ສະຖານທູດ ຈີນ ປະຈຳລາວ ໄດ້ຈັດງານລ້ຽງສະເຫຼີມສະຫຼອງຕ້ອນຮັບການສະຖາປະນາສາທາລະນະລັດປະຊາຊົນຈີນ ຄົບຮອບ 75 ປີ(1/10/1949-1/10/2024) ຂຶ້ນໃນຕອນຄໍ່າຂອງວັນທີ 23 ກັນຍາ 2024, ທີ່ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ພ້ອມດ້ວຍການນຳຂັ້ນສູງຂອງພັກ, ລັດລາວ, ບັນດາທູຕານຸທູດຕ່າງປະເທດປະຈຳລາວ ແລະຜູ້ຕາງໜ້າຄົນຈີນຕ່າງດ້າວປະຈຳ ສປປ ລາວ ເຂົ້າຮ່ວມຫຼາຍຮ້ອຍທ່ານ.
ໃນພິທີ, ທ່ານນາງ ຟ່າງຫົງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ໄດ້ກ່າວບາງຕອນສຳຄັນວ່າ: 75 ປີຜ່ານມາ ຈີນໄດ້ມີການປ່ຽນແປງໃຫຍ່ດ້ວຍຄວາມດຸໝັ່ນສູ້ຊົນ, ພັກກອມມູນິດຈີນ ໄດ້ນໍາພາປະຊາຊົນຈີນທຸກຊົນເຜົ່າດ້ວຍຈິດໃຈໜຶ່ງດຽວພາໃຫ້ປະເທດຈີນ ຈາກຄວາມທຸກຍາກກ້າວໄປສູ່ການຮັ່ງມີ ແລະຈະເລີນຮຸ່ງເຮືອງເຂັ້ມແຂງຂຶ້ນ, ເສດຖະກິດໄດ້ເຕີບໂຕຢ່າງບໍ່ຢຸດຢັ້ງ. ຈີນໄດ້ກາຍເປັນຜູ້ເຂົ້າຮ່ວມຜູ້ກໍ່ສ້າງ ແລະຜູ້ປະກອບສ່ວນໃນລະບົບສາກົນ. ການຮ່ວມມືກໍ່ສ້າງໜຶ່ງແລວໜຶ່ງເສັ້ນທາງທີ່ມີຄຸນນະພາບສູງ ໄດ້ກາຍເປັນຜະລິດຕະພັນສາທາລະນະ ແລະ ກາຍເປັນເວທີຮ່ວມມືທີ່ທົ່ວໂລກໄດ້ມີຄວາມນິຍົມ. ໃນກອງປະຊຸມຄົບຄະນະຄັ້ງທີ 3 ຂອງຄະນະກຳມະການພັກກອມມູນິດຈີນ ສະໄໝທີ XX ໄດ້ກໍານົດແນວທາງສຸມກໍາລັງແຮງຂອງປະຊາຊົນເພື່ອຊຸກຍູ້ຄວາມທັນສະໄໝແບບຈີນ, ຊຸກຍູ້ການເປີດປະຕູສູ່ພາຍນອກທີ່ມີລະດັບສູງ, ພະຍາຍາມສ້າງໂອກາດໃໝ່ ແລະໃຫຍ່ຫຼວງກວ່າເກົ່າໃຫ້ແກ່ປະເທດລາວ ແລະບັນດາປະເທດໃນທົ່ວໂລກຢ່າງບໍ່ຢຸດຢັ້ງ.
ພາຍໃນງານຍັງໄດ້ຈັດການວາງສະແດງຮູບພາບພ້ອມສະແດງສິລະປະວັດທະນະທຳພື້ນເມືອງຈີນ ທີ່ສ່ອງແສງໃຫ້ເຫັນຜົນງານ ແລະຜົນສຳເລັດຂອງ ສປ ຈີນ ໃນການປົກປັກຮັກສາ ແລະສ້າງສາພັດທະນາປະເທດຊາດ ໃນ 75 ປີຜ່ານມາພ້ອມດ້ວຍການວາງສະແດງບາງຜົນງານທີ່ສ່ອແສງເຖິງການຮ່ວມມືທີ່ມີຜົນສຳເລັດ ຂອງສອງຊາດຈີນ-ລາວ ຕື່ມອີກ.
ທີ່ມາ: CMG FM93
