ໃນຕອນເຊົ້າຂອງວັນທີ 26 ກໍລະກົດ 2024 ສະຖາບັນຍຸຕິທໍາແຫ່ງຊາດ ກະຊວງຍຸຕິທໍາ ແລະ ກົມກໍ່ສ້າງກໍາລັງ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ເຊັນບົດບັນທຶກການ ຮ່ວມມື ວ່າດ້ວຍກໍ່ສ້າງບຸກຄະລາກອນທາງດ້ານກົດໝາຍ ໃຫ້ກະຊວງປ້ອງກັນຄວາມສະຫງົບ ທີ່ຫ້ອງປະຊຸມອາເນກປະສົງ ຂອງສະຖາບັນຍຸຕິທໍາແຫ່ງຊາດ, ກະຊວງຍຸຕິທໍາ.
ຕາງໜ້າກະຊວງປ້ອງກັນຄວາມສະຫງົບ ເຂົ້າຮ່ວມລົງນາມ ໂດຍ ທ່ານ ພັອ ບຸນມີ ມັກຄະວານ, ຫົວໜ້າກົມກໍ່ສ້າງ ພ້ອມດ້ວຍຄະນະທີ່ກ່ຽວຂ້ອງ ຈໍານວນ 12 ທ່ານ. ຕາງໜ້າໃຫ້ສະຖາບັນຍຸຕິທໍາແຫ່ງຊາດ ໂດຍ ທ່ານ ປອ ປະເສີດ ສະຫວ່າງດີ, ຫົວໜ້າ ສະຖາບັນຍຸຕິທໍາແຫ່ງຊາດ, ພ້ອມດ້ວຍຄະນະ, ແຂກຖືກເຊີນຈາກ ຫ້ອງການກະຊວງຍຸຕິທໍາ, ກົມຈັດຕັ້ງ ແລະ ພະນັກງານ, ກົມກວດກາ, ກົມໂຄສະນາເຜີຍແຜ່ກົດໝາຍຂອງກະຊວງຍຸຕິທໍາ ແລະ ຜູ້ຕາງໜ້າຈາກ ກົມໃຫ່ຍການເມືອງກອງທັບ.
ບົດບັນທຶກດັ່ງກ່າວໄດ້ເນັ້ນໃສ່ ນາຍ ແລະ ພົນຕໍາຫຼວດທີ່ເປັນບຸກຄົນດີເດັ່ນ, ເປັນບຸກຄົນທີໄດ້ຮັບຄວາມໄວ້ວາງໃຈຈາກກົມກອງ ເຂົ້າຮ່ວມໃນການສຶກສາກົດໝາຍເພື່ອເປັນກໍາລັງແຮງໃນການຜັນຂະຫຍາຍມະຕິດັ່ງກ່າວ.
ທີ່ມາ: ສະຖາບັນຍຸຕິທໍາແຫ່ງຊາດ
