ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປີເກົ່າ ຄ.ສ 2023 ຫາກໍຜ່ານໄປ , ປີໃໝ່ ຄ.ສ 2024 ເຂົ້າມາແທນທີ່. ປີ 2023 ເປັນປີທີ່ມີເຫດການສຳຄັນຫຼາຍອັນທີ່ພົ້ນເດັ່ນ ເກີດຂື້ນທ່າມກາງສະພາບການໃນພາກພື້ນ ແລະ ສາກົນ ຜັນແປຢ່າງສັບສົນ ແລະ ເປັນໄລຍະກາງສະໄໝຂອງການຈັດຕັ້ງຜັນຂະຫຍາຍມະຕິ 11 ຂອງພັກ, ແຜນພັດທະ
ນາເສດຖະກິດສັງຄົມແຫ່ງຊາດ 5 ປີ ຄັ້ງທີ 9, ສະຫລຸບຜົນການຈັດຕັ້ງປະຕິບັດສອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໄລຍະ 3 ປີ ແຕ່ 2021 ຫາ 2023 ແລະ ເປັນປີເປີດປີທ່ອງທ່ຽວລາວ 2024.
ປີ 2023 ບັນດາຜູ້ນໍາພັກ – ລັດ ໄດ້ໄປເຄື່ອນໄຫວຢ້ຽມຢາມ ແລະ ເຂົ້າຮ່ວມກອງປະຊຸມສຳຄັນຢູ່ຕ່າງປະເທດຫລາຍສົມຄວນ ເຊັ່ນ: ກອງປະຊຸມໜຶ່ງແລວໜຶ່ງເສັ້ນທາງ ເພື່ອການຮ່ວມມືສາກົນຄັ້ງທີ 3 ທີ່ນະຄອນຫຼວງປັກກິ່ງ ສ ປ ຈີນ ພາຍໃຕ້ຫົວຂໍ້ ການຮ່ວມມືທີ່ມີຄຸນນະພາບສູງຂອບໜຶ່ງແລວໜຶ່ງເສັ້ນທາງ ຮ່ວມກັນເພື່ອພັດທະນາ ແລະ ຄວາມຈະເລີນຮຸ່ງເຮືອງຮ່ວມກັນ ໃນໂອກາດຄົບຮອບ 10 ປີ ຂອງຂໍ້ລິເລິ່ມໜຶ່ງແລວໜຶ່ງເສັ້ນທາງ, ລາວເຮົາເປັນເຈົ້າພາບຈັດກອງປະຊຸມສຸດຍອດລັດຖະສະພາກຳປູເຈຍ-ລາວ-ຫວຽດນາມຄັ້ງທີ 1, ນອກນີ້ ຜູ້ນຳຕ່າງປະເທດກໍໄດ້ມາຢ້ຽມຢາມລາວໂດຍສະເພາະປະທານປະເທດ ແລະ ນາຍົກລັດຖະມົນຕີຫວຽດນາມ, ນາຍົກລັດຖະມົນຕີໄທຄົນໃໝ່ ແລະເຫດການອື່ນໆອີກ.
ປີ 2023 ເປັນປີທີ່ລາວເຮົາມີຄວາມຫຍຸ້ງຍາກທາງດ້ານເສດຖະກິດ-ການເງິນ ຢ່າງໜັກໜ່ວງ ເນື່ອງຈາກຫຼາຍປັດໄຈທັງພາຍໃນ ແລະ ປັດໃຈພາຍນອກ, ສະຖານະການໂລກທີ່ສັບສົນເຊັ່ນ: ການປະຕິບັດການພິເສດທາງທະຫານຂອງຣັດເຊຍ ຕໍ່ອູແກຣນ, ການລົງໂທດຝ່າຍດຽວ ທາງດ້ານເສດ ຖະກິດຈາກປະເທດຕາເວັນຕົກ ແລະ ອາເມລິກາຕໍ່ຣັດເຊຍ, ລາຄາພະລັງງານສູງຂຶ້ນ ເຮັດໃຫ້ມີຜົນກະທົບຕໍ່ທົ່ວໂລກຢ່າງໜັກ. ລາວເຮົາກໍໄດ້ຮັບຜົນກະທົບໜັກເຊັ່ນ: ເກີດໄພເງິນເຟີ້, ອັດຕາແລກປ່ຽນຂຶ້ນສູງ, ເງິນກີບອ່ອນຄ່າ, ລາຄາສິນຄ້າ ແລະ ນໍ້າມັນແພງ ປະຊາຊົນເຮົາຍັງໄດ້ຮັບຜົນກະທົບໜັກສົມຄວນ ແລະ ຍັງແກ່ຍາວມາຮອດປັດຈຸບັນ. ເຖິງຢ່າງໃດກໍຕາມ ລັດຖະບານກໍບໍ່ໄດ້ລົດລະໃນຄວາມພະຍາຍາມຫາວິທີ ແລະ ໄດ້ອອກມາດຕະການແກ້ໄຂແຕ່ລະໄລຍະຢ່າງຮີບດ່ວນ ເຮັດໃຫ້ຜົນກະທົບເລີ່ມຜ່ອນ ຄາຍລົງແດ່ແລ້ວ ແລະ ອີກດ້ານໜື່ງແມ່ນດ້ວຍນໍ້າໃຈຮັກຊາດອັນສູງສົ່ງຂອງປະຊາຊົນລາວບັນດາເຜົ່າ ທີ່ໄດ້ຮ່ວມແຮງຮ່ວມໃຈພ້ອມກັນຜ່ານຜ່າວິກິດການຄັ້ງນີ້. ນອກນີ້ຍັງມີເຫດການໄພທຳມະຊາດ ນ້ຳຖ້ວມ ເກີດຂຶ້ນຢູ່ຫຼາຍເມືອງຂອງແຂວງພາກເໜືອ ແລະ ພາກກາງລວມມູນຄ່າເສຍຫາຍໃນ 12 ແຂວງຫຼາຍກວ່າ 1.037ຕື້ກີບ. ໃນນີ້ແຂວງໄດ້ຮັບຜົນກະທົບຫຼາຍກວ່າໝູ່ແມ່ນແຂວງບໍລິຄຳໄຊ, ຄຳມ່ວນແລະ ແຂວງສະຫວັນນະເຂດ.
ສຳລັບ ວິທະຍຸກະຈາຍສຽງແຫ່ງຊາດລາວ ຫຼື ເອີ້ນຫຍໍ້ວ່າ ວສລ ຕະຫຼອດປີ 2023 ໄດ້ຕັ້ງໜ້າຮັບ
ໃຊ້ ໃຫ້ຂໍ້ມູນຂ່າວສານທີ່ວ່ອງໄວທັນເຫດການທັງພາຍໃນ ແລະ ຕ່າງປະເທດ, ໃຫ້ສາລະຄວາມຮູ້ທີ່ເປັນປະໂຫຍດ ແລະ ຄວາມບັນເທີງທີ່ຫລາກຫຼາຍແກ່ທ່ານຜູ້ຟັງຢ່າງຫ້າວຫັນ, ພະນັກງານຂອງວິທະ
ຍຸກະຈາຍສຽງແຫ່ງຊາດລາວ 90 ກວ່າຄົນທັງຝ່າຍເຕັກນິກ ແລະ ເນື້້ອໃນ, ນັກຂ່າວ, ນັກຈັດລາຍການຂອງ 6 ຄື້ນ ຄື AM ຄື້ນກາງ ແລະ ຄື້ນສັ້ນ, FM 103,7MHz, 95 MHz, 97,3 MHz 94,3 MHz ແລະ 96 MHz ໄດ້ທຸ້ມເທເຮື່ອແຮງສະຕິປັນຍາ ຮັບໃຊ້ທ່ານຜູ້ຟັງທົ່ວປະເທດແຕ່ເໜືອຮອດໃຕ້ ແລະ ຜູ້ຟັງຢູ່ຕ່າງປະເທດ.
ເກືອບຕະຫຼອດ 24 ຊົ່ວໂມງ ແລະ ເພື່ອສືບຕໍ່ພັດທະນາການກະຈາຍສຽງໃຫ້ເຂົ້າເຖິງທ່ານຜູ້ຟັງໄດ້ຫຼາຍຊ່ອງທາງກວ່າເກົ່າ ນອກຈາກມີເວັບໄຊ www.lnr.org.la ທີ່ ສາມາດອ່ານເນື້ອໃນຂ່າວ-ບົດ, ຮູບພາບນິ້ງ ແລະ ວີດີໂອ ຟັງລາຍການພາສາລາວ, ພາສາມົ້ງ, ພາສາກຶມຫມຸ, ພາສາອັງກິດ, ພາສາຝຣັ່ງ, ພາສາຫວຽດນາມ, ພາສາຈີນ ແລະ ພາສາຂະແມ ໄດ້ຢ່າງຊັດເຈນໃນທົ່ວປະເທດ ແລະ ທົ່ວໂລກແລ້ວ. ທ່ານຜູ້ຟັງຍັງສາມາດເຂົ້າຟັງ ແລະ ເບິ່ງລາຍການຂອງ ວສລ ທາງ ຕິກຕ໋ອກ ແລະ ຢູທູບ ໄດ້ອີກ. ພວກເຮົາໄດ້ສືບຕໍ່່ຜະລິດ ແລະ ພັດທະນາຂ່າວທີ່ມີທັງພາບ ແລະ ສຽງອອກທາງເຟສບຸກ ທີ່ຊື່ວ່າ Lao National Radio ທີ່ໄດ້ຮັບການຕອບຮັບຈາກຜູ້ຊົມໃນລາວ ແລະ ຕ່າງປະເທດນັບມື້ນັບຫຼາຍຂຶ້ນ. ຫຼ້າສຸດໃນທ້າຍເດືອນທັນວາ 2023 ນີ້ ວສລ ກໍ່ໄດ້ຮັບການຊ່ວຍເຫຼືອປັບປຸງຫ້ອງອອກອາກາດອອນລາຍ ແລະ ລົດຖ່າຍທອດສົດທັງພາບ ແລະ ສຽງຈາກ ສ.ເກົາຫຼີ.
ຂໍຂອບໃຈ ສຳລັບການຍ້ອງຍໍຊົມເຊີຍ ແລະ ຕຳນິຕິຊົມ ຂອງທ່ານຜູ້ຟັງ, ຜູ້ຊົມ ທີ່ລ້ວນແຕ່ເປັນສິ່ງທີ່ປະເສີດສຳລັບການປັບປຸງເນື້ອໃນ ແລະ ຮູບແບບລາຍການໃຫ້ຮັບໃຊ້ທ່ານໃຫ້ດີກວ່າເກົ່າໃນປີ 2024 ນີ້ ເພາະເປັນປີທີ່ຈະມີເຫດການໃຫຍ່ໆຂອງຊາດຢ່າງຫຼວງຫຼາຍ. ສຳຄັນທີ່ສຸດແມ່ນການເປັນປະທານໝູນວຽນອາຊຽນ ແລະ ປີທ່ອງທ່ຽວລາວ. ຄະນະນຳ ແລະ ພະນັກງານທຸກຄົນຂອງວິທະຍຸກະຈາຍສຽງແຫ່ງຊາດລາວ ຫວັງວ່າ ໃນປີໃໝ່ 2024 ນີ້ ພວກເຮົາຈະໄດ້ຮັບການຮ່ວມມືຈາກການນຳພັກ-ລັດ ທັງສູນກາງ ແລະ ທ້ອງຖິ່ນ, ອຳນາດການປົກຄອງ, ນັກວິຊາການທຸກຂະແໜງ ວິທະຍຸກະຈາຍສຽງ, ລະບົບໂທລະໂຄ່ງ, ນັກຂ່າວທ້ອງຖິ່ນທຸກແຂວງ ແລະ ເມືອງ ເພື່ອນຮ່ວມງານທຸກທ່ານ ເພື່ອຊ່ວຍກັນໂຄສະນາ ການພັດທະນາເສດຖະກິດ-ສັງຄົມໃນປີ 2024 ແລະ ເຮັດພາລະບົດບາດເປັນກະບອກສຽງຂອງພັກ ແລະ ລັດຖະບານ, ເປັນເວທີສະແດງຄວາມຄິດຄວາມເຫັນຂອງປະຊາຊົນລາວບັນດາເຜົ່າໃຫ້ດີກວ່າປີ 2023 ທີ່ຜ່ານມາ.
ປີໃໝ່ ຄ.ສ 2024 ຂໍອວຍພອນໃຫ້ການນຳພັກ-ລັດ ແລະ ປະຊາຊົນລາວທຸກເຜົ່າແຕ່ເໜືອຮອດໃຕ້ ຈົ່ງມີຄວາມສຸກກາຍສະບາຍໃຈ ຮ່ວມແຮງຮ່ວມໃຈ, ສະຕິປັນຍາ ເພື່ອນຳພາປະເທດລາວຫຼຸດ
ພົ້ນຈາກຄວາມຫຍຸ້ງຍາກທາງດ້ານເສດຖະກິດໂດຍໄວ, ຊີວິດການເປັນຢູ່ຂອງປະຊາຊົນລາວນັບມື້ດີ ຂຶ້ນ ກວ່າປີ 2023 ຜ່ານມາ.
ໂຊກດີປີໃໝ່ 2024
Happy New Year