ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX, ວັນທີ 21 ມິຖຸນາ 2024 ໂດຍການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ນາງ ປິ່ນຄຳ ລາຊະສິມມາ ກຳມະການຄະນະປະຈຳສະພາແຫ່ງຊາດ ໄດ້ສະເໜີຮ່າງກົດໝາຍ ວ່າດ້ວຍສະພາແຫ່ງຊາດ (ສະບັບປັບປຸງ)ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ (ສະບັບປັບປຸງ), ຈາກນັ້ນ, ບັນດາສະມາຊິກສະພາແແຫ່ງຊາດ ກໍໄດ້ສຸມໃສ່ປະກອບຄຳຄິດຄຳເຫັນ ໃສ່ຮ່າງກົດໝາຍສອງສະບັບດັ່ງກ່າວ ເພື່ອໃຫ້ມີເນື້ອໃນຄົບຖ້ວນສົມບູນ, ຖືກຕ້ອງ, ເພື່ອກໍານົດຫລັກການ, ລະບຽບການ, ການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າໄດ້ຮັບຜົນດີຍິ່ງຂຶ້ນ.
ທ່ານ ນາງ ປິ່ນຄຳ ລາຊະສິມມາ ໄດ້ຍົກໃຫ້ເຫັນເຖິງເຫດຜົນ ແລະ ຄວາມຈໍາເປັນໃນການສະເໜີປັບປຸງກົດໝາຍ ເຖິງວ່າໄລຍະຜ່ານມາ ໄດ້ມີຄວາມພະຍາຍາມເອົາໃຈໃສ່ ໃນການປັບປຸງກົດໝາຍ 2 ສະບັບດັ່ງກ່າວ ຫລາຍຄັ້ງແລ້ວກໍຕາມ, ແຕ່ຜ່ານການປະເມີນການຈັດຕັ້ງປະຕິບັດ ຜ່ານມາກໍຍັງເຫັນວ່າມີຫລາຍມາດຕາ ທີ່ຈະເປັນຕ້ອງໄດ້ປັບປຸງ ເພື່ອໃຫ້ສອດຄ່ອງກັບສະພາບ ການຂະຫຍາຍຕົວທາງດ້ານເສດຖະກິດ-ສັງຄົມໄລຍະໃໝ່ ຕາມທິດສ້າງລັດຄຸ້ມຄອງດ້ວຍກົດໝາຍ ແນໃສ່ເຮັດໃຫ້ການປັບປຸງ ກົງຈັກອຳນາດລັດມີຄວາມເຂັ້ມແຂງ ແລະ ຄ່ອງຕົວກວ່າເກົ່າ, ປົກປ້ອງສິດ ແລະ ຜົນປະໂຫຍດຂອງລັດ ແລະ ຂອງປະຊາຊົນບັນດາເຜົ່າຢ່າງແທ້ຈິງ; ເພື່ອເຮັດໃຫ້ກົດໝາຍດັ່ງກ່າວ, ເປັນບ່ອນອີງໃນການເຄື່ອນໄຫວປະຕິບັດໜ້າທີ່ວຽກງານ ຂອງສະພາແຫ່ງຊາດ ໃນຖານະເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ, ເປັນອົງການສູງສຸດແຫ່ງອຳນາດລັດ, ທັງເປັນອົງການນິຕິບັນຍັດ; ສະພາປະຊາຊົນຂັ້ນແຂວງ ເປັນອົງການອຳນາດລັດຂັ້ນທ້ອງຖິ່ນ ຕົກລົງບັນຫາ ດ້ານນິຕິກຳທີ່ສຳຄັນຂອງທ້ອງຖິ່ນ, ບັນຫາສໍາຄັນພື້ນຖານຂອງທ້ອງຖິ່ນ ແລະ ຕິດຕາມກວດກາອົງການລັດ ຂັ້ນທ້ອງຖິ່ນ ໃນການເຄົາລົບ, ປະຕິບັດລັດຖະທຳມະນູນ ແລະ ກົດໝາຍ.
ຮ່າງກົດໝາຍ ວ່າດ້ວຍສະພາແຫ່ງຊາດ ສະບັບປັບປຸງ ປະກອບ 74 ມາດຕາ, ສ້າງໃໝ່ 1 ມາດຕາ ແລະ ຕັດອອກ 4 ມາດຕາ, ສ່ວນໂຄງສ້າງພາກ ແລະໝວດ ຮັກສາຄືເກົ່າ ເຊິ່ງມີ 9 ພາກ, 17 ໝວດ. ສ່ວນຮ່າງກົດໝາຍວ່າດ້ວຍສະພາປະຊາຊົນຂັ້ນແຂວງ ປະກອບມີ 73 ມາດຕາ, ສ້າງໃໝ່ 1 ມາດຕາ ແລະ ຕັດ ອອກ 5 ມາດຕາ ລວມທັງໝົດມີ 96 ມາດຕາ, ສ່ວນໂຄງສ້າງ, ພາກ ແລະ ໝວດ ຮັກສາໄວ້ຄືເກົ່າ ມີທັງໝົດ9 ພາກ, 16 ໝວດ. ຄາດວ່າຫາກກົດໝາຍ 2 ສະບັບຖືກຮັບຮອງເອົາ ແລະ ປະກາດໃຊ້ແລ້ວ ຈະໄດ້ຮັບຜົນປະໂຫຍດຫລາຍຢ່າງ ເຊັ່ນ: ຈະເຮັດໃຫ້ການຈັດຕັ້ງ ແລະ ການເຄື່ອນໄຫວວຽກງານ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສອດຄ່ອງກັບແນວທາງນະໂຍບາຍ, ຄວາມຮຽກຮ້ອງຕ້ອງການຂອງໜ້າທີ່ການເມືອງ, ສະພາບຕົວຈິງ, ມີຄວາມໂລ່ງລ່ຽນ ແລະ ເປັນເອກະພາບ; ເປັນການຮັບປະກັນໃຫ້ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງຕົນ ຕາມກົດໝາຍ.
ຂ່າວ: ກິດຕາ
ພາບ: ເກດສະໜາ
