ສະຖານທູດລາວປະຈຳ ສສ ຫວຽດນາມ ຈັດພິທີປາຖະກະຖາເລົ່າມູນເຊື້ອວັນສຳຄັນຂອງພັກ, ຂອງຊາດ

ໃນວັນທີ 19 ມິຖຸນາ 2024 ຜ່ານມານີ້, ທີ່ນະຄອນຫຼວງ ຮ່າໂນ້ຍ, ສະຖານເອກອັກຄະລັດຖະທູດລາວ ປະຈຳ ສສ ຫວຽດ ນາມ ໄດ້ຈັດພິທີປາຖະກະຖາ ເລົ່າມູນເຊື້ອ ຂອງພັກ, ຂອງຊາດ ເນື່ອງໃນໂອກາດລະນຶກເຖິງ ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ແຂວງຊຽງຂວາງ ຄົບຮອບ 65 ປີ (18/05/1959-18/05/2024); ວັນໄຊຊະນະບັ້ນຮົບ ດຽນບຽນຝູ ຄົບຮອບ 70 ປີ (07/05/1954-07/05/2024) ແລະ ວັນແຫກຄຸກຢ່າງມະຫັດສະຈັນຂອງບັນດາຜູ້ນຳພັກ ແລະ ແນວລາວຮັກຊາດ ຄົບຮອບ 64 ປີ (24/05/1960-24/05/2024) ໂດຍແມ່ນທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ໃຫ້ກຽດເລົ່າຄືນມູນເຊື້ອວັນສຳຄັນດັ່ງກ່າວ.

ເຂົ້າຮ່ວມຮັບຟັງໃນການປາຖະກະຖາໃນຄັ້ງນີ້ມີ ບັນດາສະຫາຍຄະນະພັກຮາກຖານ, ຄະນະໜ່ວຍພັກ, ສະມາຊິກພັກ, ພະນັກງານ ສະຖານທູດລາວ, ອົງການຜູ້ຕາງໜ້າປ້ອງກັນຄວາມ ສະຫງົບລາວ ປະຈຳ ສສ ຫວຽດນາມ, ຫ້ອງການຜູ້ຕາງໜ້າການບິນລາວ ແລະ ບັນດາຄະນະໜ່ວຍພັກນັກສຶກສາລາວເຂົ້າຮ່ວມທັງໝົດ 70 ຄົນ.

ໃນໂອກາດນີ້, ທ່ານ ນາງ ຄຳເພົາ ເອີນທະວັນ ໄດ້ຍົກໃຫ້ເຫັນເຖິງ ການນຳພາທີ່ຖືກຕ້ອງ, ສະຫຼາດສ່ອງໃສຜູ້ນຳພັກປະຊາຊົນປະຕິວັດລາວ, ໃນການນຳພາການເມືອງ-ແນວຄິດທະຫານ, ຕຳ ຫຼວດ, ພໍ່ແມ່ປະຊາຊົນ ເຮັດໃຫ້ມີນ້ຳໃຈຮັກຊາດ, ມີຄວາມອົດ ທົນ, ເສຍສະຫຼະຕໍ່ອຸດົມການປະຕິວັດ ເພື່ອເປົ້າໝາຍປົດປ່ອຍປະເທດ ຊາດອອກຈາກການຮຸກຮານຂອງຈັກກະພັດແບບເກົ່າ. ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ ຫຼວງຂອງກໍາລັງປະກອບອາວຸດເຮົາທີ່ຢູ່ໃຕ້ການນຳພາຂອງພັກ, ເປັນເຫດການປະຫວັດສາດອັນສຳຄັນຂອງຊາດ, ຂອງພັກ, ຂອງກອງທັບເຮົາ ແລະ ເປັນບົດຮຽນອັນລ້ຳຄ່າທີ່ສຸດໃຫ້ແກ່ຂະບວນຕໍ່ສູ້ຂອງກອງທັບ ແລະ ປະຊາຊົນເຮົາຍາດເອົາໄຊຊະນະໃນໄລຍະຕໍ່ມາ.

ພ້ອມນີ້, ທ່ານຍັງໄດ້ຍົກໃຫ້ເຫັນເຖິງ ວິລະກຳການໂຕນຄຸກຢ່າງມະຫັດສະຈັນຂອງບັນດາຜູ້ນຳຂອງພັກ ແລະ ແນວລາວຮັກ ຊາດ ເປັນອີກຂີດໝາຍໜຶ່ງທີ່ສຳຄັນທາງປະຫວັດສາດຂອງລາວເຮົາ ໂດຍໄດ້ທັບມ້າງເລ່ກົນອຸບາຍ ” ຫຼອກເສືອອອກຈາກຖ້ຳ ” ເພື່ອຂ້າເສືອ ພ້ອມທັງເລ່ຫຼ່ຽມຫັນປ່ຽນໂດຍສັນຕິຂອງຈັກກະ ພັດ ແລະ ລູກແຫຼ້ງຕີນມື ໄດ້ຖືກປະລາໄຊຢ່າງຫນັກຫນ່ວງ.

ນອກຈາກນັ້ນ, ທ່ານທູດຍັງໄດ້ຍົກໃຫ້ເຫັນເຖິງ ຄວາມໝາຍ ຄວາມສຳຄັນຂອງໄຊຊະນະ ດຽນບຽນຝູ ເປັນໄຊຊະນະທີ່ສະ ຫວ່າງສະໄຫວທີ່ສຸດໃນປະຫວັດສາດຂອງການຕໍ່ສູ້ຕ້ານການຮຸກ ຮານຈາກຈັກກະພັດພາຍນອກ ຂອງປະຊາຊົນຫວຽດນາມທີ່ມີກຽດສະຫງ່າ, ໄດ້ຖືກບັນທຶກເຂົ້າໃນປະຫວັດສາດຂອງຊາດ ແລະ ຂອງໂລກຢູ່ໃນສະຕະ ວັດທີ 20. ສຳລັບປະເທດເຮົາ ໄຊຊະນະ ດຽນບຽນຝູ ໄດ້ມີຄວາມສຳຄັນໃນການສາມັກ ຄີພິເສດ, ຮ່ວມ ສຳພັນສູ້ຮົບ ລະຫວ່າງ ລາວ – ຫວຽດນາມ, ເປັນໄຊຊະນະຕ້ານສັດຕູຕົວດຽວກັນ, ປະສານສົມທົບ ແລະ ອຸດຫນູນຊ່ວຍເຫຼືອຊຶ່ງກັນແລະກັນ.

ຕອນທ້າຍພິທີ, ທ່ານ ນາງ ຄຳເພົາ ເອີນທະວັນ ເອກອັກຄະ ລັດຖະທູດ ຍັງໄດ້ມີບາງຄຳເຫັນຕໍ່ຜູ້ເຂົ້າຮ່ວມ ໂດຍສະເພາະແມ່ນບັນດາຄະນະໜ່ວຍພັກນັກສຶກສາລາວ ຈົ່ງໄດ້ນຳເອົາເນື້ອໃນຈິດ ໃຈ 3 ເອກະສານທີ່ສຳຄັນຂ້າງເທິງນັ້ນ ນຳໄປເຜີຍແຜ່, ເຊື່ອມຊືມຕໍ່ໃຫ້ສະມາຊິກພັກ, ນັກສຶກສາ, ນັກຄົ້ນຄວ້າທີ່ກຳລັງສຶກສາຄົ້ນ ຄວ້າຢູ່ ສສ ຫວຽດນາມ ເພື່ອເຮັດໃຫ້ນັກສຶກສາຮູ້ໄດ້ປະຫວັດ ສາດແຫ່ງການຕໍ່ສູ້ອັນຍຶດເຍື້ອຍາວນານດ້ວຍຄວາມຫຍຸ້ງຍາກ ທີ່ຕ້ອງໄດ້ມີຄວາມມະນະອົດທົນ, ກ້າຫານ, ມີໄຫວພິກ, ເສຍສະຫຼະຊີວິດເພື່ອຍາດເອົາສັນຕິພາບ, ເອກະລາດ ແລະ ຜືນແຜ່ນດິນອັນຄົບ ຖ້ວນມາໃຫ້ແກ່ປະເທດຊາດຄືດັ່ງທຸກວັນນີ້.

ພ້ອມກັນນັ້ນ, ທ່ານຍັງໄດ້ສຶກສາອົບຮົມນັກສຶກສາ ເພື່ອໃຫ້ເຂົາເຈົ້າໄດ້ມີແນວຄິດອຸ່ນອ່ຽງທຸ່ນທ່ຽງ, ເອົາໃຈໃສ່ໃນການສຶກສາ, ຄົ້ນຄວ້າ, ຮ່ຳຮຽນໃຫ້ສຳເລັດຕາມລະ ດັບຄາດໝາຍດ້ວຍຄຸນນະ ພາບທີ່ດີອີກດ້ວຍ.

ຂ່າວ-ພາບ: ສະຖານທູດລາວທີ່ຮ່າໂນ້ຍ ສສ ຫວຽດນາມ.