ສະຖານທູດຢີ່ປຸ່ນ ປະຈຳລາວ ຈັດພິທີລ້ຽງສົ່ງນັກສຶກສາເດີນທາງໄປປະເທດຍີ່ປຸ່ນ

ວັນທີ 1 ສິງຫາ 2024 ຜ່ານມາ, ທີ່ສະຖານທູດຢີ່ປຸ່ນ ປະຈຳລາວ, ຈັດງານລ້ຽງສົ່ງ ນັກສຶກສາ ແລະ ອະດີດນັກສຶກສາ ໃນ “ໂຄງການທຶນການສຶກສາເພື່ອການ ພັດທະ ນາຊັບພະຍາກອນມະນຸດ (JDS)” ແລະ “ໂຄງການຜູ້ນໍາໜຸ່ມ (YLP) ຫລາຍກວ່າ 20 ຄົນ ເດີນທາງໄປປະເທດຍີ່ປຸ່ນ ໂດຍມີ ທ່ານ ພຸດ ສິມມາລາວົງ ລັດຖະ ມົນຕີກະຊວງສຶກສາທິການ ແລະ ກິລາ, ປະທານສະມາຄົມມິດຕະພາບລາວ-ຍີ່ປຸ່ນ, ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ ພາກສ່ວນກ່ຽວຂ້ອງ ເຂົ້າ ຮ່ວມ.

ທ່ານ ໂຄອິຊຶມິ ຊຶໂຕມຸ ເອກອັກຄະຣາຊະທູດຢີ່ປຸ່ນ ປະຈຳ ລາວ ໄດ້ກ່າວວ່າ: ງານລ້ຽງດັ່ງກ່າວຈັດຂຶ້ນເພື່ອສະແດງຄວາມຍິນດີ ແລະ ໃຫ້ກຳລັງໃຈນັກສຶກສາ ທີ່ກຳລັງຈະເດີນທາງໄປຍີ່ປຸ່ນ, ພ້ອມທັງອວຍພອນໃຫ້ພວກເຂົາປະສົບຜົນສຳເລັດໃນການສຶກສາຮໍ່າຮຽນ ແລະ ໜ້າທີ່ວຽກງານ ໂດຍໄດ້ຮັບການສະໜັບສະໜູນງົບປະ ມານຈາກລັດຖະບານຍີ່ປຸ່ນ ພາຍໃຕ້ “ໂຄງການທຶນການສຶກສາ ເພື່ອການພັດທະນາຊັບພະຍາກອນ ມະນຸດ (JDS)” ແລະ “ໂຄງການຜູ້ນໍາໜຸ່ມ (YLP)”.

ໂຄງການ JDS ເປັນໂຄງການທີ່ສະໜອງທຶນການສຶກສາເປັນເວລາ 2 ປີ ສໍາລັບລະດັບປະລິນຍາໂທ ແລະ 3 ປີ ສຳລັບປະລິນຍາເອກ ໃຫ້ແກ່ລັດຖະກອນລາວ ທີ່ມີສ່ວນຮ່ວມໃນການພັດທະນາເສດຖະກິດ-ສັງຄົມ ເພື່ອສຶກສາຕໍ່ທີ່ປະເທດຍີ່ປຸ່ນ. ນັບແຕ່ເລີ່ມຕົ້ນໂຄງການໃນປີ 1999, ມີລັດຖະກອນລາວ ໄດ້ຮັບທຶນການສຶກສາດັ່ງກ່າວຫລາຍກວ່າ 500 ຄົນ.

ສ່ວນໂຄງການ YLP ມີເປົ້າໝາຍໃນການສົ່ງເສີມລັດຖະກອນໜຸ່ມ ໃຫ້ກາຍເປັນຜູ້ນຳຂອງປະເທດໃນ ອະນາຄົດ. ນັບແຕ່ປີ 2001 ທີ່ເລີມຕົ້ນໂຄງການ, ມີລັດຖະກອນລາວປະມານ 70 ຄົນທີ່ໄດ້ຮັບການສະໜັບສະໜູນ ຈາກໂຄງການດັ່ງກ່າວ ເຊິ່ງເປັນໂຄງການທີ່ສະໜອງທຶນການສຶກສາເປັນເວລາ 1 ປີ ເພື່ອສຶກສາລະດັບປະລິນ ຍາໂທ 1 ໃນ 5 ສາຂາວິຊາ ຄື: ນະໂຍບາຍພາກລັດ, ນະໂຍບາຍພາກລັດປະຈຳທ້ອງ ຖິ່ນ, ບໍລິຫານທຸລະກິດ, ກົດໝາຍ ແລະ ບໍລິຫານສາທາລະນະສຸກ.