ພິທີພົບປະລະຫວ່າງຄະນະຜູ້ແທນສະພາປະຊາຊົນແຂວງ (ສພຂ) ອຸດົມໄຊ ແຫ່ງ ສປປລາວ ແລະ ຄະນະຜູ້ແທນປະຊາຊົນແຂວງດຽນບຽນ ແຫ່ງ ສສຫວຽດນາມ ໄດ້ຈັດຂຶ້ນໃນວັນທີ 8 ສິງຫາ 2024 ນີ້ ທີ່ ແຂວງອຸດົມໄຊ, ຄະນະຜູ້ແທນ ສະພາປະຊາຊົນ ແຂວງອຸດົມໄຊ ນໍາໂດຍ ສະຫາຍ ຄໍາດີ ວົງລ້ອມ ປະທານສະພາປະຊາຊົນແຂວງອຸດົມໄຊ ພ້ອມດ້ວຍ ຄະນະ, ແຂວງດຽນບຽນ ນໍາໂດຍ ສະຫາຍ ວໍ ວັນ ເຟື່ອງ ປະທານສະພາປະຊາຊົນ ແຂວງດຽນບຽນ ແຫ່ງ ສສ ຫວຽດນາມ ພ້ອມດ້ວຍຄະນະ.
ການພົບປະຄັ້ງນີ້ ໄດ້ຮັບຟັງການລາຍງານສະພາບການຕັດຕັ້ງປະຕິບັດວຽກງານ ຂອງສະພາປະຊົນທັງສອງແຂວງໃນໄລຍະຜ່ານມາ ເປັນຕົ້ນ ແມ່ນສະພາບລວມ ແລະ ທ່າແຮງຂອງແຂວງ, ດ້ານການພັດທະນາເສດຖະກິດ – ສັງຄົມ, ໂຄງປະກອບຂອງສະພາປະຊາຊົນ ແລະ ດ້ານອື່ນໆ ແລະ ມີທິດທາງແລກປ່ຽນບົດຮຽນ ແລະ ການຮ່ວມມືໃນຕໍ່ໜ້າ, ເພື່ອສືບຕໍ່ ແລະ ເສີມຂະຫຍາຍມູນເຊື້ອການພົວພັນອັນດີງາມ, ຄວາມສາມັກຄີແບບພິເສດ ແລະ ການຮ່ວມມືແບບຮອບດ້ານ ລະຫວ່າງ ລາວ – ຫວຽດນາມ,ຫວຽດນາມ – ລາວ, ໂດຍສະເພາະແມ່ນສະພາປະຊາຊົນ 2 ແຂວງ ໂດຍສອງຝ່າຍ ເຫັນດີສືບຕໍ່ເພີ່ມຄວາມສາມັກຄີມິດຕະພາບ, ການຮ່ວມມືຮອບດ້ານ ລະຫວ່າງ ສະພາປະຊາຊົນແຂວງອຸດົມໄຊ ກັບສະພາປະຊາຊົນແຂວງດຽນບຽນ ໃຫ້ນັບມື້ໄດ້ຮັບການພັດທະນາກວ່າເກົ່າ, ສືບຕໍ່ພົບປະແລກປ່ຽນບົດຮຽນ ລະຫວ່າງ ສະພາປະຊາຊົນ 2 ແຂວງ, ໂດຍອີງໃສ່ເງື່ອນໄຂ ຄວາມພ້ອມຂອງແຕ່ລະແຂວງ, ບັນດາຄະນະກຳມະການ ແລະ ຄະນະເລຂາທິການສະພາປະຊາຊົນສອງແຂວງ ໃຫ້ມີການພົບປະແລກປ່ຽນບົດຮຽນເຊິ່ງກັນ ແລະ ກັນ, ແລກປ່ຽນບົດຮຽນໃນການຮັບຮອງເອົານິຕິກຳຕ່າງໆຂອງແຂວງ ວ່າມີຂັ້ນຕອນ ແລະ ວິທີການແນວໃດ?, ບົດຮຽນໃນການຮັບຮອງບັນຫາສຳຄັນພຶ້ນຖານຂອງແຂວງ, ການຕິດຕາມກວດກາ ວຽກງານອື່ນໆ ຕະຫລອດຮອດການລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມແຕ່ລະຄັ້ງແມ່ນໄດ້ດໍາເນີນແນວໃດ ເພື່ອໃຫ້ປະຊາຊົນເຂົ້າຮ່ວມຢ່າງພ້ອມພຽງ ແລະ ບັນຫາອື່ນໆອີກ.
ຂ່າວ: ອຸດົມໄຊ
