ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຕອນແລງຂອງວັນທີ 8 ເມສາ 2022, ສະຫາຍ ປອ ໄຊສົມພອນ ພົມວິຫານ ປະທານສະ ພາແຫ່ງຊາດແຫ່ງ ສປປ ລາວ ໄດ້ພົບປະທາງໄກ ກັບສະຫາຍ ເອັສເຕບານລາໂຊເຮີນານເດສ ປະທານສະພາແຫ່ງຊາດອໍານາດປະຊາຊົນແຫ່ງ ສ.ກູບາ. ການພົບປະສອງຝ່າຍຄັ້ງນີ້ ໄດ້ດຳເນີນໄປດ້ວຍບັນຍາ ກາດໄມຕີຈິດມິດຕະພາບອັນອົບອຸ່ນ ແລະ ມີຄວາມໝາຍຄວາມສຳຄັນ ໃນການປະກອບສ່ວນເຂົ້າໃນການເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມມາແຕ່ດົນນານບົນພື້ນຖານອຸດົມການສັງຄົມນິຍົມ ລະຫວ່າງສອງປະເທດ ລາວ-ກູບາ ເວົ້າລວມ, ເວົ້າສະເພາະແມ່ນການພົວພັນຮ່ວມມືລະຫວ່າງສະພາແຫ່ງຊາດແຫ່ງ ສປປ ລາວ ແລະ ສະພາແຫ່ງຊາດອໍານາດປະຊາຊົນແຫ່ງ ສ.ກູບາ ເພື່ອຜົນປະໂຫຍດລວມຂອງປະຊາຊົນສອງປະເທດ ລາວ ແລະ ກູບາ.
ໃນການພົບປະກັນຄັ້ງນີ້, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືໃນໄລຍະທີ່ຜ່ານມາ, ພ້ອມທັງແຈ້ງໃຫ້ກັນຊາບສະພາບການພົ້ນເດັ່ນ ຂອງແຕ່ລະປະເທດ ເປັນຕົ້ນແມ່ນສຳເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ດ້ວຍຜົນສໍາເລັດອັນຈົບງາມ ເຊິ່ງໄດ້ພິຈາ ລະນາຮັບຮອງເອົາຫລາຍບັນຫາທີ່ສໍາຄັນຂອງຊາດ ເປັນຕົ້ນແມ່ນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາປີ 2021 ແລະ ທິດທາງແຜນການປີ 2022 ແລະ ການຮັບມືກັບການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ. ພ້ອມນັ້ນໄດ້ຮ່ວມ ກັນຕີລາການພົວພັນ ແລະ ການຮ່ວມມື ລະຫວ່າງສອງປະເທດ ໃນໄລຍະຜ່ານມາເຫັນວ່າໄດ້ຮັບການເສີມຂະຫຍາຍດີຂຶ້ນ ເຊິ່ງສະແດງອອກມີການແລກປ່ຽນຢ້ຽມຢາມ ຂອງຄະນະຜູ້ແທນຂັ້ນສູງຂອງລັດຖະບານ, ບັນດາຂະ ແໜງການໃນລະດັບສູນກາງ ແລະ ທ້ອງຖິ່ນ, ການຮ່ວມມືທາງດ້ານເສດຖະກິດ, ການສຶກສາ, ສາທາລະນະສຸກ ແລະ ຂະແໜງການອື່ນໆ; ພ້ອມກັນນີ້, ສອງຝ່າຍໄດ້ເອົາໃຈໃສ່ຈັດຕັ້ງປະຕິບັດບົດບັນ ທຶກຊ່ວຍຈໍາ(MOU)ວ່າດ້ວຍການຮ່ວມມື ລະຫວ່າງ ສອງອົງການນິຕິບັນຍັດນຳກັນ ແລະ ປຶກສາຫາລືກ່ຽວກັບການແລກ ປ່ຽນສິນຄ້ານຳກັນ.
ໃນໂອກາດດັ່ງກ່າວ, ສະຫາຍປະທານສະພາແຫ່ງຊາດລາວ ໃນນາມຕາງໜ້າໃຫ້ລັດຖະບານ, ສະພາແຫ່ງຊາດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈ ມາຍັງລັດຖະບານ, ສະພາແຫ່ງຊາດອຳນາດປະຊາຊົນ ແລະ ປະຊາຊົນກູບາອ້າຍນ້ອງ ທີ່ໄດ້ໃຫ້ການຊ່ວຍເຫລືອອັນລໍ້າຄ່າແກ່ ສປປ ລາວ ບໍ່ວ່າໃນໄລຍະການປະຕິວັດຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ.
ນອກຈາກນີ້, ສອງປະທານສະພາລາວ ແລະ ກູບາ ກໍໄດ້ທົບທວນຄືນການພົວພັນຮ່ວມມື ຂອງສອງອົງການນິຕິບັນຍັດໃນໄລຍະຜ່ານມາ ເຊິ່ງສະແດງອອກ ໄດ້ມີການແລກປ່ຽນຄະນະຜູ້ແທນນຳກັນ ໃນລະດັບປະທານສະພາ, ກຳມາ ທິການ, ຄະນະມິດຕະພາບລັດຖະສະພາ; ພ້ອມທັງໄດ້ສົ່ງສານຊົມເຊີຍ, ສານອວຍພອນ ເຊິ່ງກັນ ແລະ ກັນ ໃນໂອກາດວັນສຳຄັນຂອງຊາດ ແລະ ສະໜັບສະໜູນກັນໃນເວທີລັດຖະສະພາພາກພື້ນ ແລະ ສາກົນ. ພ້ອມກັນນີ້, ສະຫາຍປະທານສະພາແຫ່ງຊາດລາວ ຍັງໄດ້ສະເຫນີໃຫ້ ສະຫາຍປະທານສະພາແຫ່ງຊາດອຳນາດປະຊາຊົນ ສືບຕໍ່ຊຸກຍູ້ໃຫ້ລັດຖະບານຈັດຕັ້ງປະຕິບັດບັນດາສັນຍາ, ສົນທິສັນຍາ, ຂໍ້ຕົກລົງ, ບົດບັນທຶກຄວາມເຂົ້າໃຈ ທີ່ພົວພັນເຖິງການຮ່ວມມືສອງຝ່າຍ ທີ່ໄດ້ຕົກ ລົງຮ່ວມກັນ ໃຫ້ເປັນຮູບປະທຳ ແລະ ມີປະສິດຜົນດີຂຶ້ນກວ່າເກົ່າ ເປັນຕົ້ນ ໃນຂົງເຂດສາທາລະນະສຸກ, ສຶກສາ-ກິລາ, ວິທະຍາສາດ-ເຕັກໂນໂລຊີ, ກະສິກຳ, ພະລັງງານ, ທ່ອງທ່ຽວ ແລະ ຂົງເຂດຕຸລາການ.
ທັງສອງປະທານອົງການນິຕິບັນຍັດ ຍັງໄດ້ອວຍພອນ ເຊິ່ງກັນ ແລະ ກັນ ພ້ອມທັງເຊື້ອເຊີນຊຶ່ງກັນ ແລະ ກັນ ມາຢ້ຽມຢາມປະເທດໃນເວລາທີ່ພະຍາດໂຄວິດ-19 ຫາກຜ່ອນຄາຍລົງ ແລະ ມີຄວາມສະດວກຂອງທັງສອງຝ່າຍ.