ໃນວັນທີ 16 ກໍລະກົດ 2024, ທີ່ຫ້ອງວ່າການປົກຄອງແຂວງອັດຕະປື ໄດ້ມີພິທີພົບປະແລກປ່ຽນບົດຮຽນ ລະຫວ່າງ ຄະນະຜູ້ແທນສະພາປະຊາຊົນແຂວງ ອັດຕະປື ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະຜູ້ແທນສະພາປະຊາຊົນແຂວງ ກອນຕູມ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ຝ່າຍແຂວງ ອັດຕະປື ນຳໂດຍ ສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ, ສ່ວນຝ່າຍແຂວງ ກອນຕູມ ນຳໂດຍສະຫາຍ ເຢືອງ ວັນ ຈາງ ເລຂາພັກແຂວງ ປະທານສະພາປະຊາຊົນແຂວງກອນຕູມ ພ້ອມຄະນະນໍາຜູ້ແທນທັງສອງຝ່າຍເຂົ້າຮ່ວມ.
ໂອກາດດັ່ງກ່າວ ສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ ອັດຕະປື ໄດ້ກ່າວຕ້ອນຮັບ ການມາຢ້ຽມຢາມ ແລະ ເຮັດວຽກ ຄະນະຜູ້ແທນສະພາປະຊາຊົນແຂວງກອນຕູມ, ເຊິ່ງຖືເປັນຂີດໝາຍສໍາຄັນຍິ່ງ ແລະ ເປັນເຫດການທາງປະຫວັດສາດ ເປັນການຮັດແໜ້ນຄວາມສາມັກຄີຮັກແພງ ຖານບ້ານໃກ້ເຮືອນຄຽງ ບ້ານແກ່ວເມືອງດອງທີ່ດີງາມມາແຕ່ດົນນານ ຂອງສອງຊາດລາວຫວຽດນາມ, ປະຈຸບັນແຂວງ ອັດຕະປື ເວົ້າລວມ, ເວົ້າສະເພາະສະພາປະຊາຊົນແຂວງ ພວມສຸມໃສ່ຈັດຕັ້ງປະຕິບັດມະຕິ XI ຂອງພັກ ແລະ ມະຕິກອງປະຊຸມສະໄໝທີXI ຂອງອົງຄະນະພັກແຂວງ ແລະ ກະກຽມສ້າງຂະບວນການຮັບຕ້ອນ 2 ວັນປະຫວັດສາດ ທີ່ສໍາຄັນຄື: ວັນສົນທິສັນຍາມິດຕະພາບ ແລະ ການຮ່ວມມືຮອບດ້ານ ລາວ- ຫວຽດນາມ ຄົບຮອບ 47 ປີຄື: ວັນທີ 18 ກໍລະກົດ 1977 ຫາ 18 ກໍລະກົດ 2024 ແລະ ວັນສ້າງຕັ້ງສາຍພົວພັນການທູດຂອງສອງປະເທດ ຄົບຮອບ 62 ປີ ຄື: ວັນທີ 5 ກັນຍາ 1962 ຫາ 5 ກັນຍາ 2024 ທີ່ຈະມາເຖິງໃນມໍ່ໆນີ້.
ໂອກາດດັ່ງກ່າວທັງສອງຝ່າຍກໍ່ໄດ້ລາຍງານສະພາບການເຄື່ອນໄຫວວຽກງານຂອງຕົນໃຫ້ກັນຮັບຊາບ ແລະ ໄດ້ລົງເລິກຄົ້ນຄວ້າປຶກສາຫາລືແລກປ່ຽນບົດຮຽນນຳກັນ, ໂດຍມີການທົບທວນຄືນຜົນການຮ່ວມມື ເຮັດວຽກຮ່ວມກັນໃນໄລຍະທີ່ຜ່ານມາຂອງສອງແຂວງ ກໍ່ຄືສະພາປະຊາຊົນແຂວງ ອັດຕະປື ແລະ ສະພາປະຊາຊົນແຂວງ ກອນຕູມ, ເຊິ່ງຜ່ານມາການຮ່ວມມືຂອງສອງຝ່າຍ ໄດ້ດຳເນີນໄປດ້ວຍບັນຍາກາດຄວາມມີໄມຕີຈິດ ມິດຕະພາບ ບົນພື້ນຖານທີ່ຕ່າງຝ່າຍຕ່າງໄດ້ຮັບຜົນປະໂຫຍດທີ່ເທົ່າທຽມກັນ, ການພົບປະແລກປ່ຽນບົດຮຽນເທື່ອນີ້ ທັງສອງຝ່າຍໄດ້ເຫັນດີຮັບເອົາບົດຮຽນຊຶ່ງກັນ ແລະ ກັນ ເພື່ອໄປໝູນໃຊ້ເຂົ້າໃນພຶດຕິກຳຕົວຈິງຂອງການເຄື່ອນໄຫວວຽກງານ ສະພາປະຊາຊົນແຂວງ ກອນຕູມ ແລະ ສະພາປະຊາຊົນແຂວງ ອັດຕະປື ໃຫ້ເກີດປະໂຫຍດສູງສຸດ. ການພົບປະແລກປ່ຽນບົດຮຽນ ຄັ້ງນີ້ ຄະນະປະຈຳສະພາປະຊາຊົນແຂວງ ກອນຕູມ ຍັງໄດ້ມອບຄອມພິວເຕີ ແລັບທ໋ອບ ຈຳນວນ 10 ເຄື່ອງ ແລະ ເຄື່ອງພິມ 10 ເຄື່ອງ ໃຫ້ສະພາປະຊາຊົນແຂວງ ອັດຕະປື ເພື່ອນຳໃຊ້ເຂົ້າໃນໜ້າທີ່ວຽກງານ ເພື່ອຫັນວຽກງານສະພາປະຊາຊົນເປັນທັນສະໄໝ.
ຂ່າວ: ສິດຕິພອນ.
