ວັນທີ 13 ກໍລະກົດ 2021 ທີ່ໂຮງໝໍແຂວງສາລະວັນ ທ່ານ ອະທິປັດ ໂຣດຈະນະໄພບູນ ກົງສຸນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ ໄດ້ມອບເຄື່ອງຊ່ວຍຫາຍໃຈຊະນິດແຮງດັນບວກແບບຕໍ່ເນື່ອງ (CPAP) ຈໍານວນ 2 ເຄື່ອງ ມູນຄ່າ 492.000 ບາດ ໃຫ້ໂຮງໝໍແຂວງສາລະວັນ ສປປ ລາວ ກ່າວຮັບໂດຍ ທ່ານ ໂພໄຊ ໄຊຍະສອນ ເຈົ້າແຂວງສາລະວັນແລະຄະນະ.
ໂຮງໝໍແຂວງສາລະວັນຈະນຳເຄື່ອງ CPAP ທີ່ໄດ້ຮັບການຊ່ວຍເຫລືອຄັ້ງນີ້ ໄປປິ່ນປົວ ແລະຊ່ວຍເຫຼືອເດັກນ້ອຍເກີດໃຫມ່ ທີ່ມີບັນຫາທາງລະບົບຫາຍໃຈ ເພື່ອຫລຸດອັດຕາການເສຍຊີວິດຂອງເດັກນ້ອຍເກີດໃຫມ່ຢູ່ແຂວງສະລະວັນ.
ໃນວັນດຽວກັນ ສະຖານກົງສຸນໃຫຍ່ໄທ ຍັງໄດ້ນໍາອາຫານ ແລະເຄື່ອງດື່ມໄປຮ່ວມສະຫນັບສະຫນູນການປະຕິບັດວຽກງານຂອງແພດ ພະຍາບານ ແລະອາສາສະຫມັກທີ່ປະຕິບັດໜ້າທີ່ຢູ່ໂຮງໝໍແຂວງສາລະວັນ ເພື່ອເປັນຂວັນ ແລະກຳລັງໃຈໃຫ້ແກ່ບຸກຄະລາກອນທາງການແພດໃນໄລຍະການແຜ່ລະບາດຂອງພະຍາດໂຄວິດ 19 ລວມທັງສະແດງໃຫ້ເຫັນເຖິງຄວາມສຳພັນທີ່ດີ ລະຫວ່າງໄທກັບ ສປປ ລາວ ໃນໂອກາດຄົບຮອບ 70 ປີ ແຫ່ງການສ້າງຕັ້ງສາຍພົວພັນທາງການທູດລະຫວ່າງສອງປະເທດ.
ຂ່າວ: ຈາກສະຖານທູດໄທ ປະຈໍາ ສປປ ລາວ.
Loading...