ວັນທີ 07 ກຸມພາ 2021 , ສະຖານເອກອັກຄະລັດຖະທູດແຫ່ງ ສປປ ລາວ ທີ່ຮ່າໂນ້ຍ ສສ ຫວຽດນາມ ໄດ້ຈັດຕັ້ງການເຜີຍແຜ່-ເຊື່ອມຊືມມະຕິຂອງກົມການເມືອງສູນກາງພັກ ແລະ ເອກກະສານທີ່ສໍາຄັນກ່ຽວຂ້ອງກັບການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນ ຂັ້ນແຂວງ ຊຸດທີ II ຂອງໜ່ວຍເລືອກຕັ້ງສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ພາຍໃຕ້ການເປັນປະທານຂອງ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດ ຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ຊຶ່ງມີຄະນະນຳ, ພະນັກງານ, ຄອບຄົວພະນັກ ງານ ຂອງສະຖານທູດ ພ້ອມດ້ວຍ ຫ້ອງການຜູ້ ຕາງໜ້າປ້ອງກັນຄວາມສະຫງົບ ແລະ ຫ້ອງການຜູ້ຕາງໜ້າການບິນລາວ ປະຈຳນະຄອນຫຼວງຮ່າໂນ້ຍ ເຂົ້າຮ່ວມຈຳນວນ 40 ສະຫາຍ.
ໃນພິທີ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຂຶ້ນເຜີຍແຜ່ມະຕິຂອງກົມການເມືອງສູນກາງພັກ ແລະ ເອກກະສານກ່ຽວຂ້ອງກັບການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II, ລວມທັງໝົດ 3 ສະບັບ ເຊັ່ນ: ມະຕິວ່າດ້ວຍ ການເພີ່ມທະວີການຊີ້ນຳ-ນຳພາຂອງຄະນະພັກຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II, ເອກກະສານກ່ຽວກັບການເສີມຂະຫຍາຍສິດເປັນເຈົ້າຂອງປະຊາຊົນເຂົ້າໃນການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II, ເອກກະສານ ກ່ຽວກັບ ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ແລະເອກກະສານທີ່ກ່ຽວຂ້ອງຈຳນວນໜຶ່ງ.
ໃນການເຜີຍແຜ່ ສະຫາຍ ແສງເພັດ ຮຸ່ງບຸນຍວງ ໄດ້ເນັ້ນໃຫ້ພະນັກງານເຂົ້າໃຈໃນການບ່ອນບັດໃນການເລືອກຕັ້ງເອົາຜູ້ແທນໄປນັ່ງໃນສະພາ, ຮຽກຮ້ອງໃຫ້ພະນັກງານ ແລະ ພົນລະເມືອງລາວທີ່ມີສິດປ່ອນບັດເລືອກຕັ້ງຂອງໜ່ວຍເລືອກຕັ້ງສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ຮັບຮູ້ ແລະ ເຂົ້າໃຈ ເຫດການການເມືອງທີ່ສຳຄັນຂອງຊາດ, ເປັນການສືບຕໍ່ລະບົບການເມືອງຂອງປະເທດ ກໍ່ສ້າງລະບອບປະຊາທິປະໄຕ ໃຫ້ໜັກແໜ້ນເຂັ້ມແຂງ ແລະ ເໜັ້ນຢໍ້າໃຫ້ທຸກຄົນມີຄວາມຕື່ນຕົວໃນການໄປໃຊ້ສິດເລືອກຕັ້ງຂອງຕົນ ລວມທັງຮັບປະກັນບໍ່ໃຫ້ມີບັດຕາຍ ແລະ ຮັບປະກັນຄວາມປອດໄພໃຫ້ໄດ້ດີ.
ພ້ອມກັນນັ້ນ, ສະຫາຍ ຈັນທະພອນ ຄຳມະນີຈັນ, ທີ່ປຶກສາ, ຫົວໜ້າຫ້ອງການສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ສສ ຫວຽດນາມ ກໍຍັງໄດ້ແນະນຳກ່ຽວກັບ ວິທີການເລືອກເອົາຜູ້ແທນ ຕາມການແນະນຳຂອງຄະນະກຳມະການເລືອກຕັ້ງລະດັບຊາດ ກ່ຽວກັບການແຕ່ງຕັ້ງຄະນະກຳມະການເລືອກຕັ້ງ ແລະ ຄະນະຮັບຜິດຊອບໜ່ວຍປ່ອນບັດເລືອກຕັ້ງຂັ້ນທ້ອງຖິ່ນ ແລະ ສຳນັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ຕ່າງປະເທດ.ຈາກນັ້ນ, ກໍໄດ້ແຈ້ງຜົນການສຳຫຼວດ ແລະ ເກັບກໍາສະຖິຕິຜູ້ມີສິດປ່ອນບັດຂອງຄະນະຮັບຜິດຊອບຂອງໜ່ວຍເລືອກຕັ້ງສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ໃຫ້ທີ່ປະຊຸມໄດ້ຮັບຊາບ ຊຶ່ງໃນຂອບເຂດຄວາມຮັບຜິດຊອບຂອງໜ່ວຍເລືອກຕັ້ງສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ຫວຽດນາມ ມີຜູ້ມີສິດປ່ອນບັດທັງໝົດ 8165 ຄົນ ໃນນັ້ນມີເພດຍິງຈຳນວນ 3207 ຄົນ ໂດຍຈະໄດ້ຈັດຕັ້ງການປ່ອນບັດເລືອກຕັ້ງໃນວັນທີ 14 ກຸມພາ 2021 ຕາມການຊີ້ນໍາຂອງກະຊວງການຕ່າງປະເທດ ສປປ ລາວ ໃນຖານະເປັນຄົນຜູ້ຄຸ້ມຄອງພົນລະເມືອງລາວຢູ່ຕ່າງປະເທດ. ມາຮອດປັດຈຸບັນ, ສະຖານທູດໄດ້ແຈ້ງ ກ່ຽວກັບເວລາ ແລະ ສະຖານທີ່ ພ້ອມດ້ວຍວິທີການໃນການຈັດຕັ້ງປະຕິບັດໃຫ້ບັນດາອະນຸກຳມະການ ເພື່ອພ້ອມກັນນໍາໄປຈັດຕັ້ງປະຕິບັດຢ່າງຖືກຕ້ອງ.
ຂ່າວ, ພາບ: ໂອລຳ
Loading...