ເນື່ອງຈາກຝົນຕົກໜັກໃນວັນທີ 23 ກັນຍາ 2024 ຕະຫຼອດເວັນຕະຫຼອດຄືນຈົນເຖິງຕອນເຊົ້າຂອງວັນທີ 24 ກັນຍາ 2024 ນີ້ໄດ້ສົ່ງຜົນໃຫ້ປະລິມານນ້ຳຝົນ ແລະ ແມ່ນ້ຳພຽງມີລະດັບນ້ຳສູງຂຶ້ນ ໄດ້ໄຫຼເຂົ້າຖ້ວມບ້ານເຮືອນ ໄຮ່ນາຮົ້ວສວນເສັ້ນທາງການສັນຈອນ ແລະ ທາງເຂົ້າບ້ານໜອງບົວ ເມືອງພຽງ ແຂວງໄຊຍະບູລີ ໂດຍສະເພາະ ແມ່ນເຂດບ່ອນຮາບພຽງ, ຈຸດຮັບນ້ຳຂອບເຂດທີ່ຕໍ່າ ສົ່ງຜົນເຮັດໃຫ້ສັດລ້ຽງ, ເຄຶ່ອງໃຊ້ສອຍ, ເຮືອນຊານບ້ານຊ່ອງ, ໄຮ່ນາຮົ້ວສວນ ແລະ ຖະໜົນຫົນທາງໄດ້ຮັບຄວາມເສຍຫາຍຈຳນວນໜຶ່ງ. ຕໍ່ກັບສະພາບການດັ່ງກ່າວທາງຄະນະພັກອຳນາດການປົກຄອງເມືອງ ພ້ອມດ້ວຍຄະນະສະເພາະກິດຕ້ານໄພພິບັດຂັ້ນເມືອງ ເຈົ້າໜ້າທີ່ ແລະ ພາກສ່ວນທີ່ກ່ຽວຂ້ອງໄດ້ລົງຕິດຕາມເຝົ້າລະວັງ ໃຫ້ການຊ່ວຍເຫຼືອຂົນຍ້າຍເຄື່ອງຂອງ ແລະ ສັດລ້ຽງອອກຈາກເຂດທີ່ໄດ້ຮັບຜົນກະທົບດັ່ງກ່າວ ໄປໄວ້ເຂດທີ່ປອດໄພພ້ອມທັງເກັບກຳຂໍ້ມູນເພື່ອໃຫ້ການຊ່ວຍເຫຼືອໃນເບື້ອງຕົ້ນ ຕໍ່ກັບສະພາບການດັ່ງກ່າວທາງຄະນະພັກອຳນາດການປົກຄອງເມືອງ ກໍ່ໄດ້ສະແດງຄວາມເປັນຫ່ວງເປັນໄຍ ແລະ ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງ ແລະ ປະຊາຊົນທີ່ຢູ່ໃນຂອບເຂດທີ່ມີຄວາມສ່ຽງທີ່ໄດ້ຮັບຜົນກະທົບ ຈົ່ງໄດ້ມີສະຕິພ້ອມກັນເຝົ້າລະວັງສະພາບການດັ່ງກ່າວເພື່ອຫຼີກລ່ຽງຜົນກະທົບຜົນເສຍຫາຍທີ່ຈະສົ່ງຜົນສະທ້ອນຕໍ່ຊີວິດ ແລະ ຊັບສິນຂອງຕົນໃຫ້ໄດ້ຮັບຜົນກະທົບໜ້ອຍທີ່ສຸດ.
ຂ່າວໂດຍ: ວົງສະຫວັນ ສຸທິໂວຫານ
