ໃນໂອກາດທີ່ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ສປປ ລາວ ພ້ອມ ພັນລະຍາ ແລະ ການນຳຂັ້ນສູງ ເດີນທາງມາເຂົ້າຮ່ວມພິທີໄວ້ອາໄລ ແລະ ງານຊາປະນະກິດ ສະຫາຍ ຫງວຽນ ຝູ໋ ຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ລະຫວ່າງ ວັນທີ 25-26 ກໍ ລະກົດ 2024 ທີ່ນະຄອນຫລວງຮ່າໂນ້ຍ, ສະຫາຍ ທອງລຸນ ສີສຸລິດ ພ້ອມຄະນະ ໄດ້ພົບປະກັບ ສະຫາຍ ໂຕ ເລິມ ປະທານປະ ເທດ ສສ ຫວຽດນາມ.
ການພົບປະຄັ້ງນີ້, ໄດ້ດຳເນີນ ໃນບັນຍາກາດທີ່ໂສກເສົ້າເສຍ ດາຍ ຕໍ່ການຈາກໄປຂອງ ສະຫາຍ ຫງວຽນ ຝູ໋ຈ້ອງ ຊຶ່ງສະຫາຍເລຂາທິການໃຫຍ່, ປະທານປະເທດ ສປປ ລາວ ໄດ້ກ່າວບາງຕອນສຳຄັນວ່າ: ໃນນາມ ພັກປະ ຊາຊົນປະຕິວັດລາວ, ສະພາແຫ່ງ ຊາດ, ລັດຖະບານ, ແນວລາວສ້າງຊາດ ແລະ ປະຊາຊົນລາວ ບັນ ດາເຜົ່າ ຂໍສະ ແດງຄວາມໂສກເສົ້າເສຍໃຈ ແລະ ອາໄລອາວອນຢ່າງສຸດຊຶ້ງ ຕໍ່ການຈາກໄປຂອງ ສະຫາຍ ຫງວຽນ ຝູ໋ ຈ້ອງ ເລຂາ ທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດ ນາມ ຊຶ່ງແມ່ນການສູນເສຍອັນຍິ່ງໃຫຍ່, ສູນເສຍຜູ້ນໍາ ປະຕິວັດທີ່ອົງອາດກ້າແກ່ນຂອງ ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ. ສະຫາຍເລຂາທິການໃຫຍ່, ປະ ທານປະເທດ ຍັງໄດ້ກ່າວເນັ້ນວ່າ ສະຫາຍ ຫງວຽນ ຝູ໋ ຈ້ອງ ແມ່ນສະຫາຍທີ່ເຄົາລົບຮັກ, ເພື່ອນທີ່ຍິ່ງໃຫຍ່ ແລະ ໃກ້ຊິດ ສະໜິດສະໜົມຂອງ ພັກ, ລັດ ແລະ ປະຊາຊົນລາວ. ການຈາກໄປຂອງ ສະຫາຍ ຫງວຽນ ຝູ໋ ຈ້ອງ ກໍແມ່ນຄວາມສູນເສຍຢ່າງໃຫຍ່ຫຼວງຂອງ ພັກ, ລັດ ແລະ ປະຊາຊົນລາວ.
ສະຫາຍ ໂຕເລິມ ກໍໄດ້ສະແດງຄວາມຂອບໃຈຢ່າງສູງມາຍັງ ສະຫາຍ ທອງລຸນ ສີສຸລິດ ພ້ອມດ້ວຍພັນລະ ຍາ ແລະ ຄະນະ ທີ່ໄດ້ເດີນທາງມາຮ່ວມພິທີໄວ້ອາໄລ ແລະ ແບ່ງເບົາຄວາມທຸກໂສກນຳ ພັກ, ລັດ ແລະ ປະຊາຊົນ ຫວຽດນາມ ອ້າຍນ້ອງ ຕໍ່ການຈາກໄປຂອງ ສະຫາຍ ຫງວຽນ ຝູ໋ ຈ້ອງ ເລຂາທິການໃຫຍ່ຄະນະບໍລິ ຫານງານສູນ ກາງ ພັກກອມມູນິດຫວຽດນາມ.
ສອງຝ່າຍ ໄດ້ຫວນຄືນເຖິງຄຸນງາມຄວາມດີຂອງ ສະຫາຍ ຫງວຽນ ຝູ໋ ຈ້ອງ ຕໍ່ການພັດທະນາ ແລະ ປົກປັກຮັກສາປະເທດຫວຽດນາມ ແລະ ການເພີ່ມພູນຄູນສ້າງ ສາຍພົວພັນສາມັກຄີພິເສດ ແລະ ການຮ່ວມມືຮອບດ້ານຂອງສອງປະເທດ, ຈະພ້ອມ ກັນສືບຕໍ່ພາລະກິດຂອງ ສະຫາຍ ຫງວຽນ ຝູ໋ ຈ້ອງ ໃນການເພີ່ມທະວີ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິ ເສດ ແລະ ການຮ່ວມມືຮອບດ້ານ ໃຫ້ນັບມື້ ນັບກ້າວເຂົ້າສູ່ລວງເລິກຍິ່ງໆຂຶ້ນ.
ໃນຕອນເຊົ້າວັນທີ 26 ກໍລະກົດ 2024, ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ພ້ອມຄະນະ ຍັງໄດ້ພົບປະກັບ ສະຫາຍ ຟ້າມມິງຈິງ ນາຍົກລັດຖະມົນຕີ ແຫ່ງ ສສ ຫວຽດນາມ. ໃນການພົບປະ ຄັ້ງນີ້, ສະຫາຍເລຂາທິການໃຫຍ່, ປະທານປະເທດ ໄດ້ກ່າວສະແດງຄວາມເສຍໃຈນຳ ພັກ, ລັດ ແລະ ປະຊາຊົນ ຫວຽດນາມ ອ້າຍນ້ອງ ທີ່ໄດ້ສູນເສຍຜູ້ນຳທີ່ອົງອາດ ເດັດດ່ຽວໃນການປະຕິບັດລະບຽບຫລັກການຂອງພັກ, ໂດຍສະ ເພາະ ແມ່ນວຽກງານປັບປຸງ ແລະ ກໍ່ສ້າງພັກໃຫ້ເຂັ້ມແຂງ, ປອດໃສ ກໍຄື ວຽກງານການປ້ອງກັນ, ຕ້ານການສໍ້ລາດ ບັງຫລວງ ແລະ ຕ້ານປະກົດການຫຍໍ້ທໍ້ຕ່າງໆ ອັນໄດ້ເຮັດໃຫ້ປະເທດຫວຽດນາມ ມີການພັດທະນາຢ່າງບໍ່ຢຸດຢັ້ງ, ຖາ ນະບົດບາດຂອງຫວຽດນາມ ໄດ້ຮັບການຍົກສູງຂຶ້ນຢ່າງຈະແຈ້ງໃນເວທີພາກພື້ນ ແລະ ສາກົນ. ສະຫາຍ ເລຂາທິ ການໃຫຍ່, ປະທານປະເທດ ໄດ້ກ່າວຂອບໃຈຕໍ່ການຊ່ວຍເຫລືອຂອງ ພັກ, ລັດ ແລະ ປະຊາຊົນຫວຽດນາມ ໃຫ້ແກ່ ປະຊາຊົນລາວ. ຍົກໃຫ້ເຫັນບັນດານະໂຍບາຍຕ່າງໆ ທີ່ລັດ ຖະບານລາວກຳລັງສູມໃສ່ ເພື່ອແກ້ໄຂບັນຫາ ຄວາມຫຍຸ້ງຍາກດ້ານເສດຖະກິດ-ການເງິນ.
ຕໍ່ການສູນເສຍອັນໃຫຍ່ຫລວງຄັ້ງນີ້, ສອງຝ່າຍ ໄດ້ຖືເອົາການສູນເສຍດັ່ງກ່າວ ກາຍເປັນກໍາລັງແຮງ ເພື່ອ ສືບຕໍ່ພາລະກິດຂອງ ສະຫາຍ ຫງວຽນ ຝູ໋ ຈ້ອງ ທີ່ໄດ້ສ້າງປະໄວ້ໃຫ້ສືບຕໍ່ ແຕກດອກອອກຜົນ, ສືບຕໍ່ຮັດແໜ້ນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ; ຫວຽດນາມ-ລາວ ໃຫ້ໜັກແໜ້ນຂຶ້ນຕື່ມ, ສຸມໃສ່ປະຕິບັດບັນດາຂໍ້ຕົກ ລົງໃນລະດັບ ສູງຂອງ ສອງພັກ, ສອງລັດ ໃຫ້ປະກົດຜົນເປັນຈິງ ແລະ ແຕກດອກອອກຜົນຍິ່ງໆຂຶ້ນ.
ຂ່າວ: ຄຕພ
ພາບ: ຕຸໄລເພັດ
