ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສວນຊາ 36 ເນັ້ນຜະລິດຊາແບບທໍາມະຊາດ ປະຊາຊົນມີສ່ວນຮ່ວມໃນການປົກປັກຮັກສາຕົ້ນຊາທີ່ເກົ່າແກ່

ບໍລິສັດລາວທີຊິກມາເນີການຄ້າຂາອອກ-ຂາເຂົ້າຈໍາກັດຜູ້ດຽວ ມີແຜນທີ່ຈະຮ່ວມມືກັບກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວໃນການສ້າງສວນຊາ 36 ເປັນສະຖານທີ່ທ່ອງທ່ຽວ ແລະ ພ້ອມດຽວກັນ ກໍ່ສ້າງເປັນພິພິທະພັນຊາທີ່ເກົ່າແກ່ຂອງລາວ ລວມທັງມີແຜນທີ່ຈະສ້າງໂຄງການສອນວິທີຊົງນໍ້າຊາທີ່ຖືກຕ້ອງໃຫ້ປະຊາຊົນເປັນອາຊີບເສີມ.
ບໍລິສັດລາວທີຊິກມາເນີການຄ້າຂາອອກ-ຂາເຂົ້າຈໍາກັດຜູ້ດຽວ ຫຼື ເອີ້ນອີກຢ່າງໜຶ່ງວ່າ “ສວນຊາ 36” ເປັນບໍລິສັດເອກະຊົນຕ່າງປະເທດ ຮ້ອຍສ່ວນຮ້ອຍ ທີ່ມາລົງທຶນຜະລິດ ແລະ ຈໍາໜ່າຍຜະລິດຕະພັນຊາທີ່ເກົ່າແກ່ດັ່ງເດີມຂອງລາວ ຊຶ່ງເປັນຊາທີ່ມີລັກສະນະພິເສດທາງດ້ານລົດຊາດຫອມຄ້າຍຄືໝາກໄມ້ທໍາມະຊາດ ໂດຍທີ່ບໍ່ມີການປຸງແຕ່ງຫຍັງເລີຍ ແລະ ປາສະຈາກສານເຄມີຕ່າງໆ ໂດຍບໍລິສັດໄດ້ມີວິໄສທັດນຳທາງໃຫ້ປະຊາຊົນເຫັນໄດ້ຄຸນຄ່າໃນການປົກປັກຮັກສາຕົ້ນຊາ ແລະ ທັງເຮັດໃຫ້ຕ່າງປະເທດຮັບຮູ້ວ່າຢູ່ລາວກໍ່ມີຊາທໍາມະຊາດທີ່ມີເອກະລັກສະເພາະຄືກັບປະເທດອື່ນໆໃນໂລກ.
ທ່ານນາງ ເຊຍລົງຫົງ, ຜູ້ອໍານວຍການບໍລິສັດລາວທີຊິກມາເນີການຄ້າຂາອອກ-ຂາເຂົ້າຈໍາກັດຜູ້ດຽວໄດ້ໃຫ້ສໍາພາດວ່າ: ສວນຊາ 36 ຫຼື ຊາບ້ານຫຼັກ 36 ເມືອງປາກຊ່ອງ, ແຂວງຈໍາປາສັກ ໄດ້ຮັບການສ້າງຕັ້ງຂຶ້ນໃນປີ 2016 ໂດຍໄດ້ເລີ່ມຄົ້ນຄວ້າສໍາຫຼວດຫາຕົ້ນຊາທີ່ເກົ່າແກ່ໃນບໍລິເວນບ້ານຫຼັກ 36 ຊຶ່ງສາມາດພົບເຫັນຊາເກົ່າແກ່ທີ່ມີຄຸນຄ່າຈໍານວນຫຼາຍ ແຕ່ປະຊາຊົນສ່ວນໃຫຍ່ແມ່ນໄດ້ທໍາລາຍຖິ້ມ; ເມື່ອເປັນດັ່ງນັ້ນທາງບໍລິສັດຈຶ່ງໄດ້ເຂົ້າໄປເກັບຊື້ນໍາປະຊາຊົນ ເພື່ອຮັກສາຕົ້ນຊາ, ແນວພັນຊາ ພ້ອມທັງ ສ້າງໃຫ້ເປັນກະສິກໍາອິນຊີ. ນອກຈາກນີ້, ທາງບໍລີສັດຍັງໄດ້ມີການປຸກລະດົມໃຫ້ປະຊາຊົນໃນເຂດດັ່ງກ່າວເຂົ້າມາມີສ່ວນຮ່ວມໃນການອະນຸລັກຮັກສາເພື່ອຜະລິດເປັນຊາທໍາມະຊາດ ທີ່ປາສະຈາກສານເຄມີ ໂດຍແນ່ໃສ່ຈໍາໜ່າຍໃຫ້ແກ່ຜູ້ບໍລິໂພກທັງພາຍໃນ ແລະ ຕ່າງປະເທດ, ທັງເປັນການສ້າງວຽກເຮັດງານທໍາໃຫ້ແກ່ປະຊາຊົນໃນເຂດດັ່ງກ່າວຕື່ມອີກ.
ທ່ານນາງ ເຊຍລົງຫົງ, ຜູ້ອໍານວຍການບໍລິສັດລາວທີຊິກມາເນີການຄ້າຂາອອກ-ຂາເຂົ້າຈໍາກັດຜູ້ດຽວໄດ້ໃຫ້ຮູ້ຕື່ມວ່າ: ປັດຈຸບັນ, ສວນຊາ 36 ມີເນື້ອທີ່ທັງໝົດ 20 ກວ່າເຮັກຕາ ແລະ ມີແຜນຈະຂະຫຍາຍເນື້ອທີ່ໃຫ້ໄດ້ 150 ເຮັກຕາ ໂດຍໄດ້ຜະລິດເປັນຜະລິດຕະພັນຊາຫລາຍປະເພດເຊັ່ນ: ຊາແດງ, ຊາຂາວ, ຊາຂຽວ ແລະ ຊາອົບແຫ້ງທີ່ສາມາດເກັບຮັກສາໄວ້ດົນເທົ່າໃດກໍ່ຍິ່ງມີລົດຊາດແຊບຂຶ້ນເທົ່ານັ້ນ; ສ່ວນຕະຫຼາດຈໍາໜ່າຍຫຼັກໆໃນປະຈຸບັນນີ້ກໍ່ຄື: ສປ ຈີນ ແລະ ຄົນຈີນທີ່ອາໃສຢູ່ລາວ.
ໃນອານາຄົດຂ້າງໜ້າ, ທາງບໍລິສັດແມ່ນມີແຜນທີ່ຈະໄດ້ຂະຫຍາຍຕະຫຼາດໄປ ສິງກະໂປ ແລະ ເອີຣົບອີກດ້ວຍ.