ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ 8 ໃນຕອນເຊົ້າມື້ນີ້, ທີ່ຫໍສະພາແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ສະມາຊິກສະພາແຫ່ງຊາດໄດ້ພິຈາລະນາ ແລະຮັບຮອງເອົາສະມາຊິກລັດຖະບານຈຳ ນວນ 2 ທ່ານຄື: ທ່ານ ຄຳເຈນ ວົງໂພສີ ເປັນລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແລະທ່ານ ທອງຈັນ ມະນີໄຊ ເປັນລັດຖະມົນຕີກະຊວງພາຍໃນຕາມການສະເໜີຂອງນາຍົກ ລັດຖະມົນຕີດ້ວຍຄະແນນສຽງສ່ວນຫລາຍ ນອກຈາກນີ້ນາຍົກລັດຖະມົນຕີຍັງໄດ້ສະເໜີຍົກຍ້າຍທ່ານ ລຽນທິແກ້ວ ລັດຖະມົນຕີກະຊວງກະສິກຳ ແລະປ່າໄມ້ ໄປເປັນລັດຖະມົນຕີປະຈໍາສຳນັກງານນາຍົກລັດຖະມົນຕີ ແລະ ແຕ່ງຕັ້ງທ່ານ ເພັດ ພົມພິພັກ ເປັນລັດຖະມົນຕີກະຊວງກະສິກຳ ແລະປ່າໄມ້ ເພື່ອສືບຕໍ່ປະຕິບັດວຽກງານຊ່ວຍຄະນະລັດຖະບານໃນໄລຍະ 5 ປີຕໍ່ໜ້າ. ຈາກນັ້ນສະມາຊິກສະພາແຫ່ງຊາດຈາກແຕ່ລະເຂດເລືອກຕັ້ງໄດ້ພ້ອມກັນປະກອບຄຳເຫັນຕໍ່ວຽກງານອົງການກວດສອບແຫ່ງລັດກ່ຽວກັບຜົນການກວດສອບບົດສະຫລຸບຂາດຕົວ ບັນຫາສຳຄັນທີ່ສະມາຊິກສະພາແຫ່ງຊາດເນັ້ນໃສ່ປະກອບຄຳເຫັນຫລາຍກວ່າໝູ່ແມ່ນມາດຕະການແກ້ໄຂຕໍ່ຜົນການກວດສອບທີ່ມີການລະເມີດຂອງບັນດາກະຊວງ, ແຂວງ ແລະຂະແໜງການຢ່າງຈິງຈັງ ລວມເຖິງການວິເຄາະ, ວິໃຈ ເພື່ອຍົກໃຫ້ເຫັນສາເຫດທີ່ເຮັດໃຫ້ມີຊ່ອງຫວ່າງຂອງການລະເມີດ ເນື່ອງຈາກກະທົບເຖິງລາຍຮັບເຂົ້່າປະມານຂອງຊາດໂດຍກົງ.

ທ່ານ ພອນເພັດ ຄິວລາວົງ, ສະມາຊິກສະພາແຫ່ງຊາດເຂດເລືອກຕັ້ງທີ 16 ແຂວງເຊກອງ ປະກອບຄຳເຫັນຕໍ່ອົງການກວດສອບຄວນເບີ່ງລະອຽດໃນແຕ່ລະຂັ້ນ, ສາເຫດທີ່ພາໃຫ້ມີການລະເມີດ ລວມເຖິງການຈັດຕັ້ງປະຕິບັດພາຍຫລັງການກວດພົບ ຈີ່ງຈະແກ້ໄຂບັນຫາໄດ້ຢ່າງຖືກຈຸດ ແລະເປັນຮູບປະທຳຫລາຍຂື້ນ.

ທ່ານ ຈັນສີ ແສງສົມພູ ສະມາຊິກສະພາແຫ່ງຊາດເຂດເລືອກຕັ້ງທີ 2 ແຂວງຜົ້ງສາລີ ໄດ້ປະກອບຄຳເຫັນສະເໜີໃຫ້ອົງການກວດສອບເພີ່ມເປົ້າໝາຍການກວດສອບໃຫ້ຫລາຍຂື້ນ ເພື່ອຄຸ້ມຄອງລາຍຮັບ, ລາຍຈ່າຍ ແລະໂຄງການຕ່າງໆຂອງລັດ ພາຍຫລັງກວດກາກວດສອບແລ້ວເມື່ອພົບເຫັນມີການລະເມີດຄວນມີມາດຕະການຢ່າງຈິງຈັງຕໍ່ເປົ້າໝາຍນັ້ນ ຈີ່ງຈະເຮັດໃຫ້ຜົນການກວດສອບມີປະສິດທິຜົນ.

ທ່ານ ນາງ ບົວຄຳ ທິບພະວົງ ສະມາຊິກສະພາແຫ່ງຊາດເຂດເລືອກຕັ້ງທີ 1 ນະຄອນຫລວງວຽງຈັນ ປະກອບຄຳເຫັນກ່ຽວກັບຜົນການກວດສອບເງິນກູ້ຢືມ ແລະເງິນຊ່ວຍເຫລືອລ້າທີ່້ເຫັນວ່າຍັງພົບມີຫລາຍໂຄງການນໍາໃຊ້ບໍ່ຖືກເປົ້າໝາຍສະນັ້ນຄວນເບີ່ງຄືນບັນຫານີ້ ເພື່ອໃຫ້ສາກົນກໍ່ຄືຜູ້ໃຫ້ທືນມີຄວາມເຊື່ອໝັ້ນຫລາຍຂື້ນ.

ພາຍຫລັງສະມາຊິກສະພາແຫ່ງຊາດແຕ່ລະເຂດເລືອກຕັ້ງປະກອບຄໍາເຫັນສໍາເລັດ ທ່ານ ບຸນປອນ ວັນນະສີ ຮອງປະທານອົງການກວດສອບແຫ່ງລັດ ໄດ້ອະທິບາຍຊີ້ແຈງເພີ່ມຕື່ມເພື່ອໃຫ້ຄວາມກະຈ່າງແຈ້ງຕໍ່ຄຳຊັກຖາມຂອງສະມາຊິກສະພາແຫ່ງຊາດ. ສຳລັບວາລະການດຳເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ 8 ໃນຕອນບ່າຍມື້ນີ້ ສະມາຊິກສະພາແຫ່ງຊາດຈະໄດ້ພ້ອມກັນປະກອບຄຳເຫັນຕໍ່ວຽກງານອົງການກວດກາລັດ ຖະບານກ່ຽວກັບການກວດກາຕາມຜົນການກວດສອບ.

 

ຂ່າວ: ຈັນທະສອນ ສີຫານາດ

ພາບ: ຕາລີເຊ້ຍ

Loading...