ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສປປ ລາວ ເອົາໃຈໃສ່ເຝົ້າລະວັງສະພາບການລະບາດຂອງພະຍາດ COVID -19 ເຖິງຈະບໍ່ທັນມີການລະບາດເທື່ອ

ມາຮອດວັນທີ 17 ກຸມພາ 2020ນີ້, ໃນຂອບເຂດທົ່ວໂລກ, ເກີດກໍລະນີພະຍາດອັກເສບປອດ ສາຍພັນໃໝ່ ຫຼື ຈຸນລະໂລກ COVID -19 ຢັ້ງຢືນການຕິດພະຍາດແລ້ວ 71.329 ກໍລະນີ , ເສຍຊີວິດ 1.775ຄົນ, ແລະ ປິ່ນປົວຫາຍ10.972ກໍລະນີ, ໃນຂະນະທີ່ ເວົ້າສະເພາະໃນ ສປປ ຈີນນັ້ນ, ແມ່ນມີກໍລະນີຢັ້ງຢືນການຕິດພະຍາດ 70.549 ກໍລະນີ, ເສຍຊີວິດ 1.676ຄົນ. ໃນໂອກາດຖະແຫລງຂ່າວຕໍ່ສື່ມວນຊົນໃນວັນທີ 17 ກຸມພານີ້ ຢູ່ກະຊວງສາທາລະນະສຸກ, ນະຄອນ ຫຼວງວຽງຈັນ, ດຣ ລັດຕະນະໄຊ ເພັດສຸວັນ, ຫົວຫນ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ວ່າ ສໍາລັບ ສປປ ລາວ ມີກໍລະນີສົງໄສ 33 ກໍລະນີ, ແລະ ຜ່ານການວິເຄາະແລ້ວ ຍັງບໍ່ພົບເຊື້ອພະຍາດທັງໝົດເລີຍ. ສຳລັບຕໍ່ກໍລະນີທີ່ມີຂ່າວລື ເກີດຄວາມບໍ່ເຊື່ອໝັ້ນ ໃນການກວດຂອງຫ້ອງວິເຄາະ ແລະ ການເຮັດວຽກຂອງຂອງກະຊວງສາທາລະນະສຸກເຮົາ, ເຊັ່ນວ່າ ເປັນຫຍັງບັນດາປະເທດອ້ອມຂ້າງໃກ້ຄຽງແມ່ນມີກໍລະນີເປັນພະຍາດທັງ, ຍົກເວັ້ນປະເທດເຮົາທີ່ມີຊາຍແດນຕິດຈອດກັບສປ ຈີນ ຊຶ່ງເປັນແຫຼ່ງກຳເນີດຂອງພະຍາດດັ່ງກ່າວ, ດຣ ລັດຕະນະໄຊ ເພັດສຸວັນ ໃຫ້ຮູ້ວ່າ ສປປ ລາວ ກໍ່ມີຫ້ອງວິເຄາະທີ່ໄດ້ມາດຖານສາກົນ ທີ່ສູນວິເຄາະ ແລະ ລະບາດວິທະຍາ, ລວມທັງ ທີ່ສະຖາບັນປາສເຕີ, ໂຮງໝໍມະໂຫສົດ; ນອກຈາກນັ້ນ, ພວກເຮົາກໍ່ຍັງມີເຄື່ອງກວດວິເຄາະແບບເຄື່ອນທີ່ຢູ່ແຂວງພາກເໜືອ ຄື ຢູ່ຫລວງພະບາງ ແລະ ຫລວງນໍ້າທາ ເພື່ອຄວາມສະດວກວ່ອງໄວໃນການຊອກຫາເຊື້ອພະຍາດ; ສະນັ້ນ ຈຶ່ງຂໍໃຫ້ສັງຄົມເຮົາຈົ່ງເຊື່ອໝັ້ນ ແລະ ໝັ້ນໃຈໃນມາດຖານການວິເຄາະຫາເຊື້ອຂອງພວກເຮົາໄດ້ຢ່າງເຕັມທີ່. ນອກຈາກການກວດຢູ່ລາວເຮົາແລ້ວ, ກໍ່ຍັງໄດ້ສົ່ງຕົວຢ່າງທີ່ກວດຢູ່ລາວໄປກວດຢູ່ຫ້ອງວິເຄາະຂອງອົງການອະນາໄມໂລກ ທີ່ປະເທດອົສຕຼາລີ ຕື່ມອີກ ຈໍານວນ 20 ຕົວຢ່າງ ແລະ ທັງໝົດກໍ່ໃຫ້ຜົນລົບເຊັ່ນດຽວກັນ. ອີກປະການໜຶ່ງ, ຕໍ່ກໍລະນີທີ່ວ່າເປັນຫຍັງມາຮອດນີ້ ປະເທດລາວເຮົາຈຶ່ງຍັງບໍ່ມີກໍລະນີນີ້ນັ້ນ, ເຫດຜົນແມ່ນມາຫລາຍປັດໃຈ ເຊັ່ນ: ພວກເຮົາມີທິມງານຄັດກອງຢູດ່ານເຂົ້າ-ອອກເມືອງເພື່ອກຽມພ້ອມກວດຫາກໍລະນີສົງໄສ, ມີການຕິດຕາມເຝົ້າລະວັງບຸກຄົນທີ່ໄດ້ສໍາຜັດກັບກໍລະນີທີ່ຕິດເຊື້ອຢ່າງໃກ້ຊິດ, ຈໍານວນນັກທ່ອງທ່ຽວຈາກປະເທດທີ່ມີການລະບາດເຂົ້າມາປະເທດເຮົາແມ່ນບໍ່ມີຫລາຍຖ້າທຽບໃສ່ປະເທດອື່ນ, ອາກາດບ້ານເຮົາກໍ່ຂ້ອນຂ້າງຮ້ອນ ຊຶ່ງບໍ່ອໍານວຍຕໍ່ການຂະຫຍາຍຕົວຂອງເຊື້ອຈຸລະໂລກຊະນິດນີ້,, ລວມທັງ ວັດທະນະທໍາການສະບາຍດີຂອງບ້ານເຮົາແມ່ນບໍ່ຕ້ອງມີການສຳຜັດກັນ ແຕ່ເປັນການຍົກມືສະບາຍດີ ຊຶ່ງມີຄວາມປອດໄພດີ, ແລະທັງໝົດທີ່ກ່າວມານີ້ ກໍ່ຍັງບໍ່ທັນໄດ້ມີການຢັ້ງຢືນທີ່ຊັດເຈນ ແຕ່ແນວໃດກໍ່ຢາກແຈ້ງໃຫ້ທົ່ວສັງຄົມຊາບວ່າ, ພວກເຮົາຍັງບໍ່ທັນພົບກໍລະນີຕິດເຊື້ອແທ້ໆເທື່ອໃນປະຈຸບັນຢູ່ປະເທດເຮົາ ແລະ ຂໍໃຫ້ຈົ່ງໝັ້ນໃຈໄດ້ໃນຄຸນນະພາບການວິເຄາະຂອງພວກເຮົາ. ສ່ວນຜ້າອັດປາກ ແລະ ນໍ້າຢາລ້າງມືນັ້ນ, ກະຊວງສາທາລະນະສຸກ ຮ່ວມກັບ ກະຊວງອຸດສາຫະກໍາ ແລະ ການຄ້າ ແລະ ພາກສ່ວນກ່ຽວຂ້ອງ ໄດ້ອອກແຈ້ງການໄປຫາບັນດາຮ້ານຜູ້ປະກອບການ, ຮ້ານຂາຍຢາ, ອຸປະກອນການແພດ, ຫ້າມຂຶ້ນລາຄາ, ວັດຖຸພັນດັ່ງກ່າວ ແລະ ໄດ້ລົງຕິດຕາມຢ່າງໃກ້ຊິດ; ຄະນະເພສັດສາດ ມະຫາວິທະຍາໄລ ວິທະຍາສາດ ສຸຂະພາບ ກໍ່ໄດ້ຜະລິດນໍ້າຢາລ້າງມືຮັບໃຊ້ ແລະ ອຸປະກອນການແພດ ເພື່ອໃຫ້ມີການສະໜອງວັດຖຸອຸປະກອນດັ່ງກ່າວຢ່າງພຽງພໍ, ໃນຂະນະດຽວກັນ, ກົມເສນາຮັກ, ກະຊວງປ້ອງກັນປະເທດ ກໍ່ໄດ້ຜະລິດຜ້າອັດປາກອອກມາຮັບໃຊ້ ມວນຊົນ, ສ່ວນການກະກຽມຄວາມພ້ອມ, ການເຝົ້າລະວັງ ແລະ ການໂຕ້ຕອບໃນພາກສະໜາມ ແມ່ນມີຄວາມກຽມພ້ອມຕະຫລອດເວລາ, ນັບທັງໂຮງໝໍສູນກາງ ແລະ ໂຮງໝໍແຂວງ, ໂດຍສະເພາະບັນດາໂຮງໝໍທີ່ມີຄວາມສ່ຽງຢູ່ເຂດຊາຍແດນ. ສ່ວນວຽກງານໃຫ້ຂໍ້ມູນຂ່າວສານກໍ່ເຮັດເປັນປົກກະຕິຜ່ານທາງສື່ທຸກຊ່ອງທາງ, ໂດຍສະເພາະ ທາງວິທະຍຸ, ໂທລະພາບ, ໜັງສືພິມ, ສື່ອອນລາຍ ແລະ ສາຍດ່ວນ ໂທລະສັບໝາຍເລກ 166 ແລະ 020 54066777 ຕະຫລອດ 24 ຊົ່ວໂມງ. ພ້ອມນີ້, ວຽກງານຕິດຕາມຄົນເຂົ້າ-ອອກເມືອງຕາມດ່ານຕ່າງໆ ກໍ່ໄດ້ປະຕິບັດຢ່າງເຂັ້ມຂຸ້ນ ຢູ່ບັນດາດ່ານທົ່ວປະເທດ ມີການກັ່ນກອງ ແລະ ຕິດຕາມຢ່າງໃກ້ຊິດ, ໂດຍສະເພາະແມ່ນກຸ່ມຄົນທີ່ເດີນທາງມາຈາກເຂດທີ່ມີການລະບາດ ແລະ ກຸ່ມຄົນທີ່ເຂົ້າມາເຮັດວຽກຕາມສະຖານທີ່ຕ່າງໆ, ແລະ ຕິດຕາມບັນດາພະນັກງານຈີນທີ່ເຂົ້າມາເຮັດວຽກຢູ່ລາວຢ່າງໃກ້ຊິດ ເຊັ່ນ: ຄົນງານໂຮງງານຢາສູບ ທີ່ກັບມາເຮັດວຽກຢູ່ແຂວງສະຫວັນນະເຂດ, ຄົນລາວທີ່ເດີນທາງກັບມາຈາກທັດສະນະສຶກສາທີ່ ສປ ຈີນ, ຕິດຕາມນັກສຶກສາຈີນທີ່ເຂົ້າມາຮຽນຢູ່ ມຊ ຢ່າງໃກ້ຊິດ, ຕິດຕາມຄະນະຄົນງານທີ່ກັບເຂົ້າມາເຮັດວຽກຢູ່ໂຮງໝໍມະໂຫສົດ, ທິມງານເຮັດທາງລົດໄຟ ແລະ ບ່ອນອື່ນໆ. ພ້ອມກັນນັ້ນ, ພວກເຮົາກໍ່ຍັງໄດ້ຕິດຕາມ ກຸ່ມຄົນທີ່ເຄີຍໃກ້ຊິດກັບນັກທ່ອງທ່ຽວຈີນທີ່ເຂົ້າມາທ່ອງທ່ຽວລາວ, ຊຶ່ງທັງໝົດນີ້, ພວກເຮົາແມ່ນມີລາຍຊື່ຕິດຕາມສຸຂະພາບກັບບໍລິສັດຢ່າງໃກ້ຊິດ, ຖ້າຜູ້ໃດຫາກມີອາການເຈັບຄ້າຍຄືໄຂ້ຫວັດ ເຊັ່ນ: ຄີງຮ້ອນ, ໄອ, ເຈັບຄໍ ຫລື ຫາຍໃຈຍາກ ກໍ່ໄປພົບແພດໝໍໂດຍທັນທີ ແລະ ທັງແຈ້ງປະຫວັດການເດີນທາງຂອງທ່ານ, ຖ້າຫາກໄດ້ໄປເຂດທີ່ມີການລະບາດຂອງພະຍາດດັ່ງກ່າວໃນໄລຍະ 14 ວັນກ່ອນໜ້ານັ້ນ.

ວັນທີ 20 ກຸມພານີ້  ສປປ ລາວ ຈະເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດ ກ່ຽວກັບການລະບາດຂອງພະຍາດ ອັກເສບປອດ COVID -19 ເພື່ອປຶກສາຫາລື ແລະແລກປ່ຽນຄໍາຄິດຄໍາເຫັນຮ່ວມກັນ ຊອກຊ່ອງທາງ ແລະກໍານົດມາດຕະການໃນການຕ້ານ ແລະຮັບມືກັບການລະບາດຂອງພະຍາດ COVID -19 ຄາດວ່າຈະມີຖະແຫລງການຮ່ວມ ໃນກອງປະຂຸມຄັ້ງນີ້.