ການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 29 ມິຖຸນາ 2022 ພາຍໃຕ້ການເປັນປະທານຂອງ ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແລະ ເປັນວາລະຂອງການຄົ້ນຄ້ວາປະກອບຄໍາເຫັນຂອງສະມາຊິກສະພາແຫ່ງຊາດ(ສສຊ) ຕໍ່ຮ່າງກົດໝາຍວ່າດ້ວຍການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ສະບັບປັບປຸງ ຫລັງຈາກ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ຂຶ້ນສະເໜີຮ່າງກົດໝາຍດັ່ງກ່າວຕໍ່ກອງປະຊຸມໃນພາກເຊົ້າ, ເຊິ່ງຍົກໃຫ້ເຫັນວ່າຮ່າງກົດໝາຍນີ້ມີທັງໝົດ ມີ XI ພາກ, 5 ໝວດ ແລະ 72 ມາດຕາ.
ຈາກນັ້ນ, ສສຊ ຫລາຍເຂດເລືອກຕັ້ງ ໄດ້ສຸມໃສ່ການຄົ້ນຄວ້າປະກອບຄໍາເຫັນໃສ່ກົດ ໝາຍດັ່ງກ່າວຢ່າງຫລາກຫລາຍ ໂດຍສະເພາະແມ່ນການປ່ຽນຊື່ ກົດໝາຍ ຈາກ ກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ກາງ ມາເປັນ ກົດໝາຍວ່າດ້ວຍການສົ່ງເສີມຈູນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ. ການກໍານົດຄໍາສັບຂອງຈຸນລະວິສາຫະກິດ ເພື່ອໃຫ້ຮັບປະກັນຄວາມເຂົ້າໃຈຂອງສັງຄົມງ່າຍຂຶ້ນ. ນອກນີ້ ສສຊ ກໍໄດ້ປະກອບຄໍາເຫັນໃສ່ການຕັດເນື້ອໃນອອກຈາກກົດໝາຍ ຈໍານວນ 6 ມາດຕາ, ການປັບປຸງເນື້ອໃນອີກ 30 ມາດຕາ ແລະ ສ້າງໃໝ່ຈໍານວນ 23 ມາດຕາ, ທັງນີ້ ກໍເພື່ອໃຫ້ສອດຄ່ອງກັບຫລັກການສ້າງ ແລະ ປັບປຸງກົດໝາຍ ແລະ ແນໃສ່ຮັບປະກັນໃຫ້ແກ່ການສົ່ງເສີມ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃນໄລຍະປັດຈຸ ບັນ ແລະ ອະນາຄົດ ແນໃສ່ເຮັດໃຫ້ການສົ່ງເສີມແບບທົ່ວເຖິງຂອງ ຂະແໜງການທຸລະກິດ, ການສົ່ງເສີມແບບເປັນລະບົບ, ມີປະສິດທິພາບ ແລະ ປະສິດທິຜົນ.
ພ້ອມກັນນີ້, ບັນດາ ສສຊ ເຊື່ອໝັ້ນວ່າ ພາຍຫລັງກົດໝາຍດັ່ງກ່າວຖືກຮັບຮອງ ແລະ ປະກາດໃຊ້ຢ່າງເປັນທາງການແລ້ວ ຈະເຮັດໃຫ້ ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ມີການພັດທະນາ ແລະ ຂະຫຍາຍຕົວ ທັງປະລິມານ ແລະ ຄຸນນະພາບ, ປະກອບສ່ວນສ້າງວຽກເຮັດງານທໍາໃຫ້ປະຊາຊົນຢ່າງກວ້າງຂວາງ ແລະ ປັບປຸງຊີວິດການເປັນຢູ່ໃຫ້ດີຂຶ້ນເທື່ອລະກ້າວ.
ຂ່າວ: ສຸພາສະຫວັນ
ພາບ: ເກດສະໜາ
