ສະພາແຫ່ງຊາດ ປະກອບຄໍາເຫັນໃສ່ ກົດໝາຍວ່າດ້ວຍ ການຕ້ານ ສະກັດກັ້ນ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍສະບັບປັບປຸງ

ກອງປະຊຸມສະໄໝສະມັນເທື່ອທີ 7 ຂອງສະພາແຫ່ງຊາດ ຊຸດທີ IX ຕອນບ່າຍວັນທີ 27 ມິຖຸນາ 2014 ສະມາຊິກສະພາແຫ່ງຊາດ ຈາກເຂດເລືອກຕັ້ງຕ່າງໆ ໄດ້ຮັບຟັງ ແລະປະກອບຄໍາເຫັນໃສ່ຮ່າງກົດໝາຍ ວ່າດ້ວຍການຕ້ານ ສະກັດກັ້ນ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍສະບັບປັບປຸງ ສະເໜີໂດຍ ທ່ານບຸນເຫລືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ເຊິ່ງທ່ານໄດ້ສະເໜີ ສະພາບການຈັດຕັ້ງປະຕິບັດ ກົດໝາຍວ່າດ້ວຍການຕ້ານ ສະກັດກັ້ນ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ໃນໄລຍະຜ່ານມາ. ເຊິ່ງກົດໝາຍສະບັບນີ້ໄດ້ສ້າງຂຶ້ນດ້ວຍການຍົກລະດັບ ຈາກດໍາລັດວ່າດ້ວຍການຕ້ານ ການຟອກເງິນ ສະບັບເລກທີ 55/ນຍ, ລົງວັນທີ 27 ມີນາ 2006 ໃນເງື່ອນໄຂທີ່ ສປປ ລາວ ຈໍາເປັນຕ້ອງປະຕິບັດ ພັນທະສາກົນຕ່າງໆ ເຊັ່ນ: ການເຂົ້າເປັນປະຊາຄົມອາຊຽນ ໃນປີ 2015, ການເປັນສະມາຊິກອົງການການຄ້າໂລກ, ວຽກງານການຕ້ານ ສະກັດກັ້ນ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ເຮັດໃຫ້ການພົວພັນທາງດ້ານເສດຖະກິດ, ການເງິນ ແລະ ການລົງທຶນ ນັບມື້ໄດ້ຮັບການຂະຫຍາຍຕົວ ແລະ ມີຄວາມສະລັບຊັບຊ້ອນ ແລະ ເພື່ອສ້າງເງື່ອນໄຂໃຫ້ ສປປ ລາວ ສາມາດອອກຈາກບັນຊີສີເທົາໃນ ໄລຍະປີ 2015-2017.

ທ່ານຜູ້ວ່າການທະນາຄານແຫ່ງ ສປປ ລາວ ໄດ້ຍົກໃຫ້ເຫັນໂຄງປະກອບ ແລະ ບາງເນື້ອໃນສໍາຄັນຂອງຮ່າງກົດໝາຍສະບັບປັບປຸງ ເຊິ່ງຮ່າງກົດໝາຍສະບັບນີ້ ປະກອບມີ IX ພາກ, 07 ໝວດ ແລະ 59 ມາດຕາ (ທຽບໃສ່ກົດໝາຍສະບັບປັດຈຸບັນ ມີ VII ພາກ, 7 ໝວດ ແລະ 73 ມາດຕາ). ໃນນີ້ ໄດ້ມີການປັບປຸງ 44 ມາດຕາ, ຮັກສາໄວ້ 09 ມາດຕາ, ເພີ່ມໃໝ່ 07 ມາດຕາ ແລະ ຕັດອອກ 13 ມາດຕາ. ການປັບປຸງທີ່ສໍາຄັນ ມີ ຊື່ຂອງກົດໝາຍ ໄດ້ປັບປຸງ ຊື່ຈາກ “ກົດໝາຍວ່າດ້ວຍການຕ້ານ ສະກັດກັ້ນ ການຟອກເງິນ ແລະ ການສະໜອງທຶນ ໃຫ້ແກ່ການກໍ່ການຮ້າຍ” ມາເປັນ “ກົດໝາຍວ່າດ້ວຍ ການຕ້ານ ການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ” ເພື່ອໃຫ້ສອດຄ່ອງກັບການຈັດຕັ້ງປະຕິບັດຕົວຈິງ ໃນໄລຍະປັດຈຸບັນ; ໂຄງສ້າງຂອງກົດໝາຍ: ໂດຍໄດ້ໂຮມ ມາດຕາ 2 ແລະ 3 ເຂົ້າເປັນມາດຕາດຽວ;

ສໍາລັບພາກສ້າງໃໝ່ (ພາກທີ II ການກະທຳທີ່ ເປັນການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ) ໂດຍເອົາເນື້ອໃນ 5 ມາດຕາ (ໃນພາກທີ 1 ບົດບັນຍັດທົ່ວໄປ ຄື ມຕ 2, 3, 6, 7 ແລະ ຂໍ້ 1 ມາດຕາ ມາສັບຊ້ອນໃສ່ ພ້ອມທັງສ້າງ 1 ມາດຕາ ໃໝ່ ທີ່ກຳນົດຮູບແບບຂອງການຟອກເງິນ; ສ້າງພາກໃໝ່ (ພາກທີ IV ການດໍາເນີນຄະດີກ່ຽວກັບການຟອກເງິນ ແລະ ການສະໜອງທຶນ ໃຫ້ແກ່ການກໍ່ການຮ້າຍ) ໂດຍເອົາເນື້ອໃນ 3 ມາດຕາ (ຄື ມາດຕາ 38, 39, ແລະ 41) ມາສັບຊ້ອນໃສ່ ພ້ອມທັງສ້າງເປັນ 3 ມາດຕາໃໝ່; ແລະຕັດ 14 ມາດຕາອອກ ຄື ມາດຕາ: 29, 46-49, 56, 62-65, 68-71.

ສ່ວນເນື້ອໃນທີ່ປັບປຸງປະກອບມີ: 1). ປັບປຸງການອະທິບາຍຄໍາສັບໃນ ມາດຕາ 3 ຈໍານວນໜຶ່ງ ໃຫ້ຈະແຈ້ງ ເປັນຕົ້ນ ຜູ້ກໍ່ການຮ້າຍ, ຜູ້ໄດ້ຮັບຜົນປະໂຫຍດທີ່ແທ້ຈິງ, ບຸກຄົນທີ່ມີສະຖານະພາບທາງການເມືອງ, ການຍຶດຊັບ ແລະ ການອາຍັດຊັບ. ໄດ້ປັບປຸງການກະທໍາທີ່ເປັນຟອກເງິນ (ມາດຕາ 9 ວັກ 2), ການກໍ່ການຮ້າຍ (ມາດຕາ 12), ຫົວໜ່ວຍທີ່ມີໜ້າທີ່ລາຍງານ (ມາດຕາ 16), ການປະເມີນ ແລະ ບໍລິຫານຄວາມສ່ຽງ (ມາດຕາ 19), ການຊ່ວຍເຫຼືອຊຶ່ງກັນ ແລະ ກັນທາງດ້ານກົດໝາຍ (ມາດຕາ41) ໃຫ້ຄົບຖ້ວນ ແລະ ສອດຄ່ອງກັບຫຼັກການສາກົນ; ໂດຍໄດ້ປັບປຸງເນື້ອໃນ ການເຄື່ອນໄຫວຂອງນິຕິບຸກຄົນ ແລະ ອົງການບໍ່ຫວັງຜົນກໍາໄລ (ມາດຕາ 31-32), ຂໍ້ຫ້າມ (ມາດຕາ 42-43), ທີ່ຕັ້ງພາລະບົດບາດຂອງ ຄະນະກຳມະການແຫ່ງຊາດ ເພື່ອຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ ຫລື ມີຊື່ຫຍໍ້ວ່າ ສຕຟງ (ມາດຕາ 48) ແລະ ປັບປຸງໂທດປັບໃໝທາງອາຍາຕໍ່ການຟອກເງິນ ແລະ ການສະໜອງທຶນ ໂດຍປ່ຽນຈາກປັບໃໝເປັນຈໍານວນເງິນ ມາເປັນປັບໃໝເປັນອັດຕາສ່ວນຮ້ອຍ ຂອງມູນຄ່າທີ່ເສຍຫາຍ (ມາດຕາ 57-58).

ທ່ານບຸນເຫລືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໃຫ້ຮູ້ເນື້ອໃນທີ່ເພີ່ມໃໝ່: ປະກອບມີ ການອະທິບາຍບາງຄໍາສັບເຂົ້າຕື່ມ ເຊັ່ນ: ຊັບສິນດີຈິຕອນ, ຜູ້ໃຫ້ບໍລິການຊື້-ຂາຍ ຊັບສິນດີຈິຕອນ, ຊັບສິນທີ່ມີມູນຄ່າທຽບເທົ່າ; ຮູບແບບຂອງການຟອກເງິນ ໂດຍກຳນົດ 4 ຮູບແບບ; ອົງການດໍາເນີນຄະດີກ່ຽວກັບການຟອກເງິນ, ການກໍ່ການຮ້າຍ ແລະ ການສະໜອງທຶນໃຫ້ແກ່ການກໍ່ການຮ້າຍ ແລະ ເນື້ອໃນກ່ຽວກັບງົບປະມານ ຂອງ ຄຕຟງ ແລະ ສຕຟງ ໃຫ້ຈະແຈ້ງວ່ານໍາໃຊ້ງົບປະມານຂອງລັດ.

ທ່ານຜູ້ວ່າການທະນາຄານ ແຫ່ງ ສປປ ລາວ ໃຫ້ຮູ້ວ່າ: ພາຍຫຼັງຮ່າງກົດໝາຍສະບັບນີ້ ໄດ້ຮັບການຮັບຮອງ ຈະເປັນການສະກັດກັ້ນ ແລະ ຫຼຸດຜ່ອນ ປະກົດການຫຍໍ້ທໍ້ທີ່ຕິດພັນກັບວຽກງານ AML/CFT ໂດຍຜ່ານການຮັບບົດ ລາຍງານທຸລະກຳທີ່ໜ້າສົງໄສວ່າເປັນການຟອກເງິນ ແລະ ລາຍງານອື່ນໆ; ລະດັບການປົກປ້ອງຫົວໜ່ວຍທີ່ມີໜ້າທີ່ລາຍງານ ຈາກອາຊະຍາກຳທາງດ້ານການເງິນ ທີ່ສູງຂື້ນ ຈະເພີ່ມ ຄວາມເຊື່ອໝັ້ນຕໍ່ລະບົບເສດຖະກິດ-ການເງິນຂອງນັກລົງທຶນ ແລະ ນໍາໄປສູ່ການເຕີບໂຕທີ່ດີຂຶ້ນຂອງພາກທຸລະກິດ. ນອກຈາກນີ້, ຈະເຮັດໃຫ້ມີບ່ອນອີງດ້ານນິຕິກຳ ໃນການຄຸ້ມຄອງ, ຕິດຕາມ ກວດກາ ການເຄື່ອນໄຫວວຽກງານ AML /CFT ມີຄວາມເຂັ້ມແຂງ ແລະ ມີປະສິດທິຜົນ ກໍ່ຊ່ວຍເຮັດໃຫ້ລະບົບການເງິນຂອງ ສປປ ລາວ ມີຄວາມສົມດຸນຂຶ້ນກວ່າເກົ່າ ແລະ ສາມາດເຊື່ອມໂຍງກັບພາກພື້ນ ແລະ ສາກົນ.