ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສະພາປະຊາຊົນແຂວງຫຼວງພະບາງຊຸດທີ່ I ໄຂກອງປະຊຸມສະໄໝສາມັນເທື່ອທີ່ 8

ໃນຕອນເຊົ້າມື້ນີ້ ວັນທີ່ 4 ກຸມພາ 2020, ສະພາປະຊາຊົນແຂວງຫຼວງພະບາງ ຊຸດທີ I ໄດ້ເປີດກອງປະຊຸມສະໄໝສາມັນ ເທື່ອທີ 8 ຂຶ້ນຢ່າງເປັນທາງການ, ພາຍໃຕ້ການເປັນປະທານຂອງທ່ານ ສາຍສະໝອນ ຄົມທະວົງ, ຮອງເລຂາອົງຄະນະພັກແຂວງ ແລະ ປະທານສະພາປະຊາຊົນແຂວງ, ໂດຍມີທ່ານນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດໃຫ້ກຽດເຂົ້າຮ່ວມ, ພ້ອມດ້ວຍບັນດາສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 6 ແຂວງຫຼວງພະບາງ, ທ່ານ ຄຳຂັນ ຈັນທະວີສຸກ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຫຼວງພະບາງ, ລວມທັງ ບັນດາສະ​ມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ອາດິດສະມາຊິກສະພາແຫ່ງຊາດ, ອາ​ດິິດ​ການນຳຂອງແຂວງ ແລະ ຫົວໜ້າພະແນກການ-ກົມກອງອ້ອມຂ້າງແຂວງ.
ໃນໂອກາດນີ້, ທ່ານ ສາຍສະໝອນ ຄົມທະວົງ ໄດ້ກ່າວເປີດກອງປະຊຸມວ່າ: ໃນປີຜ່ານມາ, ແຂວງຫຼວງພະບາງໄດ້ຮັບຜົນກະທົບທາງດ້ານເສດຖະກິດ-ສັງຄົມ ຫຼາຍດ້ານ ແຕ່ອົງການປົກຄອງທຸກຂັ້ນ ແລະ ປະຊາຊົນບັນດາເຜົ່າ ພາຍ​ໃນແຂວງໄດ້ສຸມໃສ່ປະຕິບັດແຜນພັດທະນາເສດ​ຖະກິດ-ສັງຄົມ ກໍ່ຄື ມະຕິກອງປະຊຸມສະໄໝສາມັນເທື່ອທີ່ 6 ແລະ 7 ຂອງສະພາປະຊາຊົນແຂວງ ເຊີ່ງໄດ້ຮັບຜົນສຳເລັດຫຼາຍດ້ານ ອັນເປັນພື້ນຖານເຮັດໃຫ້ເສດຖະກິດມີການຂະຫຍາຍຕົວຕໍ່ເນື່ອງໃນລະດັບ 7,7%.
ໃນລະຫວ່າງການດຳເນີນກອງປະຊຸມຄັ້ງນີ້ ຈະໄດ້ມີການຄົ້ນຄວ້າ ແລະ ຮັບຮອງເອົາບັນຫາສຳຄັນຂອງແຂວງຫຼາຍດ້ານ, ໂດຍໃນກອງປະຊຸມຄັ້ງນີ້ ຈະດຳເນີນເປັນເວລາ 3 ວັນ, ນັບແຕ່ວັນທີ່ 4 ຫາ 6 ກຸມພາ, ໃນນັ້ນ ຈະຮັບຟັງການ​ລາຍງານໂດຍສັງເຂບ, ກ່ຽວກັບການບໍລິຫານວຽກງານຂອງອົງການປົກຄອງແຂວງ ປະຈໍາປີ 2019 ແລະ ທິດທາງແຜນການປີ 2020 ຈາກທ່ານເຈົ້າແຂວງ, ຮັບຟັງການລາຍງານກ່ຽວກັບການຈັດຕັ້ງປະຕິປະບັດແຜນພັດທະນາເສດຖະກິດ-ສັງຄົມ ຂອງແຂວງຫຼວງພະບາງ ປະຈຳປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າພະແນກແຜນການ ແລະ ການລົງທຶນແຂວງ, ຮັບຟັງການລາຍງານ ກ່ຽວກັບການຈັດຕັ້ງປະຕິບັດແຜນງົບປະມານ ຂອງແຂວງຫຼວງພະບາງ ປະຈໍາປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າພະແນກການເງິນແຂວງ, ຮັບຟັງການລາຍງານກ່ຽວກັບການເຄື່ອນ​ໄຫວວຽກງານກວດສອບ ປະຈຳປີ 2019, ທິດທາງແຜນການ ປີ 2020 ແລະ ບົດສະຫຼຸບຂາດຕົວການຈັດຕັ້ງປະຕິບັດງົບປະມານ ປະຈຳປີ 2018 ຈາກປະທານອົງການກວດສອບປະຈຳພາກເໜືອ, ຮັບຟັງການລາຍງານກ່ຽວກັບການຈັດຕັ້ງປະຕິບັດການແກ້ໄຂຜົນການກວດສອບ ຈາກປະທານອົງການກວດກາລັດແຂວງ.


ນອກຈາກນີ້, ກອງປະຊຸມຍັງຈະໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດການສົ່ງເສີມການປູກພືດສະບຽງອາຫານໃຫ້ກາຍເປັນສິນຄ້າ, ຮັບຟັງການລາຍງານກ່ຽວກັບການຈັດຕັ້ງປະຕິບັດມະຕິວ່າດ້ວຍການຄຸ້ມຄອງລາຄາສິນຄ້າປະເພດເຄື່ອງບໍລິໂພກ, ຮັບຟັງການລາຍງານກ່ຽວກັບການຈັດສັນທີ່ຢູ່ອາໄສ, ອາຊີບຄົງທີ່ ແລະ ການຊົດເຊີຍຕ່າງໆ ໃຫ້ປະຊາຊົນທີ່ຖືກຜົນກະທົບຈາກໂຄງການພັດທະນາຕ່າງໆ ຈາກທ່ານຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ຮັບຟັງການລາຍງານກ່ຽວກັບການຈັດຕັ້ງປະຕິບັດມະຕິກອງປະຊຸມຂອງສະພາປະຊາຊົນແຂວງ ວ່າດ້ວຍການຄຸ້ມຄອງ ຄວາມເປັນລະບຽບຮຽບຮ້ອຍຢູ່ນະຄອນຫຼວງພະບາງ ຈາກເຈົ້ານະຄອນຫຼວງພະບາງ, ຮັບຟັງການລາຍງານກ່ຽວກັບຜົນການຈັດຕັ້ງປະຕິບັດການແກ້ໄຂບັນຫາອັດຕາປະລະຂອງນັກຮຽນມັດທະຍົມຕອນຕົ້ນ-ຕອນປາຍ ປີ 2019 ແລະ ຍົກສູງຄຸນນະພາບການສຶກສາແຕ່ລະຊັ້ນຮຽນ ປີ 2020 ຈາກຫົວໜ້າພະແນກສຶກສາທິການ ແລະ ກິລາແຂວງ.
ອີງຕາມວາລະຂອງກອງປະຊຸມ, ບັນດາຜູ້ແທນຍັງຈະໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດການຄຸ້ມຄອງຄົນເຂົ້າ-ອອກເມືອງ ຂອງຄົນຕ່າງປະເທດ ພາຍໃນແຂວງຫຼວງພະບາງ ປະຈຳປີ 2019 ແລະ ທິດທາງແຜນການ ປີ 2020 ຈາກທ່ານຫົວໜ້າກອງບັນຊາການປ້ອງກັນຄວາມສະຫງົບແຂວງ, ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2019 ແລະ ທິດທາງແຜນການ ປີ 2020 ຂອງອົງການໄອຍະການປະຊາຊົນແຂວງ ຈາກທ່ານຫົວໜ້າອົງການໄອຍະການປະຊາຊົນແຂວງ, ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2019 ແລະ ທິດທາງແຜນການ ປີ 2020 ຂອງສານປະຊາຊົນແຂວງ ຈາກປະທານສານປະຊາຊົນແຂວງ, ຮັບຟັງການລາຍງານການເຄື່ອນໄຫວວຽກງານ ປະຈໍາປີ 2019 ແລະ ທິດທາງແຜນການ ປີ 2020 ຂອງຄະນະປະຈຳສະພາປະຊາຊົນແຂວງ. ພ້ອມກັນນີ້, ໃນກອງປະຊຸມ ຍັງຈະມີການປະກອບຄຳເຫັນຈາກຫຼາຍພາກສ່ວນ ລວມທັງ ຈະມີການພິຈາລະນາ ແລະ ຮັບຮອງເອົາການສະເໜີແຕ່ງຕັ້ງບຸກຄະລາກອນຂອງແຂວງ ຈຳນວນໜື່ງ, ແລະ ຈະມີການຮັບຟັງ ແລະ ຊີ້ແຈງຂອງບັນດາພະແນກການ ຕໍ່ຂໍ້ຊັກຖາມຂອງສະມາຊິກສະພາປະຊາຊົນແຂວງຕື່ມອີກ.

ຂ່າວ: ອາພຸດເດດ ບຸບຜາ