ທ່ານ ນາງ ວາລີ ເວດສະພົງ, ສະມາຊິກສະພາແຫ່ງຊາດ ຈາກເຂດເລືອກຕັ້ງທີ 1 ນະຄອນຫລວງວຽງຈັນ ໄດ້ປະກອບຄໍາເຫັນຫລາຍບັນຫາຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 10 ມິຖຸນາ 2024 ທີ່ຫ້ອງປະຊຸມສະພາແຫ່ງຊາດ, ເຊິ່ງໜຶ່ງໃນນັ້ນແມ່ນການສະເໜີໃຫ້ລັດຖະບານເພີ່ມຄວາມເອົາໃຈໃສ່ ຊຸກຍູ້ສົ່ງເສີມວຽກງານການທ່ອງທ່ຽວໃຫ້ດີຂຶ້ນກວ່າເກົ່າ.
ທ່ານກ່າວວ່າ: ໃນການແກ້ໄຂບັນຫາຮີບດ່ວນທາງດ້ານເສດຖະກິດ. ໜຶ່ງໃນຫຼາຍມາດຕະການທີ່ສໍາຄັນ ລັດຖະບານ ຕ້ອງໄດ້ເອົາໃຈໃສ່ຊຸກຍູ້ສົ່ງເສີມວຽກງານການທ່ອງທ່ຽວ ຢ່າງເອົາຈິງເອົາຈັງກວ່າເກົ່າ, ເຖິງວ່າມີນະໂຍບາຍແລ້ວ ກໍ່ຕ້ອງຊຸກຍູ້ ຫລື ກະຕຸ້ນຢ່າງຈິງຈັງທີ່ສຸດ ເພາະມັນເປັນການສົ່ງອອກກັບທີ່ ແລະ ຈະເຮັດໃຫ້ບັນຍາກາດຂອງການຈັບຈ່າຍໃຊ້ສອຍໃນສັງຄົມລາວດີຂຶ້ນກວ່າເກົ່າ, ເຊິ່ງໃນດ້ານຈິດຕະວິທະຍາແລ້ວ, ນີ້ຖືເປັນການດຶງດູດຄວາມເຊື່ອໝັ້ນຂອງການລົງທຶນມາໃນລະດັບໜຶ່ງ. ພວກເຮົາບໍ່ຄວນເລັ່ງໃສ່ອຸດສາຫະກໍາໜັກພຽງຢ່າງດຽວເທົ່ານັ້ນ.
ທ່ານ ນາງ ວາລີ ເວດສະພົງ ກ່າວເນັ້ນຕື່ມວ່າ: ການພັດທະນາການທ່ອງທ່ຽວ ແມ່ນສາມາດຈັດຕັ້ງປະຕິບັດໄດ້ທັນທີ ແລະ ບໍ່ມີການລົງທຶນຫລາຍ, ສະນັ້ນ ລັດຖະບານ ຄວນສຸມໃສ່ການພັດທະນາການໃນດ້ານນີ້ໃຫ້ດີຂຶ້ນ ແລະ ເຮັດຢ່າງເອົາຈິງເອົາຈັງແທ້.
