ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະພາບ ດ້ານເສດຖະກິດມະຫາພາກ ຂອງແຂວງອຸດົມໄຊ ປະຈຳປີ 2018

ການຈັດຕັ້ງປະຕິບັດແຜນພັດທະນາເສດຖະກິດ ສັງຄົມຂອງແຂວງອຸດົມໄຊ ໃນໄລ ຍະ 1 ປີຜ່ານມາ ເຫັນມີບາດກ້າວຂະຫຍາຍຕົວ ຢ່າງຕໍ່ເນື່ອງ, ມີຄວາມສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ເປັນລະບຽບຮຽບຮ້ອຍທາງສັງຄົມ ເປັນປັດໃຈພື້ນຖານທີ່ອຳນວຍຄວາມສະດວກໃຫ້ແກ່ການພັດທະນາ, ປະຊາຊົນລາວບັນດາ ເຜົ່າມີຄວາມເຊື່ອຫມັ້ນຕໍ່ແນວທາງນະໂຍບາຍ ແລະ ການນໍາພາຂອງພັກ, ຕັ້ງໜ້າປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາ ຢ່າງເປັນຂະບວນຟົດຟື້ນ.

ອີງຕາມແຜນພັດທະນາເສດຖະກິດ ສັງຄົມ ປະຈຳປີ 2019 ຂອງແຂວງອຸດົມໄຊ ໂດຍລວມແລ້ວເຫັນວ່າ ດ້ານເສດຖະກິດມະຫາພາກຂອງແຂວງອຸດົມໄຊ ມີການຂະ ຫຍາຍຕົວ ໂດຍສະເພາະແມ່ນການເຕີບໂຕຂອງເສດຖະກິດ ທີ່ຍັງສືບຕໍ່ຂະຫຍາຍຕົວຢູ່ໃນລະດັບ 7,23% ທຽບໃສ່ມະຕິທີ່ສະພາຮັບຮອງແມ່ນ 7,70%,ຫຼຸດຄາດຫມາຍເລັກຫນ້ອຍ, ລວມຍອດຜະລິດຕະພັນພາຍໃນ ຫຼື ຈີດີພີ ບັນລຸ 3.773,02 ຕື້ກີບ ເທົ່າກັບ 443,88 ລ້ານໂດລາສະຫະລັດ ສະເລ່ຍຕໍ່ຫົວຄົນໄດ້ 1.388 ໂຄລາສະຫະລັດ. ໃນນັ້ນ ຂະແໜງ ກະສິກຳ ແລະ ປ່າໄມ້ ຂະຫຍາຍຕົວ 6,95%,ອຸດສາຫະກຳ ຂະຫຍາຍຕົວ 3,07%,ຂະແໜງບໍລິການ 12,31% ແລະ ພາສີອາກອນຜະລິດຕະພັນ ແລະ ຂາເຂົ້າຂະຫຍາຍຕົວ7,92%, ດັດຊະນີລາຄາການຊົມໃຊ້ ແລະ ອັດຕາເງິນເຟີ້ ສະເລ່ຍຢູ່ໃນລະດັບ0,57% ລວມແລ້ວມີການປ່ຽນແປງ ຍ້ອນລາຄາສິນຄ້າບາງຫມວດປ່ຽນແປງ ເປັນຕົ້ນແມ່ນ ເຄື່ອງນຸ່ງຫົ່ມ, ທີ່ພັກອາໄສ, ໄຟຟ້າ, ນໍ້າປະປາ, ເຄື່ອງໃຊ້ໃນຄົວເຮືອນ,ຮັກສາສຸຂະພາບ ແລະຢາ, ຄົມມະນາຄົມ ແລະ ຂົນສົ່ງ ແລະ ອື່ນໆ, ການປະຕິບັດລາຍຮັບ ລາຍຈ່າຍງົບປະມານແຫ່ງລັດ ສາມາດຈັດເກັບລາຍຮັບໄດ້ທັງຫມົດ 143.138,17 ລ້ານກີບ( 143 ກວ່າຕື້ກີບ )ປະຕິບັດໄດ້ລື່ນແຜນ 4,16%,ການຄຸ້ມຄອງລາຍຈ່າຍປະຕິບັດໄດ້ 424.473,21 ລ້ານກີບ ( 424 ກວ່າຕື້ກີບ ) ເທົ່າກັບ 97,912%ຂອງແຜນການ, ສະພາບການລົງທຶນ ໂດຍລວມທົ່ວສັງຄົມ ປະຕິບັດໄດ້ 1.436.858,23 ລ້ານກີບ( 1 ພັນ 400 ກວ່າຕື້ ) ປະຕິບັດໄດ້ລື່ນແຜນ 17,5%.

 

 

 

 

 

 

ສ່ວນຄາດຫມາຍສູ້ຊົນໃນປີ 2019ນີ້ ຕ້ອງສ້າງມູນຄ່າຜະລິດຕະພັນພາຍໃນໃຫ້ບັນລຸ 4.063,5 ຕື້ກີບ ສະເລ່ຍຕໍ່ຫົວຄົນໃຫ້ບັນລຸ 1.501,02 ໂດລາສະຫະລັດ, ຈັດເກັບລາຍຮັບເຂົ້າງົບປະມານຂອງແຂວງໃຫ້ໄດ້ 129 ຕື້ກວ່າກີບ, ຄຸ້ມຄອງລາຍຈ່າຍໃຫ້ຢູ່ໃນລະດັບບໍ່ເກີນ 440 ກວ່າຕື້ກີບ.