ສະຖານເອກອັກຄະລັດຖະທູດແຫ່ງ ສປປ ລາວ ທີ່ຮ່າໂນ້ຍ ສສ ຫວຽດນາມ ໄດ້ເປີດພິທີປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະສະພາປະຊາຊົນແຂວງ ຊຸດທີ IIຢ່າງເປັນທາງ ການ ໂດຍການເຂົ້າຮ່ວມ ຂອງ ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍ ພະນັກງານສະຖານທູດ ແລະ ຄອບຄົວ, ພະນັກງານຜູ້ຕາງໜ້າ ປ້ອງກັນຄວາມສະ ຫງົບ ແລະ ຫ້ອງການຜູ້ຕາງໜ້າການບິນລາວ ສາຂາຮ່າໂນ້ຍ ແລະ ພົນລະເມືອງລາວທີ່ດຳລົງຊີວິດຢູ່ຮ່າໂນ້ຍ ເຂົ້າຮ່ວມ 46 ທ່ານ.
ໃນພິທີເປີດການປ່ອນບັດເລືອກຕັ້ງສະມາ ຊິກສະພາແຫ່ງຊາດ ຊຸດທີ IX ແລະສະພາປະຊາຊົນແຂວງຊຸດທີ II ໃນຊຸດນີ້, ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງການເລືອກຕັ້ງໃນຊຸດນີ້ ຊຶ່ງຢູ່ໃນໄລຍະທ່າມກາງບັນຍາກາດທົ່ວພັກ-ລັດ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ ພວມສຸມໃສ່ຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ຜູ້ແທນທົ່ວປະເທດຂອງພັກ ຄັ້ງທີ XI ແລະສະພາປະຊາຊົນແຂວງຊຸດທີ II ຢ່າງເບີກບານມ່ວນຊື່ນ ແລະ ເປັນຂະບວນຟົດຟື້ນ ເພື່ອເສີມຂະຫຍາຍສິດປະຊາທິປະໄຕປະຊາຊົນ ເຂົ້າໃນການຄຸ້ມຄອງບໍລິຫານລັດ ແລະ ສ້າງເງື່ອນໄຂອຳນວຍຄວາມສະດວກດ້ານຕ່າງໆໃຫ້ພົນລະເມືອງລາວໄດ້ນຳໃຊ້ສິດປະຊາທິປະໄຕຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ເພື່ອເລືອກເອົາຕົວແທນແຫ່ງສິດ ແລະ ຜົນປະໂຫຍດອັນຊອບທຳຂອງປະຊາຊົນບັນດາເຜົ່າ ໃຫ້ສອດຄ່ອງກັບຄວາມມຸ່ງມາດປາດຖະໜາຂອງຜູ້ມີສິດປ່ອນເລືອກຕັ້ງ.
ເພື່ອເຮັດໃຫ້ການເລືອກຕັ້ງສະມາຊິດສະພາແຫ່ງຊາດ ຊຸດທີ IX ແລະສະພາປະຊາຊົນແຂວງຊຸດທີ II ໄດ້ຕາມຄາດໝາຍທີ່ວາງໄວ້ ທ່ານ ແສງເພັດ ຮຸ່ງບຸນຍວງ ໄດ້ຮຽກຮ້ອງມາຍັງຜູ້ມີສິດປ່ອນເລືອກຕັ້ງໄດ້ໃຊ້ສິດຂອງຕົນຢ່າງພ້ອມພຽງ, ລົງຄະແນນສຽງຢ່າງຖືກຕ້ອງຮ້ອຍສ່ວນຮ້ອຍ, ຮັບປະກັນຄວາມສະຫງົບຮ້ອຍສ່ວນຮ້ອຍ, ຄັດເລືອກເອົາສະມະຊິກສະພາແຫ່ງຊາດ ໃຫ້ໄດ້ຜູ້ມີຄວາມໜັກແໜ້ນດ້ານການເມືອງ, ມີຄຸນສົມບັດສິນທຳປະຕິວັດ ແລະ ມີຄວາມສາມາດໃນລະດັບອັນແນ່ນອນ ແນໃສ່ຍົກສູງປະສິດທິພາບ ຂອງການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າໃຫ້ສູງຂຶ້ນ.
ໂດຍອີງຕາມການຕົກລົງເຫັນດີຂອງຄະນະກຳມະການເລືອກຕັ້ງຂັ້ນນະຄອນຫຼວງວຽງຈັນ ຕົກລົງໃຫ້ໜ່ວຍປ່ອນບັດເລືອກຕັ້ງຢູ່ສຳນັກງານຜູ້ຕາງໜ້າແຫ່ງ ສປປ ລາວ ຢູ່ຕ່າງປະເທດ ທັງໝົດ 40 ແຫ່ງ ດຳເນີນປ່ອນບັດ ໃນວັນທີ 14 ກຸມພາ 2021, ອີງໃສ່ສະພາບຕົວຈິງ ແລະ ປະຕິບັດຕາມການປ້ອງກັນການລະບາດພະຍາດໂຄວິດ-19 ຢູ່ປະເທດເຈົ້າພາບ ໂດຍສະເພາະແມ່ນຢູ່ເຂດພາກເໜືອຂອງ ສສ ຫວຽດນາມ, ຊຶ່ງໃນຂອບເຂດຄວາມຮັບຜິດຊອບຂອງໜ່ວຍເລືອກຕັ້ງສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ຫວຽດນາມ ມີຜູ້ມີສິດປ່ອນບັດທັງໝົດ 8.217 ຄົນ, ຍິງ 3.253 ຄົນ ຊຶ່ງລວມມີພະນັກງານສະຖານທູດ ແລະ ຄອບຄົວ, ພະນັກງານຜູ້ຕາງໜ້າ ປ້ອງກັນຄວາມສະຫງົບ ແລະ ຫ້ອງການຜູ້ຕາງໜ້າການບິນລາວ ສາຂາຮ່າໂນ້ຍ ພ້ອມດ້ວຍ ນັກຄົ້ນຄວ້າ, ນັກສຶກສາລາວ, ຈາກບັນດາສະຖາບັນ ແລະ ມະຫາວິທະຍາໄລ ແລະ ພົນລະເມືອງລາວທີ່ພວມດຳລົງຊີວິດຢູ່ເຂດພາກເໜືອຂອງຫວຽດນາມ.
ການດຳເນີນການປ່ອນບັດ ແມ່ນໄດ້ດຳເນີນດ້ວຍ 3 ຊ່ອງທາງ ຄື: ຈັດການເລືອກຕັ້ງໂດຍກົງຢູ່ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ນະຄອນຫລວງຮ່າໂນ້ຍ, ຄະນະນັກສຶກສາຢູ່ແຕ່ລະໂຮງຮຽນ, ມະຫາວິທະຍາໄລ, ສະຖາບັນການສຶກສາ ເກັບກຳເອົາບັດທີ່ນັກສຶກສາເລືອກໄປສົ່ງໃຫ້ຄະນະຮັບຜິດຊອບໜ່ວຍປ່ອນບັດເລືອກຕັ້ງ ຫລື ພະນັກງານສະຖານທູດລົງໄປເກັບເອົາບັດເລືອກຕັ້ງຈາກນັກສຶກສາຢູ່ບາງໂຮງຮຽນ, ມະຫາວິທະຍາໄລ, ສະຖາບັນການສຶກສາ ແລະ ການຈັດສົ່ງບັດລົງຄະແນນສຽງຜ່ານທາງອີເມວມາຍັງສະຖານເອກອັກຄະລັດຖະທູດ ເພື່ອກວດນັບຄະແນນຢູ່ໜ່ວຍເລືອກຕັ້ງສະຖານທູດ ສປປ ລາວ ປະຈຳ ສສ ຫວຽດນາມ. ການດຳເນີນດ້ວຍສາມວິທີດັ່ງກ່າວນີ້ ແມ່ນເພື່ອຮັບປະກັນໃຫ້ພົນລະເມືອງລາວຜູ້ທີ່ມີສິດປ່ອນບັດເລືອກຕັ້ງ ໄດ້ປະຕິບັດພັນທະ ແລະ ສິດຂອງຕົນ, ທັງເປັນການປະຕິບັດມາດຕະການປ້ອງກັນ, ສະກັດກັ້ນ, ຄວບຄຸມການລະບາດຂອງເຊື້ອພະຍາດໂຄວິດ-19 ຂອງປະເທດເຈົ້າພາບ.
ຂ່າວ,ພາບ: ໂອລຳ
Loading...