ທ່ານສີເຮັງຫອມສົມບັດຮອງເລຂາພັກແຂວງ, ປະທານສະພາປະຊາຊົນແຂວງສາລະວັນ ກ່າວເປີດກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງສາລະວັນ ຊຸດທີ II ຢ່າງເປັນທາງການໃນຕອນເຊົ້າຂອງວັນທີ 30 ກໍລະກົດນີ້, ທີ່ສະໂມສອນແຂວງສາລະວັນ; ຊຶ່ງທ່ານກ່າວວ່າ: ໂດຍປະຕິບັດຕາມມາດຕາ 60 ຂອງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍສະພາແຫ່ງຊາດ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ ກ່ຽວກັບກອງປະຊຸມສະໄໝສາມັນປະຈໍາ 6 ເດືອນຕົ້ນປີ ຂອງສະພາປະຊາຊົນຂັ້ນແຂວງ ແລະ ຕາມການຕົກລົງຂອງຄະນະປະຈໍາສະພາປະຊາຊົນແຂວງ, ມື້ນີ້ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ໄດ້ເປີດຂຶ້ນຢ່າງເປັນທາງການໃນທ່າມກາງບັນຍາກາດທີ່ທົ່ວພັກ-ລັດ ແລະ ທົ່ວປວງຊົນລາວທັງຊາດເວົ້າລວມ, ເວົ້າສະເພາະກໍຄືແຂວງສາລະວັນພວກເຮົາ ພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ກອງປະຊຸມໃຫຍ່ ຄັ້ງທີ IX ຂອງແຂວງ; ບັນດາມະຕິກອງປະຊຸມຂອງສະພາແຫ່ງຊາດ ຊຸດທີ IX ແລະສະພາປະຊາຊົນແຂວງສະລະວັນ ຊຸດທີ II, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2024 ຂອງແຂວງຕິດພັນກັບການຈັດຕັ້ງປະຕິບັດສອງວາລະແຫ່ງຊາດ ຢ່າງເປັນຂະບວນຟົດຟື້ນ, ແຂງແຮງແລະມີຜົນສໍາເລັດຢ່າງຈົບງາມ.
ໃນໂອກາດທີ່ມີຄວາມໝາຍສໍາຄັນນີ້, ກອງປະຊຸມມີຄວາມພາກພູມໃຈແລະສະແດງຄວາມຍິນດີຢ່າງສູງ ທີ່ໄດ້ຕ້ອນຮັບ ທ່ານ ດາວວົງ ພອນແກ້ວ ກໍາມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນ; ທ່ານ ສຸບັນ ສະວະບຸດ ຄະນະປະຈໍາສະພາແຫ່ງຊາດ, ປະທານກໍາມາທິການວຽກງານສະມາຊິກສະພາແຫ່ງຊາດ ທີ່ໄດ້ໃຫ້ກຽດເຂົ້າຮ່ວມກອງປະຊຸມຄັ້ງນີ້; ຂໍສະແດງຄວາມຂໍ່ານັບຊົມເຊີຍບັນດາທ່ານການນໍາພັກ-ລັດຂັ້ນສູງຂອງແຂວງ, ບັນດາທ່ານອະດີດການນໍາຂັ້ນສູງຂອງແຂວງ, ບັນດາທ່ານຄະນະນໍາພະແນກການ, ອົງການລັດທຽບເທົ່າຂັ້ນແຂວງ, ເຈົ້າເມືອງແລະຜູ້ຕາງໜ້າຈາກພາກສ່ວນຕ່າງໆ; ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງ 14, ສະມາຊິກສະພາປະຊາຊົນແຂວງໃນນາມຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າພາຍໃນແຂວງ ທີ່ໄດ້ໃຫ້ກຽດເຂົ້າຮ່ວມກອງປະຊຸມຄັ້ງນີ້ຢ່າງພ້ອມພຽງ; ການເຄື່ອນໄຫວຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງສາລະວັນ ໃນໄລຍະ 6 ເດືອນຕົ້ນປີ 2024 ຊຶ່ງຢູ່ໃນສະພາບພາກພື້ນ ແລະ ສາກົນຍັງສືບຕໍ່ຜັນແປໄປຢ່າງສະຫຼັບຊັບຊ້ອນ, ເຄັ່ງຮ້ອນແລະຫຍຸ້ງຍາກຫຼາຍດ້ານຊຶ່ງໄດ້ສົ່ງຜົນກະທົບຕໍ່ ສປປ ລາວ ເວົ້າລວມ, ເວົ້າສະເພາະກໍຄືແຂວງສາລະວັນພວກເຮົາໂດຍສະເພາະສະພາບເງິນເຟີ້, ອັດຕາການແລກປ່ຽນ, ບັນຫາລາຄາສິນຄ້າເພີ່ມຂຶ້ນ, ລາຄານໍ້າມັນເຊື້ອໄຟແລະອື່ນໆໄດ້ສົ່ງຜົນກະທົບໂດຍກົງ ຕໍ່ຊີວິດການເປັນຢູ່ຂອງພະນັກງານ-ລັດຖະກອນ ແລະ ປະຊາຊົນບັນດາເຜົ່າພາຍໃນແຂວງໃນປັດຈຸບັນ, ແຕ່ດ້ວຍຄວາມເອົາໃຈໃສ່ຊີ້ນໍາ-ນໍາພາຄະນະບໍລິຫານງານສູນກາງພັກ, ສະພາແຫ່ງຊາດແລະຄະນະບໍລິຫານງານພັກແຂວງ, ການປະສານສົມທົບ, ປຶກສາຫາລືເຮັດວຽກຮ່ວມກັນຢ່າງເປັນປົກກະຕິ-ຕໍ່ເນື່ອງ ແລະ ເປັນເອກະພາບ ລະຫວ່າງ ສະພາປະຊາຊົນແຂວງສາລະວັນ ແລະອົງການປົກຄອງແຂວງ, ການປະກອບສ່ວນຂອງພາກສ່ວນຕ່າງໆໃນສັງຄົມ, ປະຊາຊົນລາວບັນດາເຜົ່າ ພາຍໃນແຂວງເຮັດໃຫ້ບັນຫາເສດຖະກິດພາຍໃນແຂວງ ໄດ້ຮັບການແກ້ໄຂສາມາດສືບຕໍ່ພັດທະນາ, ເຮັດໃຫ້ບາງບັນດາຄາດໝາຍທາງດ້ານເສດຖະກິດ-ສັງຄົມ, ການປະຕິບັດແຜນງົບປະມານຂອງແຂວງ ສາມາດບັນລຸຕາມແຜນແລະເກີນແຜນການກໍານົດໄວ້; ການຈັດຕັ້ງປະຕິບັດ 2 ວາລະແຫ່ງຊາດ ກໍມີຄວາມຄືບໜ້າເປັນຢ່າງດີເຮັດໃຫ້ແຂວງສາລະວັນ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເທື່ອລະກ້າວ.
ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ຄັ້ງນີ້ຈະໄດ້ຄົ້ນຄວ້າພິຈາລະນາແລະຮັບຮອງບັນດາເນື້ອໃນສໍາຄັນດັ່ງນີ້: 1.ຮັບຟັງການລາຍງານໂດຍສັງເຂບ ຂອງທ່ານເຈົ້າແຂວງກ່ຽວກັບການເຄື່ອນໄຫວວຽກງານພົ້ນເດັ່ນ ຂອງອົງການປົກຄອງແຂວງໄລຍະ 6 ເດືອນຕົ້ນປີ 2024 ແລະແຜນການ 6 ເດືອນທ້າຍປີ 2024; 2.ພິຈາລະນາ, ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ໄລຍະ 6 ເດືອນຕົ້ນປີ 2024 ແລະແຜນການ 6 ເດືອນທ້າຍປີ 2024; 3.ພິຈາລະນາ, ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງໄລຍະ 6 ເດືອນຕົ້ນປີ 2024 ແລະ ແຜນການ 6 ເດືອນທ້າຍປີ 2024; 4.ພິຈາລະນາ, ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດບັນດາຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງແຂວງໃນໄລຍະຜ່ານມາ ແລະ ຄາດໝາຍສູ້ຊົນໃນປີ 2024; 5.ຮັບຟັງການລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດວາລະແຫ່ງຊາດ ແລະ ບັນຫາອື່ນໆ.
ຂ່າວ: ສາລະວັນ
