ສະຖານີວິທະຍຸ ແລະ ໂທລະພາບກວາງຊີ ຂອງຈີນ ຮ່ວມກັບໂທລະພາບແຫ່ງຊາດລາວ ຈັດງານລ້ຽງຕ້ອນຮັບ ປີ ໃໝ່ສາກົນຂ້າມປະເທດ ພາຍໃຕ້ຫົວຂໍ້ “ຮ້ອງເພງຮ່ວມທົ່ວໂລກ, ດັງຕາມເສັ້ນທາງສາຍໄໝ” ໃນວັນທີ 31 ທັນວາ 2023 ທີ່ ຫໍວັດທະນະທຳແຫ່ງຊາດລາວ, ໂດຍການເຂົ້າຮ່ວມຂອງທ່ານ ໂພສີ ແກ້ວມະນີວົງ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ອຳຄາ ວົງໝື່ນກ້າ, ອຳນວຍການໃຫຍ່ໂທລະພາບແຫ່ງຊາດລາວ, ທ່ານ ນາງ ບົວໄຂເພັງພະຈັນ, ຫົວໜ້າກົມສິລະປະ ແລະ ວັດທະນະທໍາ, ຜູ້ຕາງໜ້າຈາກສະຖານທູດຈີນປະຈຳລາວ, ບໍລິສັດທາງລົດໄຟລາວ-ຈີນຈຳ ກັດ, ບໍລິສັດ ຊິນໂນ ໄຮໂດຼ ຈີນສາ ກົນ ຈຳກັດ, ສະພາການຄ້າກວາງຊີປະຈໍາລາວ ພ້ອມດ້ວຍຊາວນະຄອນຫຼວງວຽງຈັນ 400 ທ່ານ.
ໂອກາດນີ້ ທ່ານ ໂພສີ ແກ້ວມະນີວົງ ຊີ້ໃຫ້ເຫັນວ່າ: ລາວ-ຈີນ ເປັນປະເທດບ້ານໃກ້ເຮືອນຄຽງມີຊາຍແດນຕິດຈອດກັນດ້ວຍສາຍພູ ແລະ ແມ່ນໍ້າລໍາເຊ ປະຊາຊົນສອງຊາດມີສາຍພົວພັນມິດຕະພາບອັນເປັນມູນ ເຊື້ອ, ມີການພົວພັນ ແລະແລກປ່ຽນວັດທະນະທຳຊື່ງກັນ ແລະກັນຕະຫລອດມາ, ປັດຈຸ ບັນສອງປະ ເທດໄດ້ຍົກລະດັບການຮ່ວມມືຍຸດທະສາດຕາມທິດ 4 ດີ ເພື່ອແນໃສ່ເຮັດໃຫ້ຄູ່ຮ່ວມມືຊາຕາກຳລາວ-ຈີນໄດ້ເບັ່ງບານ ແລະເກີດດອກອອກຜົນ. ການຈັດງານລ້ຽງຕ້ອນຮັບປີໃໝ່ສາກົນຂ້າມປະເທດລາວ-ຈີນ ພາຍໃຕ້ຫົວຂໍ້ “ຮ້ອງເພງຮ່ວມທົ່ວໂລກ, ດັງຕາມເສັ້ນທາງສາຍໄໝຄັ້ງນີ້ ເປັນການເຊື່ອມໂຍງລະຫວ່າງສື່ມວນຊົນລາວ ແລະ ຈີນໃນການໂຄສະນາເຜີຍແຜ່ວັດທະນະທຳຂອງສອງປະ ເທດຜ່ານເສັ້ນທາງສາຍໄໝ ໃນຮູບແບບກົນໄກໃໝ່ທັນສະໄໝດ້ວຍການສະແດງສິນລະປະຮ່ວມກັນຂອງສອງຊາດລາວ-ຈີນ ຄຽງຄູ່ກັບການສ້າງຄວາມເບີກບານມ່ວນຊື່ນໃນໂອກາດສົ່ງທ້າຍປີເກົ່າ ແລະຕ້ອນຮັບປີໃໝ່ 2024 ໃຫ້ແກ່ປະຊາຊົນສອງຊາດລາວ-ຈີນຜ່ານສື່ໂທລະພາບແຫ່ງຊາດລາວ ແລະສະຖານີວິທະຍຸ ແລະໂທລະພາບກວາງຊີ ທັງເປັນການຊຸກຍູ້ສົ່ງເສີມຄວາມເຂົ້າໃຈລະຫວ່າງປະຊາຊົນສອງປະເທດໄດ້ຮຽນຮູ້ ແລະແລກປ່ຽນວັດທະນະທຳຢ່າງອຸດົມ ສົມບູນຫລາຍຂື້ນ ຊື່ງເປັນການຮັດ ແໜ້ນຄວາມສາມັກຄີ ມິດຕະພາບຂອງສື່ມວນຊົນລາວ ແລະຈີນໃຫ້ແໜ້ນແຟ້ນຍີ່ງຂື້ນ.
ສ່ວນ ທ່ານ ຟັນຍີ້ ຜູ້ອໍານວຍການສະຖານີວິທະຍຸ ແລະ ໂທລະພາບກວາງຊີ ໄດ້ກ່າວຜ່ານວິດິໂອວ່າ: ງານລ້ຽງຕ້ອນຮັບປີໃໝ່ຂ້າມປະເທດ ຄັ້ງນີ້ເປັນໂອກາດສໍາຄັນໃນການແລກປ່ຽນພົວພັນ ກົນໄກຮ່ວມມືໃໝ່, ເປີດກວ້າງກາລະໂອກາດໃໝ່ລະຫວ່າງສື່ມວນຊົນຈີນ ແລະລາວ ດ້ວຍຮູບແບບໃໝ່ ແລະ ການຮ່ວມມື ໃໝ່ ເພື່ອຊຸກຍູ້ສັນຕິພາບ ແລະ ການພັດທະນາຮ່ວມກັນ, ປະກອບສ່ວນສ້າງກຳລັງສື່ມວນຊົນສອງປະເທດໃຫ້ເຂັ້ມແຂງ ເພື່ອຮ່ວມກັນສ້າງສາປະຊາຄົມຊະຕາກໍາດຽວກັນ ຈີນ-ອາຊຽນຍິ່ງໃກ້ຊິດກວ່າເກົ່າ.
ທ່ານ ອຳຄາ ວົງໝື່ນກ້າ, ອຳນວຍການໃຫຍ່ໂທລະພາບແຫ່ງຊາດລາວກ່າວວ່າ: “ລາວ ແລະ ຈີນບໍ່ພຽງແຕ່ເປັນເພື່ອນມິດເທົ່ານັ້ນ, ຍັງເປັນປະຊາຄົມຮ່ວມຊະຕາກໍາດຽວກັນ, ຊົມເຊີຍຄວາມພະຍາຍາມຮ່ວມກັນ ຂອງໂທລະພາບແຫ່ງຊາດລາວ ກັບສະຖານີວຸທະຍຸແລະໂທລະພາບກວາງຊີ ທີ່ໄດ້ເພີ່ມທະວີຮ່ວມມືແລກ ປ່ຽນລະຫວ່າງສອງສະຖານີ, ເຮັດໃຫ້ມິດຕະພາບລະຫວ່າງປະຊາຊົນລາວ ແລະຈີນເລິກເຊິ່ງກວ່າເກົ່າ”.
ໃນງານຄັ້ງນີ້ຜູ້ເຂົ້າຮ່ວມໄດ້ຮັບຟັງການສະແດງສິລະປະດົນຕີປະຈຳຊາດ, ຟ້ອນພື້ນເມືອງຂອງລາວ ແລະ ເພງພື້ນເມືອງ, ດົນຕີທຽນຊິນ ແລະບົດເພງຈາກກວາງຊີ ຈາກນັກຮ້ອງ ແລະນັກສະແດງຂອງສອງປະເທດ, ຮັບຟັງການສໍາພາດຜູ້ຕາງໜ້າຈາກໂຄງການທາງລົດໄຟລາວ-ຈີນ ພາຍຫລັງເປີດການນໍາໃຊ້ເປັນຕົ້ນມາເນື່ອງຈາກໂຄງການນີ້ເປັນບາດກ້າວໃໝ່ ແລະສໍາຄັນໃນການພັດທະນາຂອງສອງປະເທດ.
