ບັນຫາອຸບັດເຫດ ຕາມທ້ອງຖະໜົນໄດ້ເປັນປະກົດການຫຍໍ້ທໍ້ໜຶ່ງ ທີ່ສ້າງຄວາມເສຍຫາຍທາງດ້ານຊີວິດ ແລະ ຊັບສິນ ຂອງພົນລະເມືອງ ກໍ່ຄືຂອງສ່ວນລວມເປັນຈຳນວນຫຼວງຫຼາຍ ແລະ ກໍ່ມີທ່າອ່ຽງເພີ່ມຂຶ້ນເລື່ອຍໆ 6 ເດືອນຕົ້ນປີ 2024 ຢູ່ເມືອງຊຽງຮ່ອນ ແຂວງໄຊຍະບູລີ ມີການສູນເສຍຍ້ອນອຸບັດເຫດຕາມທ້ອງຖະໜົນຫຼາຍສົມຄວນ. ອີງຕາມຂໍ້ມູນຈາກ ກອງຈະລາຈອນ ພະແນກຕຳຫຼວດ ກອງບັນຊາການ ປກສ ເມືອງຊຽງຮ່ອນໃຫ້ຮູ້ວ່າ: ອຸບັດເຫດຕາມທ້ອງຖະໜົນ 6 ເດືອນຕົ້ນປີ 2024 ຜ່ານມາ ທົ່ວເມືອງມີອຸບັດຕິເຫດເກີດຂຶ້ນທັງໝົດ 8 ກໍລະນີ ມີຜູ້ໄດ້ຮັບຜົນເສຍຫາຍ 29 ຄົນ ຍິງ 3 ຄົນ ແລະ ມີຜູ້ໄດ້ຮັບບາດເຈັບ ແລະ ມີຜູ້ເສຍຊີວິດລວມທັງໝົດ 23 ຍິງ 1 ຄົນ ມີຜູ້ໄດ້ຮັບບາດເຈັບເລັກນ້ອຍ 8 ຄົນ ໄດ້ຮັບບາດເຈັບສາຫັດ 4 ຄົນ, ໄດ້ຮັບບາດສົມຄວນ 7 ຄົນ ຍິງ 1 ຄົນ ແລະ ເສຍຊີວິດ 4 ຄົນ. ມີພາຫະນະເປ່ເພທັງໝົດ 17 ຄັນ ພະຫະນະເປ່ເພສົມຄວນ 9 ຄັນ, ພາຫະນະເປ່ເພເລັກນ້ອຍ 8 ຄັນ ໄດ້ສ້າງຄວາມເສຍຫາຍຕໍ່ຊີວິດ ແລະ ຊັບສິນຫຼາຍກວ່າ 200 ລ້ານກີບ.
ສາເຫດທີ່ພາໃຫ້ເກີດອຸບັດເຫດຫຼັກໆ ແມ່ນຍ້ອນການດື່ມສິ່ງມຶນເມົາແລ້ວຂັບຂີ່, ຂັບຂີ່ລົດໄວ, ສະພາບເຕັກນິກລົດບໍ່ຮັບປະກັນ ແລະ ບໍ່ປະຕິບັດກົດລະບຽບຂອງການສັນຈອນ ພາຫະນະທີ່ເກີດອຸບັດເຫດສ່ວນຫຼາຍແມ່ນ ລົດຈັກຕຳກັບລົດໃຫຍ່ ຮອງລົງມາແມ່ນລົດຈັກຕຳລົດຈັກ ແລະ ເກີດອຸບັດເຫດເອງ. ສຳລັບອາຍຸຜູ້ເກີດອຸບັດເຫດ ສ່ວນຫຼາຍແມ່ນຢູ່ໃນເກນອາຍຸ 18-45 ປີ. ເພື່ອພ້ອມກັນເຮັດໃຫ້ຄວາມເສຍຫາຍ ແລະ ການເສຍຊີວິດ ຍ້ອນອຸບັດເຫດຫຼຸດລົງ ພວກເຮົາຕ້ອງໄດ້ປະຕິບັດກົດລະບຽບການສັນຈອນ ແລະ ພ້ອມກັນປະຕິບັດຢ່າງເຂັ້ມງວດ, ຢ່າປະມາດ, ມີສະຕິ, ໃຫ້ກຽດເຊິ່ງກັນ ແລະ ກັນ ໃນເວລາຂັບຂີ່ ບັນຫາສຳຄັນ ຜູ້ປົກຄອງຕ້ອງໄດ້ສຶກສາອົບຮົມລູກຫຼານ ຂອງຕົນກ່ຽວກັບມາລະຍາດໃນການສັນຈອນຢ່າງເຂັ້ມງວດ ອຸບັດເຫດເກີດຂຶ້ນໄດ້ທຸກເມື່ອຖ້າປະມາດ ຂາດສະຕິ, ເມື່ອເກີດແລ້ວທຸກຢ່າງແມ່ນເອົາຄືນບໍ່ໄດ້ມີແຕ່ຄວາມສູນເສຍເທົ່ານັ້ນ.
ຂ່າວ: ດອນ ຂຽວພະນາ
