອງໃນປະເທດແມ່ນ້ຳຂອງ-ແມ່ນ້ຳລ້ານຊ້າງ (Joint Statement on Deepening Cooperation on Traditional Medicine Within the Framework of Lancang-Mekong Cooperation) ຂໍ້ລິເລີ່ມວ່າດ້ວຍການຮ່ວມມືລະຫວ່າງອົງການປົກຄອງທ້ອງຖິ່ນໃນຂົງເຂດພາກພື້ນແມ່ນ້ຳຂອງ-ແມ່ນ້ຳລ້ານຊ້າງ (Initiative on Deepening Cooperation among Local Governmentsofthe Lancang-Mekong countries) ເພື່ອເປັນພື້ນຖານໃນການຈັດຕັ້ງຜັນຂະຫຍາຍການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງໃນຕໍ່ໜ້າ.

ພ້ອມນີ້, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມຄະນະ ຍັງໄດ້ເຂົ້າຢ້ຽມຊົມງານວາງສະແດງຜົນສຳເລັດຂອງການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ໃນໄລຍະ 5 ປີ ແລະ ພິທີເປີດເວັບໄຊກອງເລຂາປະສານງານແຫ່ງຊາດ MLC ສປ ຈີນ ໃນ 7 ພາສາ (ພາສາຈີນ, ຂະແມ, ລາວ,ມຽນມາ, ໄທ, ຫວຽດ ແລະ ອັງກິດ) ແລະ ຮ່ວມເປີດເວັບໄຊເວທີແລກປ່ຽນຊາວໜຸ່ມ MLC ແລະ ການແຂ່ງຂັນອອກແບບສິລະປະ MLC ແບບອອນລາຍ.

ໃນໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຍັງໄດ້ພົບປະສອງຝ່າຍ ກັບ ທ່ານ ດອນ ປະຣະມັດວິໄນ, ຮອງນາຍົກລັດຖະມົນຕີ, ລັດຖະມົນຕີຕ່າງປະເທດແຫ່ງ ຣາຊະອານາຈັກໄທ ເຊິ່ງສອງຝ່າຍໄດ້ແລກປ່ຽນຄຳຄິດຄຳເຫັນ ກ່ຽວກັບການພົວພັນຮ່ວມມືສອງຝ່າຍ ລາວ-ໄທ ໃນໄລຍະຜ່ານ ລວມທັງທິດທາງການຮ່ວມມືໃນຕໍ່ໜ້າ ໂດຍສະເພາະດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມ. ໃນການພົບປະສອງຝ່າຍຄັ້ງນີ້ ທ່ານ ສະເຫຼີມໄຊ ກົມມະສິດ ກໍໄດ້ສະແດງຄວາມຂອບໃຈລັດຖະບານໄທ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນການຮັບມືກັບການແຜ່ລະບາດຂອງໂຄວິດ-19.

ຂ່າວ: ກົມການຂ່າວ, ກະຊວງການຕ່າງປະເທດ.

Loading...