ໃນຕອນເຊົ້າຂອງວັນທີ 19 ສິງຫາ 2024 ນີ້. ສະພາທະນາຍ ຄວາມລາວ ໄດ້ຈັດພິທີຮັບສະມາຊິກສະພາທະນາຍຄວາມໃໝ່ ແລະ ທະນາຍຄວາມຝຶກຫັດ ປະຈໍາປີ 2024 ທີ່ຫ້ອງປະຊຸມຂອງສະຖາບັນຍຸຕິທໍາແຫ່ງຊາດ ໂດຍການເປັນປະທານຮ່ວມຂອງ ທ່ານ ຈອມຄໍາ ບຸບຜາລີວັນ ຫົວໜ້າກົມຄຸ້ມຄອງ ແລະ ສົ່ງເສີມວຽກງານຍຸຕິທໍາ ແລະ ທ່ານ ວໍລັດສະໝີ ສຸລິປະພັນ ປະທານສະພາທະນາຍຄວາມລາວ.
ໃນພິທີ ທ່ານ ສາຍສະໝອນ ສີອຸດົມພັນ ຄະນະປະຈຳ, ຫົວ ໜ້າຫ້ອງການ ສະພາທະນາຍຄວາມ ໄດ້ຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງຍຸຕິທຳ ວ່າດ້ວຍການແຕ່ງຕັ້ງທະນາຍຄວາມ ຈຳນວນ 32 ທ່ານ, ຍິງ 08 ທ່ານ ແລະ ຂໍ້ຕົກລົງຂອງປະທານສະພາທະນາຍຄວາມລາວວ່າດ້ວຍການຮັບເອົາທະນາຍ ຄວາມຝຶກຫັດ ຈໍານວນ 42 ທ່ານ, ຍິງ 21 ທ່ານ ທີ່ໄດ້ຕັ້ງໜ້າຄົ້ນຄ້ວາຍົກລະດັບ, ຝຶກຝົນຫຼໍ່ຫຼອມຕົນເອງ ມາໄລຍະໜຶ່ງ ແລະ ໄດ້ຜ່ານການຝຶກອົບຮົມວິຊາຊີບທະນາຍຄວາມ ພ້ອມທັງໄດ້ຜ່ານການລົງຝຶກງານຕົວຈິງ. ໃນພິທີກໍໄດ້ມີການມອບໃບແຕ່ງຕັ້ງເປັນທະນາຍຄວາມ ໃຫ້ກຽດມອບໂດຍ ທ່ານ ປອ ຈອມຄໍາ ບຸບຜາລີວັນ ຫົວໜ້າກົມຄຸ້ມຄອງ ແລະ ສົ່ງເສີມວຽກງານຍຸຕິທໍາ
ໃນໂອກາດດັ່ງກ່າວ ທ່ານ ປອ ຈອມຄໍາ ບຸບຜາລີວັນ ຫົວໜ້າກົມຄຸ້ມຄອງ ແລະ ສົ່ງເສີມວຽກງານຍຸຕິທໍາ ໄດ້ໃຫ້ກຽດໂອ້ລົມໂດຍໄດ້ເນັ້ນໜັກໃຫ້ທະນາຍຄວາມຊຸດໃໝ່ ແລະ ທະນາຍຄວາມຝຶກຫັດ ຕ້ອງເພີ່ມທະວີຄວາມເອົາໃຈໃສ່ໃນການຄົ້ນຄ້ວາຮ່ຳຮຽນ, ຝຶກຝົນຫຼໍ່ຫຼອມຕົນເອງຮອບດ້ານຕື່ມ. ໂດຍສະເພາະໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຈັນຍາບັນ-ຈັນຍາທຳ, ສືບຕໍ່ຄົ້ນຄ້ວາ, ເຊື່ອມຊຶມ, ກຳແໜ້ນແນວທາງຂອງພັກກ່ຽວກັບການດໍາເນີນຄະດີຕາມຂະບວນການຍຸຕິທໍາ.
ນອກຈາກນີ້, ທະນາຍຄວາມຕ້ອງເຮັດໜ້າທີ່ຊ່ວຍພາກລັດໃນການໂຄສະນາສຶກສາອົບຮົມກົດໝາຍໃຫ້ແກ່ພົນລະເມືອງ, ເຮັດ ໜ້າທີ່ເພື່ອປົກປ້ອງລູກຄວາມ ໄປຄຽງຄູ່ກັນນັ້ນ ຕ້ອງເຮັດໜ້າທີ່ໃນການໂຄສະນາເຜີຍແຜ່ສຶກສາອົບຮົມກົດໝາຍໃຫ້ຜູ້ກະທຳຜິດໄດ້ຮັບຮູ້, ເຂົ້າໃຈ ຕໍ່ການກະທໍາທີ່ເປັນອັນຕະລາຍຮ້າຍແຮງຂອງຕົນຕໍ່ສັງຄົມ ແລະ ອື່ນ
ຂ່າວ-ພາບ: ໄຊຍະສິດ
