ສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ຈັດຕັ້ງເຜີຍແຜ່, ເຊື່ອມຊຶມ ເອກະສານສຳຄັນຂອງພັກ, ຂອງລັດ

ວັນທີ 16 ກັນຍາ 2022, ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ສສ ຫວຽດນາມ ໄດ້ຈັດຕັ້ງການເຊື່ອມຊຶມເອກະສານສຳຄັນຂອງພັກ, ຂອງລັດ, ພາຍໃຕ້ການເປັນປະທານຂອງ ສະຫາຍ ຈັນທະພອນ ຄຳມະນີຈັນ, ກຳມະການຄະນະພັກຮາກຖານ, ປະທານກວດກາຄະນະພັກຮາກຖານ ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ສສ ຫວຽດນາມ ໂດຍການເຂົ້າຮ່ວມຮັບຟັງຂອງຄະນະພັກຮາກຖານຄະນະນຳສະຖານທູດ, ຫ້ອງການຜູ້ຕາງໜ້າກະຊວງປ້ອງກັນຄວາມສະຫງົບ ແລະ ຫ້ອງການຜູ້ຕາງໜ້າການບິນລາວ, ພະນັກງານ ແລະ ຄອບຄົວພະນັກງານສະຖານທູດ, ຄະນະໜ່ວຍພັກນັກສຶກສາທີ່ຮ່າໂນ້ຍຂຶ້ນກັບສະຖານທູດ ຈຳນວນ 55 ສະຫາຍ.

ເອກະສານທີ່ນຳມາເຜີຍແຜ່ຄັ້ງນີ້ ປະກອບມີ 4 ເອກະສານ ເຊັ່ນ: ວັນສ້າງລັດຖະທຳມະນູນແຫ່ງຊາດ ຄົບຮອບ 31 ປີ (15/08/1991-15/08/2022), ປະທານ ສຸພານຸວົງ ເປັນຄັນທຸງແຫ່ງການເຕົ້າໂຮມຄວາມສາມັກຄີຂອງປະຊາຊົນລາວບັນດາເຜົ່າ ເນື່ອງໃນໂອກາດວັນເກີດຂອງເພິ່ນ ຄົບຮອບ 113 ປີ (13/07/1909-13/07/2022), ສອງວັນປະຫວັດສາດ ລາວ – ຫວຽດນາມ ແລະ ດຳລັດວ່າດ້ວຍລົດລັດ, ສະບັບເລກທີ 599/ລບ, ລົງວັນທີ 29/09/2021.

ໃນການເຜີຍແຜ່ເອກະສານຄັ້ງນີ້, ນອກຈາກ ສະຫາຍ ໄດ້ຍົກໃຫ້ເຫັນເນື້ອໃນສຳຄັນຂອງແຕ່ລະເອກສານ, ສະຫາຍ ຍັງໄດ້ເນັ້ນໃຫ້ພະນັກງານນັກການທູດ, ພະນັກງານສະມາຊິກພັກທີ່ກຳລັງດຳລົງຊີວິດ, ເຮັດວຽກ ແລະ ຄົ້ນຄວ້າຮໍ່າຮຽນ ຢູ່ ສສ ຫວຽດນາມ ຈົ່ງພ້ອມກັນຄົ້ນຄວ້າໃຫ້ເຂົ້າໃຈ ແລະ ກຳໄດ້ບັນດາເຫດການ ການເມືອງທີ່ສຳຄັນຂອງພັກ, ຂອງຊາດ ລວມທັງເນື້ອໃນຈິດໃຈຂອງບັນດາເອກະສານທີ່ນໍາມາເຜີຍແຜ່ໃນຄັ້ງນີ້ ເພື່ອເປັນບ່ອນອີງໃນການຝຶກຝົນຫຼໍ່ຫຼອມ ແລະ ປະຕິບັດວຽກງານວິຊາສະເພາະຂອງຕົນ.

ຂ່າວ, ພາບ: ສະຖານທູດລາວທີ່ຮ່າໂນ້ຍ