ໃນພາກບ່າຍຂອງການດຳເນີນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ວັນທີ 10 ມິຖຸນາ 2024 ໂດຍການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານພາແຫ່ງຊາດ, ບັນດາສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳຄິດຄຳເຫັນ ໃສ່ບົດລາຍງານ ຂອງລັດຖະບານ ໃນຫລາຍບັນຫາສຳຄັນ ເຊິ່ງໂດຍລວມແລ້ວໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສຳເລັດ ທີ່ລັດຖະບານ ຍາດມາໄດ້ໃນໄລຍະຜ່ານມາ ແຕ່ຍັງມີ ສສຊ ບາງເຂດເລືອກຕັ້ງ ສະເໜີ ໃຫ້ລັດຖະບານ ແກ້ໄຂບາງບັນຫາທີ່ເຄັ່ງຮ້ອນ ໃນສັງຄົມ ປັດຈຸບັນ. ໃນນັ້ນ, ທ່ານ ໄຊຍະເດດ ຜຸຍຍະວົງ ສສຊ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ສະເໜີໃຫ້ລັດຖະບານ ຈັດແບ່ງໂກຕາພະນັກງານ-ລັດຖະກອນ ໃຫ້ມີຄວາມຊັດເຈນຂຶ້ນຕື່ມ ອາດຈະ 30-70% ຫລື 40-60% ແນໃສ່ ປຸກລະດົມຈິດໃຈ ນັກຮຽນ-ນັກສຶກສາ ໃຫ້ຕັ້ງໃຈຮໍ່າຮຽນ ແນໃສ່ປະກອບສ່ວນໃນການການຮັບໃຊ້ຊາດ-ຮັບໃຊ້ສັງຄົມ.
ພ້ອມນີ້, ທ່ານ ໄຊຍະເດດ ຜຸຍຍະວົງ ຍັງໄດ້ມີຄຳເຫັນ ຕໍ່ມາດຕະການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ຄວນເຮັດຄຽງຄູ່ກັບການຫັນວຽກງານຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍ, ໃຫ້ມີການກຳນົດມາດຕະການໄລຍະສັ້ນ-ໄລຍະຍາວ ຢ່າງຊັດເຈນ, ອັນໃດເປັນອັນຮີບດ່ວນ, ອັນໃດເປັນສິ່ງທີ່ຈະເຮັດໄລຍະຍາວ ເຊັ່ນ: ການຮັກສາສະຖຽນນະພາບທາງດ້ານເງິນຕາ ແລະ ການຜະລິດເພື່ອທົດແທນການນຳເຂົ້າ ຄວນແຍກອອກຈາກກັນ ເພາະນະໂຍບາຍເງິນຕາມີຄວາມຈຳເປັນຕ້ອງໄດ້ແກ້ຢ່າງຮີບດ່ວນ ບໍ່ດັ່ງນັ້ນ ການລົງທຶນໃສ່ການຜະລິດຈະພົບຄວາມຫຍຸ້ງຍາກທີ່ສຸດ ເພາະຄ່າຂອງເງິນອ່ອນໄຫວເກີນໄປ.
ສຳລັບ ວຽກງານ ຄະນະກຳມະການຄຸ້ມຄອງການລົງທຶນ (ຄລທ) ຄວນເພີ່ມທະວີຄວາມຮັດກຸມ ໃນການອະນຸມັດແຜນນຳເຂົ້າ ຂອງບັນດາບໍລິສັດ, ອັນໃດຜະລິດໄດ້ພາຍໃນ ກໍຄວນຢຸດເຊົາ ເພື່ອສົ່ງເສີມກັນ. ນອກຈາກນັ້ນ, ການສະເໜີຜ່ານແຜນນຳເຂົ້າຂອງບໍລິສັດ ຈຳນວນໜຶ່ງກໍເປັນພຽງອາໄສຊ່ອງຫວ່າງກາງຍົກເວັ້ນ ເພື່ອເອົາໄປຂາຍຕໍ່. ສ່ວນການຜັນຂະຫຍາຍ ທິດທາງພັດທະນາ ແບບຍືນຍົງ-ສີຂຽວ ໃຫ້ເປັນຮູບປະທຳ ຄວນກຳນົດຢ່າງຊັດເຈນ ໃນກົດໝາຍ ວ່າດ້ວຍການສົ່ງເສີມການລົງທຶນ, ອັນໃດອະນຸຍາດ-ອັນໃດ ຄວນຫ້າມແຕ່ຫົວທີ ແນໃສ່ອັດຊ່ອງຫວ່າງ ທີ່ຈະເກີດຂຶ້ນ ຕິດພັນກັບການຂະຫຍາຍຕົວ ດ້ານເສດຖະກິດ-ສັງຄົມ ໃນຕໍ່ໜ້າ ແລະ ຍາວນານ ເປັນຕົ້ນ ຊ່ອງວ່າງຈາກການ ກຳນົດເອົາຂີ້ເຫຍື້ອຈາກຕ່າງປະເທດເປັນວັດຖຸດິບ ເພື່ອນຳເຂົ້າມາປ້ອນໂຮງງານ ລີຊາຍເຄີນຂີ້ເຫຍື້ອ ເຊິ່ງເນື້ອແທ້ ຜູ້ນຳເຂົ້າ ໄດ້ຜົນປະໂຫຍດນຳການຈ້າງເອົາມາຖິ້ມ ຂອງບັນດາປະເທດອຸດສາຫະກຳ, ການຜະລິດຄືນຂີ້ເຫຍື້ອ ມັນກໍມີອັນເສດເຫລືອຕົກຄ້າງໄວ້ ບໍ່ຫລຸດ 40% ທີ່ຕ້ອງໄດ້ຝັງລົງດິນ ສານເຄມີຕົກຄ້າງເຫລົ່ານັ້ນ ໃນໄລຍະຍາວກໍຈະຊຶມລົງ ນໍ້າບາດານ ສົ່ງຜົນກະທົບຕໍ່ລູກຫລານ ຂອງພວກເຮົາ. ສະນັ້ນ, ຄວນກຳນົດໃສ່ໃນກົດໝາຍ ຫ້າມແຕ່ຫົວທີ. ສະເພາະ ການນຳເຂົ້າຂີ້ເຫຍື້ອນີ້, ປະກົດວ່າທາງກົມພາສີ ກໍໄດ້ມີແຈ້ງການແລ້ວ ຄວນຍົກລະດັບແຈ້ງການຂຶ້ນເປັນ ດຳລັດ ຫລື ກຳນົດໃສ່ເປັນຂໍ້ຫ້າມໃນກົດໝາຍ ສົ່ງເສີມການລົງທຶນຍິ່ງເປັນການດີ.
ທ່ານ ໄຊຍະເດດ ຜຸຍຍະວົງ ຍັງສະເໜີ ໃຫ້ເຂດເສດຖະກິດພິເສດ ຄວນໄດ້ແຕ່ງຕັ້ງ ສະພາບໍລິຫານເຂດ ປະກອບມີ ອົງການປົກຄອງແຂວງ ແລະ ບັນດາຂະແໜງການກ່ຽວຂ້ອງ ເພື່ອມີສ່ວນຮ່ວມ ໃນການປະຊຸມ ຕົກລົງປັນຫາ ຮ່ວມກັນ ແນໃສ່ອັດຊ່ອງວ່າງ ພາຍໃນເຂດ ເປັນຕົ້ນ ການອະຍຸຍາດລົງທຶນ ໃຫ້ໄປຕາມທິດຍືນຍົງສີຂຽວ ຂອງລັດຖະບານ ຫລີກລ້ຽງການນຳເຂົ້າຂີ້ເຫຍື້ອມາຖີ້ມ ພາຍໃນເຂດ ດ້ວຍຮູບການເອົາມາຜະລິດຄືນ. ນອກຈາກນັ້ນ, ການນຳເຂົ້າ-ສົ່ງອອກສິນຄ້າ ພາຍໃນເຂດ ຄວນໃຫ້ມີຄວາມຮັດກຸມ ຫລີກລ້ຽງການນຳເຂົ້າແບບຍົກເວັ້ນພາສີ-ອາກອນ ແລ້ວນຳອອກໄປຂາຍຕໍ່ ເຊິ່ງເປັນການທຳຮ້າຍລະບົບເສດຖະກິດຂອງພວກເຮົາເອງ.
ພ້ອມນີ້, ການເປີດບໍລິສັດການຂົນສົ່ງໃນເຂດເສດຖະກິດພິເສດ ແຕ່ອອກມາໃຫ້ບໍລິການຢູ່ພາຍນອກ ໂດຍຍົກເວັ້ນພາສີອາກອນທຸກຢ່າງ ນັບແຕ່ກົນຈັກ ພາຫະນະຮັບໃຊ້ ຈົນເຖິງພັນທະງົບປະມານ ເຮັດໃຫ້ ບໍ່ມີຄວາມຍຸດຕິທຳຕໍ່ບັນດາຫົວໜ່ວຍທຸລະກິດ ທີ່ຈົດທະບຽນຢູ່ນອກເຂດ ເຊິ່ງປະຕິບັດພັນທະຄົບຖ້ວນ ຕາມລະບຽບກົດໝາຍ ເຮັດໃຫ້ບໍລິສັດເຫລົ່ານັ້ນ ບໍ່ສາມາດຄົງຕົວຢູ່ໄດ້, ສ່ວນພາກລັດ ນອກຈາກບໍ່ໄດ້ຫຍັງ ຍັງໄດ້ຮັບພາລະສ້ອມແປງເສັ້ນທາງ ທີ່ເປ່ເພ.
ພ້ອມກັນນີ້, ທ່ານຍັງ ສະເໜີໃຫ້ພາກສ່ວນທີ່ກ່ຽວຂ້ອງ ປິດຮ້ານອິນເຕີແນັດ ເພາະປັດຈຸບັນ ພື້ນທີ່ການປົກຫຸ້ມຂອງອິນເຕີແນັດ ໃນປະເທດຂອງພວກເຮົາສູງ ເຖິງ 97%, ສ່ວນການດຳເນີນທຸລະກິດດ້ານນີ້ ເນື້ອແທ້ແມ່ນເປັນພຽງການແອບແຝງ ເປີດຄາຊີໂນອອນລາຍ ທີ່ເຮັດໃຫ້ມີປະກົດການຫຍໍ້ທໍ້, ຂີ້ລັກງັດແງະໃນສັງຄົມ ສະເໜີກະຊວງ ປກສ ປະສານສົມທົບ ກັບກະຊວງເຕັກໂນໂລຊີ ແລະ ການສື່ສານ ດຳເນີນການປິດທຸລະກິດດັ່ງກ່າວ.
ຂ່າວ: ທະນູທອງ
ພາບ: ອ່າຍຄຳ
