ສວນພຶກສາ ສະຫລອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ

ສວນພຶກສາ ຢູ່ເມືອງນາຊາຍທອງ, ນະຄອນຫລວງວຽງຈັນ ຈັດກິດຈະກຳສະເຫລີມສະຫລອງ ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ໃນວັນທີ 1 ມິຖຸນາ 2024 ເຊິ່ງມີຫລາຍກິດຈະກຳ ເປັນຕົ້ນ: ປູກເບ້ຍໄມ້, ໄມ້ໃຫ້ໝາກ, ດອກໄມ້ປະດັບ ແລະ ໄມ້ອື່ນໆ ຫລາຍກວ່າ 4 ພັນເບ້ຍ, ປ່ອຍປາ, ແຂ່ງຂັນປູກຕົ້ນໄມ້ໃສ່ຖັງ, ມອບຂອງຂວັນ ແລະ ຊົມການສະແດງສິລະ ປະ-ວັນນະຄະດີຂອງນ້ອງນັກຮຽນ.

ທ່ານ ພູວົງ ພະມີສິດ ປະທານສວນພຶກສາ ໄດ້ໃຫ້ຮູ້ວ່າ: ການຈັດກິດຈະກຳໃນຄັ້ງນີ້, ເປັນການປຸກລະດົມໃຫ້ທົ່ວສັງຄົມ ເຫັນໄດ້ຄວາມສໍາຄັນ ແລະ ຍົກສູງໃນວຽກງານປົກປ້ອງສິດທິເດັກ ກໍຄື ວຽກງານແມ່ ແລະ ເດັກ, ເອົາໃຈໃສ່ລ້ຽງດູເບິ່ງແຍງໃຫ້ເຂົາເຈົ້າໄດ້ເຕີບໂຕ ແລະ ເຕີບໃຫຍ່ຕາມໄວຈະເລີນພັນ, ມີໂອກາດໄດ້ເຂົ້າເຖິງລະບົບຮັກສາສຸຂະພາບ ແລະ ລະບົບການສຶກສາຢ່າງທົ່ວເຖິງ, ທັງເປັນການປູກຈິດສຳນຶກໃຫ້ນ້ອງນັກຮຽນ, ເຍົາວະຊົນ, ອະນຸຊົນ, ຊາວໝຸ່ມ, ນັກຮຽນ, ນັກສຶກສາ ແລະ ໃຫ້ທຸກຄົນໃນທົ່ວສັງຄົມຮູ້ຮັກທຳມະຊາດ, ຮັກສິ່ງແວດລ້ອມ, ຮູ້ຄຸນຄ່າ, ຮູ້ຜົນປະ ໂຫຍດຂອງປ່າໄມ້ ຫລາຍຂຶ້ນ.

ທ່ານໃຫ້ຮູ້ຕື່ມວ່າ: ໄລຍະຜ່ານມາ, ສວນພຶກສາ ໄດ້ມີຮ່ວມຮັກສາສິ່ງແວ້ດລ້ອມ ກໍຄື ການປູກຕົ້ນໄມ້ ເພື່ອເປັນການປະກອບ ສ່ວນເຮັດໃຫ້ການປະຕິບັດ 6 ສ ທີ່ນະ ຄອນຫລວງວຽງຈັນ ວາງອອກ ໃຫ້ປາກົດຜົນເປັນຈິງ ໂດຍສະເພາະ ສ.ສີຂຽວ ເພື່ອປະ ກອບສ່ວນ ເຮັດໃຫ້ເນື້ອທີ່ປົກຫຸ້ມຂອງປ່າໄມ້ກວມ 70% ຂອງເນື້ອທີ່ປ່າໄມ້ທົ່ວປະເທດ.