ວັນທີ 17 ມີຖຸນາ 2024 ນີ້ຄະນະຊາວໜຸ່ມແຂວງ ອັດຕະປື ສປປ ລາວ ແລະ ຄະນະຊາວໜຸ່ມອາສາສະໝັກລະດູແລ້ງສີແດງ ນະຄອນໂຮ່ຈິມິນ ສສ ຫວຽດນາມ ໄດ້ຮ່ວມກັນຈັດຫຼາຍກິດຈະກຳ ຊ່ວຍເຫຼືອຊາວໜຸ່ມ-ເຍົາວະຊົນ ແລະ ປະຊາຊົນ ຢູ່ເມືອງ ສາມັກຄີໄຊ, ນຳພາໂດຍສະຫາຍ ພູວັນ ພົມມະຈັນ ເລຂາຄະນະບໍລິຫານງານຊາວໜຸ່ມແຂວງ ອັດຕະປື ພ້ອມດ້ວຍ ສະຫາຍ ເຈືອງ ເຕິ້ນ ຫງຽບ ຫົວໜ້າຄະນະຊາວໜຸ່ມອາສາສະໝັກລະດູແລ້ງສີແດງ ນະຄອນໂຮ່ຈິມີນ, ໃຫ້ກຽດຕ້ອນຮັບໂດຍສະຫາຍ ເພັດມີໄຊ ຄຳພັກດີ ເລຂາຄະນະບໍລິຫານງານພັກເມືອງ, ເຈົ້າເມືອງ ສາມັກຄີໄຊ ພ້ອມດ້ວຍປະຊາຊົນ ແລະ ນ້ອງນ້ອຍນັກຮຽນ ໃຫ້ການຕ້ອນຮັບ ແລະ ເຂົ້າຮ່ວມກິດຈະກໍາ.
ເຊີ່ງກິດຈະກຳທີ່ທັງສອງຄະນະຊາວໜຸ່ມ ຈັດຂື້ນໃນຄັ້ງນີ້ ປະກອບມີ: ການກວດພະຍາດ ແລະ ແຈກຢາຍຢາ ໃຫ້ພໍ່ແມ່ປະຊາຊົນ ໂດຍບໍ່ໄດ້ເສຍຄ່າ, ການຝຶກອົບຮົມໃຫ້ຄວາມຮູ້ວຽກງານກະສິກໍາ, ນຳພານ້ອງນ້ອຍເຍົາວະຊົນໂຮງຮຽນຮະລາງ ຈັດກິດຈະກຳມ່ວນຊົນ ແລະ ແຕ້ມຮູບລະບາຍສີ, ມອບອຸປະກອນການຮຽນໃຫ້ ເຍົາວະຊົນ-ອະນຸຊົນ ແລະ ມອບປຶ້ມໃຫ້ແກ່ ໂຮງຮຽນປະຖົມຮະລາງ, ມອບເຄື່ອງບັນເທົາທຸກໃຫ້ພໍ່ແມ່ປະຊາຊົນ ແລະ ມອບພັດລົມໂຊລາເຊວ, ຝຶກອົບຮົມທັກສະການສອນພາສາຫວຽດນາມ, ມອບເຮືອນໃຫ້ຄອບຄົວອານາຖາ ຈໍານວນ 1 ຫຼັງ.
ທັງນີ້ ກໍ່ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ ແລະ ຫວຽດນາມ, ຫວຽດນາມ-ລາວ ໃຫ້ແໜ້ນແຟ້ນຍິ່ງຂຶ້ນ ແລະ ທັງເປັນການສະເຫຼີມສະຫຼອງ ຄົບຮອບ 20 ປີ ທີ່ຂະບວນການອາສາສະໝັກລະດູແລ້ງສີແດງ ຂອງນະຄອນໂຮຈິມິນ ສສ ຫວຽດນາມ ທີ່ມາເຄື່ອນໄຫວຈັດກິດຈະກໍາຕ່າງໆ ເພື່ອຊ່ວຍເຫຼືອພໍ່ແມ່ປະຊາຊົນ ຢູ່ ສປປ ລາວ ກໍ່ຄືຊ່ວຍເຫຼືອຊາວໜຸ່ມ-ເຍົາວະຊົນ ແລະ ປະຊາຊົນ ແຂວງອັດຕະປື.
ຂ່າວ: ເພັດວິໄລ ຍົດລືໄຊ
