ໃນວັນທີ 27 ມິຖຸນາ 2022 ທ່ານ ນາງ ສຸນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ໄດ້ຖະແຫລງຂ່າວຕໍ່ສື່ມວນຊົນ ກ່ຽວກັບຜົນສຳເລັດໃນການເຄື່ອນໄຫວວຽກງານຂອງຄະນະປະຈໍາສະພາແຫ່ງຊາດ ແລະ ການຕິດຕາມກວດກາຂອງສະພາແຫ່ງຊາດ ກ່ຽວກັບການປະຕິບັດວາລະແຫ່ງຊາດ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ 9 ໃນວັນທີ 24 ມິຖຸນານີ້ ໂດຍຊີ້ໃຫ້ເຫັນເຖິງການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາ ກອງປະຊຸມສະໄໝສາມັນເທື່ອທີ 3ຂອງສະພາແຫ່ງຊາດ ຊຸດທີ 9 ແລະ ແຜນການ 6 ເດືອນທ້າຍປີ 2022 ເຖິງວ່າສະພາບການໃນພາກພື້ນ ແລະ ສາກົນ ຜັນແປຢ່າງສັບສົນ, ສະພາບພາຍໃນປະເທດມີຄວາມຫຍຸ້ງຍາກ, ຜົນກະທົບຈາກການລະບາດຂອງພະຍາດໂຄວິດ-19, ແຕ່ດ້ວຍຄວາມພະຍາຍາມຂອງຄະນະປະຈໍາສະພາແຫ່ງຊາດ ແລະ ການນຳຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ໄດ້ມີຜົນສໍາເລັດທີ່ພົ້ນເດັ່ນຫຼາຍດ້ານ ເປັນຕົ້ນດ້ານນິຕິບັນຍັດ, ດ້ານການຕິດຕາມກວດກາ, ການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະອື່ນໆ.
ສ່ວນແຜນການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນ ເທື່ອທີ 3 ຮອດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 9 ທ່ານ ນາງ ສູນທອນ ໄຊຍະຈັກ ຊີ້ໃຫ້ເຫັນຕື່ມວ່າ: ໃນໄລຍະແຕ່ກອງປະຊຸມສະໄໝສາມັນ ເທື່ອທີ 3 ຮອດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 9 ໄດ້ກໍານົດຫລາຍແຜນວຽກຈຸດສຸມສໍາຄັນເປັນຕົ້ນ ການຈັດຕັ້ງຜັນຂະຫຍາຍແຜນການສ້າງ ແລະ ປັບປຸງກົດໝາຍໃນທ້າຍປີ 2022 ຂອງສະພາແຫ່ງຊາດ ໃຫ້ບັນລຸຕາມແຜນການ ຈໍານວນ 19 ສະບັບ; ພິຈາລະນາຕົກລົງບັນຫາສໍາຄັນພື້ນຖານຂອງປະເທດຊາດ ຕາມພາລະບົດບາດສິດ ແລະ ໜ້າທີ່ ໃຫ້ສອດຄ່ອງກັບແນວທາງນະໂຍບາຍ, ລັດຖະທໍາມະນູນ ແລະ ກົດໝາຍ; ຮັບຟັງລາຍງານ ແລະ ຮັບຮອງເອົາບັນດາບົດລາຍງານຂອງລັດຖະບານ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ອົງການກວດສອບແຫ່ງລັດ, ອົງການກວດກາແຫ່ງລັດກ່ຽວກັບການເຄື່ອນໄຫວປະຈໍາປີ 2022 ແລະ ທິດທາງປີ2023; ຮັບປະກັນການປະຕິບັດພາລະບົດບາດຕິດຕາມກວດກາຂອງສະພາແຫ່ງຊາດ ຕາມລັດຖະທໍາມະນູນ ແລະ ກົດໝາຍ ໃຫ້ມີປະສິດທິພາບ ແລະ ປະສິດທິຜົນ; ນອກຈາກນີ້ ທ່ານ ນາງ ສູນທອນ ໄຊຍະຈັກ ຍັງໄດ້ແຈ້ງໃຫ້ຮູ້ເຖິງຜົນການຕິດຕາມກວດກາການຈັດຕັ້ງປະຕິບັດວາລະແຫ່ງຊາດ ໃນໄລຍະຜ່ານມາ ແລະ ແຜນການຕິດຕາມກວດກາໃນຕໍ່ໜ້າຂອງສະພາແຫ່ງຊາດ ລວມທັງຄວາມຄືບໜ້າການປະຕິຮູບລັດວິສາຫະກິດ ລວມທັງການປັບປຸງໂຄງສ້າງຂອງທະນາຄານທຸລະກິດລັດຕື່ມອີກ.
ຂ່າວ : ຈັນທະສອນ ສີຫານາດ
