ກອງປະຊຸມຮຽບຮຽງເນື້ອໃນຮ່າງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ) ໄດ້ຈັດຂຶ້ນໃນວັນທີ 17-18 ກໍລະກົດ 2024 ທີ່ທ່າລາດ ແຂວງວຽງຈັນ ໂດຍການເປັນປະທານຂອງ ທ່ານ ຄຳແພງ ວິລະພັນ ປະທານກຳມາທິການກົດໝາຍ, ມີບັນດາປະທານ ແລະ ຮອງປະທານກຳມາທິການສະພາແຫ່ງຊາດ (ສພຊ), ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຮອງລັດຖະມົນຕີກະຊວງຍຸຕິທຳ, ຮອງຫົວໜ້າຫ້ອງວ່າການສຳນັກງານປະທານປະເທດ, ຄະນະທີ່ປຶກສາທາງດ້ານກົດໝາຍຂອງ ຄະນະປະຈຳສະພາແຫ່ງຊາດ ແລະ ພາກສ່ວນກ່ຽວຂ້ອງ ເຂົ້າຮ່ວມ
ທ່ານ ຄຳແພງ ວິລະພັນ ໄດ້ມີຄໍາເຫັນວ່າ: ກອງປະຊຸມຄັ້ງນີ້, ໄດ້ພ້ອມກັນຄົ້ນຄວ້າ ແລະ ຮຽບຮຽງເນື້ອໃນຂອງກົດໝາຍວ່າດ້ວຍການທ່ອງທ່ຽວ (ສະບັບປັບປຸງ) ຕາມການປະກອບຄໍາເຫັນຂອງສະມາຊິກສະພາແຫ່ງຊາດ (ສສຊ) ໃນຕອນເຊົ້າວັນທີ 27 ມິຖຸນາ 2024 ຜ່ານມາ ຕໍ່ 32 ມາດຕາ ກວມເອົາ 52 ເນື້ອໃນ ໂດຍຄະນະຮັບຜິດຊອບປັບປຸງກົດໝາຍ ກໍໄດ້ຄົ້ນຄວ້າພິຈາລະນາປັບປຸງເບື້ອງຕົ້ນ ເຊິ່ງທ່ານຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍໄດ້ລາຍງານຜົນການປັບປຸງຕໍ່ກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ໃນຕອນເຊົ້າວັນທີ 1 ກໍລະກົດ 2024. ຈາກນັ້ນ, ສສຊ ກໍໄດ້ຮັບຮອງເອົາກົດໝາຍສະບັບນີ້ ດ້ວຍຄະແນນສຽງເຫັນດີ 140 ທ່ານ ເທົ່າກັບ 95.23%. ແຕ່ເຖິງຢ່າງໃດກໍຕາມ, ມີບັນດາ ສສຊ ໄດ້ປະກອບຄໍາເຫັນຢ່າງຫລາກຫລາຍ ແລະ ກົງໄປກົງມາຕໍ່ເນື້ອໃນຕ່າງໆຂອງຮ່າງກົດໝາຍສະບັບນີ້. ສະນັ້ນ, ພວກເຮົາຈະໄດ້ສຸມໃສ່ຄົ້ນຄວ້າຢ່າງເລິກເຊິ່ງ ເພື່ອເລືອກເຟັ້ນເອົາຄໍາເຫັນຂອງຜູ້ແທນ ມາພິຈາລະນາປັບປຸງໃສ່ເນື້ອໃນກົດໝາຍ ແລະ ເນື່ອງຈາກເປັນການຮຽບຮຽງຄັ້ງສຸດທ້າຍ, ຖ້າເຫັນວ່າຍັງມີຈຸດໃດ, ຄໍາສັບຄໍາເວົ້າໃດ ທີ່ບໍ່ທັນຈະແຈ້ງ ແລະ ສອດຄ່ອງ ກໍສາມາດຍົກຂຶ້ນຕື່ມ ເພື່ອເຮັດໃຫ້ກົດໝາຍມີເນື້ອໃນຄົບຖ້ວນ, ສອດຄ່ອງ, ຮັດກຸມ ແລະ ສົມບູນ ກ່ອນປະທານສະພາແຫ່ງຊາດຈະລົງລາຍເຊັນ.
ໃນກອງປະຊຸມ, ຜູ້ເຂົ້າຮ່ວມໄດ້ສຸມສະຕິປັນຍາ ຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນກົດໝາຍສະບັບນີ້ ເພື່ອໃຫ້ສອດຄ່ອງກັບສະພາບຄວາມເປັນຈິງ; ຮັບປະກັນໃຫ້ບັນດາຄຳຄິດຄຳເຫັນຂອງ ສສຊ ທີ່ໄດ້ປະກອບໃສ່ກົດໝາຍວ່າດ້ວຍການທ່ອງທ່ຽວ (ສະບັບປັບປຸງ) ທີ່ຜ່ານການພິຈາລະນາຮັບ ຮອງໃນກອງປະຊຸມສະໄໝສາມັນ ເທື່ອທີ 7 ໄດ້ຮັບການຄົ້ນຄວ້າ, ເລືອກເຟັ້ນ, ປັບປຸງໃສ່ຮ່າງກົດໝາຍດັ່ງກ່າວ ໃຫ້ມີຄວາມຮັດກຸມ, ຈະແຈ້ງ, ສອດຄ່ອງກັບແນວທາງນະໂຍບາຍຂອງລັດ, ລັດຖະທຳມະນູນ, ກົດໝາຍອື່ນ, ສົນທິສັນຍາສາກົນ ທີ່ ສປປ ລາວ ເປັນພາຄີ, ແທດເໝາະກັບສະພາບການຂະຫຍາຍ ຕົວທາງດ້ານເສດຖະກິດ-ສັງຄົມ ແລະ ສາມາດຈັດຕັ້ງປະຕິບັດໄດ້ຢ່າງຍາວນານ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫລືອທາງດ້ານງົບປະມານ ຈາກມູນນິທິອາຊີ (The Asia Foundation) ໂດຍຜ່ານກອງເລຂາຄຸ້ມຄອງແຫລ່ງທຶນຊ່ວຍເຫລືອລ້າໃຫ້ແກ່ສະພາແຫ່ງຊາດ.
ຂ່າວ-ພາບ: ສພຊ
