ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສະພາປະຊາຊົນແຂວງຫຼວງພະບາງ ຊຸດທີ I ໄຂກອງປະຊຸມສະໄໝສາມັນເທື່ອທີ 9 ຢ່າງເປັນທາງການ

ກອງປະຊຸມສະໄໝສາມັນເທື່ອທີ 9 ຂອງສະພາປະຊາຊົນແຂວງຫຼວງພະບາງ ຊຸດທີ I ໄດ້ໄຂຂຶ້ນຢ່າງເປັນທາງການ ໃນວັນທີ່ 30 ກໍລະກົດນີ້ ຢູ່ຫ້ອງປະຊຸມໃຫຍ່ ຫ້ອງວ່າການປົກຄອງແຂວງ ໂດຍເປັນປະທານຂອງ ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ປະທານສະພາປະຊາຊົາແຂວງ ພ້ອມດ້ວຍຄະນະ, ມີ ທ່ານ ຄຳຂັນ ຈັນທະວີສຸກ ກຳມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ, ພ້ອມດ້ວຍສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ການນຳຂອງພະແນກການກົມກອງຂອງແຂວງ ແລະແຂກຮັບເຊີນເຂົ້າຮ່ວມ. ທ່ານ ສາຍສະໝອນ ຄົມທະວົງ ໄດ້ກ່າວໄຂກອງປະຊຸມວ່າ: ກອງປະຊຸມຄັ້ງນີ້ ຈະໄດ້ຮັບຟັງ ການລາຍງານກ່ຽວກັບ ການຈັດຕັ້ງປະຕິບັດວຽກງານຮອບດ້ານ ຂອງອົງການປົກຄອງແຂວງ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020 ການສະເໜີດັດປັບເນື້ອໃນ ແຜນພັດທະນາເສດຖະກິດ-ສັງຄົມ ແລະການດັດແກ້ຕົວເລກລາຍຮັບ-ລາຍຈ່າຍລວມ ຈາກທ່ານເຈົ້າແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020 ຈາກຫົວໜ້າພະແນກແຜນການ ແລະ ການລົງທືນແຂວງ, ຮັບຟັງການລາຍງານກ່ຽວກັບ ການຈັດຕັ້ງປະຕິບັດ ແຜນງົບປະມານ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2020 ຈາກຫົວໜ້າພະແນກການເງີນແຂວງ, ຮັບຟັງການຊີ້ແຈງຈາກ ຫົວໜ້າພະແນກກະສິກຳ ແລະ ປ່າໄມ້ແຂວງ ກ່ຽວກັບ ການປະຕິບັດແຜນການຜະລິດສະບຽງອາຫານ ເພື່ອບໍລິໂພກ ແລະກາຍເປັນສີນຄ້າສົ່ງອອກ ຕິດພັນກັບ ການພັດທະນາຊົນນະບົດ ແລະແກ້ໄຂຄວາມທຸກຍາກ ຕາມມະຕິຂອງສະພາປະຊາຊົນແຂວງຮັບຮອງ, ຮັບຟັງການຊີ້ແຈງຈາກຫົວໜ້າພະແນກ ແຮງງານ ແລະ ສະຫວັດດີການ-ສັງຄົມແຂວງ ກ່ຽວກັບການແກ້ໄຂ ຄົນຫວ່າງງານຢູ່ພາຍໃນ ແລະກັບຈາກຕ່າງປະເທດ ຍ້ອນການລະບາດຂອງພະຍາດໂຄວິດ 19 ຢູ່ແຂວງຫຼວງພະບາງ ແລະແຜນການແກ້ໄຂໄພພິບັດທາງທຳມະຊາດ, ຮັບຟັງການລາຍງານກ່ຽວກັບ ການປ່ອຍເງີນກູ້ ໃຫ້ແກ່ຫົວໜ່ວຍທຸລະກິດຂະໜາດນ້ອຍ ແລະຂະໜາດກາງ (SME) ຈາກທ່ານຫົວໜ້າທະນາຄານ ແຫ່ງ ສປປ ລາວ ສາຂາພາກເໜືອ ແຂວງຫຼວງພະບາງ ແລະຮັບຟັງການລາຍງານ ການເຄື່ອນໄຫວວຽກງານ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍປີ 2020 ຈາກຄະນະປະຈຳສະພາປະຊາຊົນແຂວງ. ໃນລະຫວ່າງການດຳເນີນກອງປະຊຸມ ຕາມກຳນົດ 2 ວັນ ຈະມີການຊີ້ແຈງເພີ່ມເຕີມຂອງພາກສ່ວນກ່ຽວຂ້ອງ ຕໍ່ຂໍ້ຊັກຖາມຂອງສະມາຊິກສະພາປະຊາຊົນແຂວງ, ທັງຈະເປີດໂອກາດທີ່ດີໃຫ້ປະຊາຊົນຜູ້ມີສິດເລືອກຕັ້ງ ສະເໜີຄຳເຫັນອັນເປັນປະໂຫຍດ ຕໍ່ກອງປະຊຸມຜ່ານໂທລະສັບສາຍດ່ວນ ໝາຍເລກ 071 156. ໂອກາດນີ້ ຂໍຮຽກຮ້ອງໃຫ້ພະນັກງານ ທະຫານ ຕໍ່າຫຼວດ ແລະປະຊາຊົນບັນດາເຜົ່າ ຈົ່ງພ້ອມກັນຕິດຕາມ ແລະໃຫ້ການສະໜັບສະໜູນ ເພື່ອເຮັດໃຫ້ ກອງປະຊຸມສະໄໝສາມັນເທື່ອທີ່ 9 ຂອງສະພາປະຊາຊົນແຂວງຫຼວງພະບາງຊຸດທີ່ I ໄດ້ຮັບຜົນສຳເລັດຕາມຈຸດປະສົງ ແລະລະດັບຄາດໝາຍທີີ່ວາງໄວ້ ທຸກປະການ.

ຂ່າວ,​ພາບ: ອາພຸດເດດ ບຸບຜາ