ກອງປະຊຸມຕິດຕາມກວດກາການປະເມີນຜົນການຈັດຕັ້ງປະຕິບັດ ກົດໝາຍວ່າດ້ວຍແຮງງານ ຈັດຂຶ້ນໃນວັນທີ 19 ກັນຍານີ້ ທີ່ສະພາແຫ່ງຊາດ (ສພຊ) ໂດຍການເປັນປະທານຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ; ເຂົ້າຮ່ວມມີທ່ານ ນາງ ໃບຄໍາ ຂັດຕິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ),ບັນດາທ່ານຜູ້ຕາງໜ້າຈາກກຳມາທິການຂອງ ສພຊ ແລະ ພະນັກງານ-ລັດ ຖະກອນຈາກພາກສ່ວນທີ່ ກ່ຽວຂ້ອງ.
ໃນພິທີ, ທ່ານ ຄໍາໃບ ດໍາລັດ ກ່າວວ່າ: ກອງປະຊຸມນີ້ຈັດຂື້ນເພື່ອຮັບຟັງການລາຍງານການປະເມີນຜົນການຈັດຕັ້ງປະຕິບັດ ກົດໝາຍວ່າດ້ວຍແຮງງານໃນໄລຍະຜ່ານມາ ເພື່ອເປັນການສະຫຼຸບ, ຖອດຖອນບົດຮຽນ ໃຫ້ແກ່ການຈັດຕັ້ງປະຕິບັດກົດໝາຍສະບັບດັ່ງກ່າວ ໂດຍຍົກໃຫ້ເຫັນດ້ານຕັ້ງໜ້າ, ດ້ານຄົງຄ້າງ, ສາເຫດທີ່ພາໃຫ້ມີຜົນກະທົບຕໍ່ການຈັດຕັ້ງປະຕິບັດກົດໝາຍ ເພື່ອຍົກສູງຄຸນນະພາບຂອງການຈັດຕັ້ງປະຕິບັດກົດໝາຍ, ເຮັດໃຫ້ສະຕິເຄົາລົບກົດໝາຍທົ່ວສັງຄົມສູງຂຶ້ນເທື່ອລະກ້າວ ແລະ ການຕິດຕາມກວດກາການປະເມີນຜົນ.
ໃນກອງປະຊຸມ, ທ່ານຮອງລັດຖະມົນຕີກະຊວງຮສສໄດ້ລາຍງານການປະເມີນຜົນ ການຈັດຕັ້ງປະຕິບັດ ກົດໝາຍວ່າດ້ວຍແຮງງານ; ຈາກນັ້ນ, ບັນດາຜູ້ເຂົ້າຮ່ວມໄດ້ພ້ອມກັນຄົ້ນຄວ້າ ແລະ ປະກອບຄຳຄິດຄຳເຫັນຢ່າງກົງໄປ-ກົງມາ, ມີລັກສະນະສ້າງສັນ ເພື່ອຊອກໃຫ້ເຫັນດ້ານດີ, ຜົນງານ, ຂໍ້ຄົງຄ້າງ, ສາເຫດ ແລະ ວິທີແກ້ໄຂໃນຕໍ່ໜ້າ.
ກົດໝາຍວ່າດ້ວຍແຮງງານໄດ້ປະກາດໃຊ້ ແລະ ຈັດຕັ້ງປະຕິບັດເປັນໄລຍະເວລາ 10 ປີກວ່າແລ້ວ, ຜ່ານການຈັດຕັ້ງປະຕິບັດໃນໄລຍະຜ່ານມາ ເຫັນວ່າກະຊວງ ຮສສ ໄດ້ມີການຕິດຕາມກວດກາ ແລະ ປະເມີນຜົນການບັງຄັບໃຊ້ກົດໝາຍສະບັບນີ້, ແຕ່ຄຽງຄູ່ກັບດ້ານດີ, ກໍເຫັນວ່າການປະຕິບັດກົດໝາຍສະບັບດັ່ງກ່າວ ຍັງມີຂໍ້ຄົງຄ້າງ ແລະ ສິ່ງທ້າທາຍບາງດ້ານ ເປັນຕົ້ນການຄຸ້ມຄອງແຮງງານຕ່າງປະເທດ ທີ່ເຂົ້າມາອອກແຮງງານ ຢູ່ ສປປ ລາວ ແລະ ການສົ່ງແຮງງານ ລາວ ໄປອອກແຮງງານຢູ່ຕ່າງປະເທດ ລວມທັງການພັດທະນາສີມືແຮງງານ ແລະ ອື່ນໆຍັງພົບກັບຄວາມຫຍຸ້ງຍາກຫຼາຍບັນຫາ ແລະ ຂາດການຕິດຕາມກວດກາປະເມີນຢ່າງຕໍ່ເນື່ອງ, ນາຍຈ້າງຈຳນວນຫຼາຍບໍ່ປະຕິບັດຕາມກົດໝາຍ ຫຼື ລະເມີດກົດໝາຍ ແລະ ອື່ນໆ.
ຂ່າວ: ຜູ້ແທນປະຊາຊົນ
