ສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ຈັດກອງປະຊຸມຮ່ວມກັບສື່ມວນຊົນ ກ່ຽວກັບ ວຽກງານໂຄສະນາ ການປຸກລະດົມຂົນຂວາຍຜູ້ບໍລິຈາກເລືອດ ແບບສະໝັກໃຈບໍ່ຮຽກຮ້ອງສິ່ງຕອບແທນ ຂຶ້ນໃນວັນທີ 27 ກັນຍາ 2024 ທີ່ສະຖາບັນເລືອດແຫ່ງຊາດ, ໂດຍການເປັນປະທານຮ່ວມຂອງ ທ່ານ ດຣ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ແລະ ທ່ານ ລັດອຸດອນ ສຸລິນທອງ ຮອງຫົວໜ້າຫ້ອງການ ກະຊວງຖະແຫລວງຂ່າວ, ວັດທະນະທຳ ແລະທ່ອງທ່ຽວ; ມີຜູ້ຕາງຫນ້າຈາກສື່ສິ່ງພິມ, ວິທະຍຸ ແລະ ໂທລະພາບ ເຂົ້າຮ່ວມ.
ທ່ານ ດຣ ຈັນທະລາ ສຸກສາຄອນ ກ່າວວ່າ: ຈຸດປະສົງຂອງກອງປະຊຸມແມ່ນເພື່ອສະຫຼຸບການເຄື່ອນໄຫວປຸກລະດົມຂົນຂວາຍຜູ້ບໍລິຈາກເລືອດ ປີຜ່ານມາ; ເພື່ອສັງເກດຕີລາຄາ ສະພາບຈຸດດີ, ຈຸດອ່ອນຄົງຄ້າງ ທີ່ຈະໄດ້ເອົາໃຈໃສ່ໃນຕໍ່ໜ້າ; ວາງແຜນການ ໃນການໂຄສະນາແບບມີສ່ວນຮ່ວມ ກັບບັນດາສື່ອອນລາຍຕ່າງໆເພື່ອໃຫ້ສັງຄົມໄດ້ມີຄວາມສົນໃຈ ແລະ ເຂົ້າໃຈໃນວຽກງານການບໍລິຈາກເລືອດແບບສະຫມັກໃຈ ບໍ່ຫວັງສິ່ງຕອບແທນ ເພື່ອຈະໄດ້ມີເລືອດພຽງພໍ, ປອດໄພ ແລະ ທັນເວລາ.
ສໍາລັບແຜນການຮັບບໍລິຈາກເລືອດໃນປີ 2024 ນີ້ ທົ່ວປະເທດ ຕ້ອງໃຫ້ບັນລຸ 78,000 ຖົງ ໃນນີ້ ຂັ້ນສູນກາງໃຫ້ໄດ້ 33,300 ຖົງ ແລະ ຂັ້ນທ້ອງຖິ່ນ 44,700 ຖົງ. ຜ່ານການຈັດຕັ້ງປະຕິບັດໃນ ເດືອນ 1-9/2024 , ທົ່ວປະເທດ ອອກຮັບບໍລິຈາກເລືອດທັງຫມົດ 1,155 ຄັ້ງ, ຮັບບໍລິຈາກເລືອດໄດ້ທັງຫມົດ 53,091 ຖົງ ໃນນີ້ ສູນກາງປະຕິບັດໄດ້ 27,038 ຖົງ ແລະ ທ້ອງຖິ່ນປະຕິບັດໄດ້ 26,053 ຖົງ. ສ່ວນແຜນຈຸດສຸມ (ເດືອນ 10-12/ 2024) ໃຫ້ໄດ້ 19,500 ຖົງ ໃນນີ້ ສູນກາງໃຫ້ໄດ້ 8,325 ຖົງ, ທ້ອງຖິ່ນໃຫ້ໄດ້ 11,175 ຖົງ.
ທີ່ມາ: ເສດຖະກິດ-ສັງຄົມ
