ການພົບປະສອງຝ່າຍ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດ ແຫ່ງ ສສ ຫວຽດນາມ ຈັດຂຶ້ນໃນວັນທີ 4 ກໍລະກົດ 2024 ເພື່ອປຶກສາຫາລື ຫລາຍບັນຫາສຳຄັນ ທີ່ຈະຕ້ອງໄດ້ຮ່ວມກັນ ສືບຕໍ່ຈັດຕັ້ງປະຕິບັດໃຫ້ບັນລຸຕາມຄາດໝາຍ, ເຊິ່ງຝ່າຍລາວ ນຳໂດຍ ສະຫາຍ ຈະເລີນ ເຢຍປາວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ ແລະ ຝ່າຍຫວຽດນາມ ນຳໂດຍ ສະຫາຍ ຫງວຽນ ຄັກ ດິ້ງ ກໍາມະ ການສູນກາງພັກກອມມູນິດຫວຽດນາມ, ຮອງປະທານສະພາ ແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະ ຫວ່າງວັນທີ 3-5 ກໍລະກົດ 2024 ນີ້.
ໃນໂອກາດນີ້, ສະຫາຍ ຈະເລີນ ເຢຍປາວເຮີ ໄດ້ສະແດງຄວາມ ຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ສະຫາຍ ຫງວຽນ ຄັກ ດິ້ງ ທີ່ໄດ້ນຳພາຄະນະເດີນທາງມາຢ້ຽມຢາມ ສປປ ລາວ ໃນຄັ້ງນີ້, ພ້ອມທັງລາຍງານ ໃຫ້ຝ່າຍຫວຽດນາມຊາບກ່ຽວກັບສະ ພາບການພົ້ນເດັ່ນ ຂອງ ສປປ ລາວ, ການເຄື່ອນໄຫວຂອງສະພາ “ແຫ່ງຊາດລາວ, ພ້ອມທັງສະແດງຄວາມພາກພູມໃຈທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະ ເທດ ລາວ-ຫວຽດນາມ ຍັງສືບຕໍ່ຮັດແໜ້ນ ແລະ ເສີມຂະຫຍາຍຂຶ້ນຢ່າງບໍ່ຢຸດຢັ້ງ ສະແດງອອກໃນການແລກປ່ຽນການຢ້ຽມຢາມ ຂອງຄະນະຜູ້ແທນການນໍາຂັ້ນສູງ ລະຫວ່າງ ສອງພັກ, ສອງລັດ ນັບທັງສູນກາງ ແລະ ທ້ອງຖິ່ນ ຢ່າງເປັນປົກກະຕິ ແລະ ຕໍ່ເນື່ອງ.
ສອງຝ່າຍ ໄດ້ເພີ່ມທະວີຮັດແໜ້ນ ສາຍພົວພັນມິດຕະ ພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ໄດ້ຮັບການສ້າງຕັ້ງ ແລະ ຖະນຸຖະໜອມ ໂດຍຮຸ່ນການນໍາທຳອິດ ຂອງສອງປະເທດ. ການຮ່ວມມືດ້ານການຄ້າ, ການລົງ ທຶນ, ຄົມມະນາຄົມຂົນສົ່ງ ໄດ້ມີຄວາມຄືບໜ້າ ສະແດງອອກໃນ 6 ເດືອນຕົ້ນປີ 2024 ບໍລິມາດການແລກປ່ຽນສິນຄ້າບັນລຸໄດ້ 779.6 ລ້ານໂດລາສະຫະລັດ, ຫວຽດນາມ ກໍຈັດຢູ່ໃນອັນດັບແຖວໜ້າ ຂອງຜູ້ລົງທຶນຕ່າງປະເທດຢູ່ ສປປ ລາວ ລວມມີ 241 ໂຄງການ, ມູນຄ່າທຶນຈົດທະບຽນທັງໝົດ 5,47 ຕື້ໂດລາສະຫະ ລັດ ແລະ ທຶນການຊ່ວຍເຫລືອລ້າ ປະຈໍາປີ 2024 ມູນຄ່າ 719,2 ຕື້ກວ່າດົງ ແກ່ການພັດທະນາຊັບພະຍາກອນມະນຸດຢູ່ ສປປ ລາວ.
ສະຫາຍ ຈະເລີນ ເຢຍປາວເຮີ ຍັງໄດ້ຍົກໃຫ້ເຫັນການພົວ ພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງ ຊາດຫວຽດນາມ ເຊິ່ງໄດ້ຮັບການເສີມຂະຫຍາຍ ທັງທາງກວ້າງ ແລະ ທາງເລິກສະເໝີມາ. ນອກນັ້ນ, ຍັງມີການພົວພັນຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ຢ່າງໜັກແໜ້ນ ໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນ ກອງປະຊຸມໃຫຍ່ AIPA, IPU, APFF ແລະ ອື່ນໆ.
ສຳລັບ ທິດທາງແຜນການພົວພັນຮ່ວມມື ລະຫວ່າງ ສອງສະພາແຫ່ງຊາດ ໃນຕໍ່ໜ້າ ສະຫາຍ ຈະເລີນ ເຢຍປາວເຮີ ສະເໜີ ໃຫ້ສືບຕໍ່ຈັດຕັ້ງປະຕິບັດເນື້ອໃນຈິດໃຈ ຂອງບົດບັນທຶກ ວ່າດ້ວຍການຮ່ວມມື (MOU) ລະຫວ່າງ ສອງສະພາແຫ່ງຊາດ ລາວ- ຫວຽດນາມ, ລະຫວ່າງ ສອງຄະນະເລຂາທິການສະພາແຫ່ງຊາດລາວ ແລະ ກໍາມາທິການທີ່ກ່ຽວຂ້ອງ ໃຫ້ເປັນຮູບປະທຳ; ຈະສືບຕໍ່ຊຸກຍູ້ການຈັດຕັ້ງປະຕິບັດ ບັນດາສັນຍາ, ສົນທິສັນຍາ ແລະ ຂໍ້ ຕົກລົງ ລະຫວ່າງ ສອງລັດຖະບານ ກໍຄື ຜົນຂອງກອງປະຊຸມ ຂອງການນໍາຂັ້ນສູງ ຂອງສອງພັກ, ສອງລັດ ແລະ ບັນດາໂຄງ ການຮ່ວມມືຂອງສອງປະເທດ; ຈະສືບຕໍ່ຊຸກຍູ້ການພົວພັນຮ່ວມ ມືທາງດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສອງປະເທດ ໃຫ້ຂະຫຍາຍຕົວສູງຂຶ້ນ ສົມຄູ່ກັບການພົວພັນຮ່ວມມືດ້ານການເມືອງ; ສືບຕໍ່ຮ່ວມມືກັນ ສ້າງປຶ້ມ 50 ປີ ແຫ່ງສາຍພົວພັນ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດ ແຫ່ງ ສສ ຫວຽດນາມ, ການຮ່ວມມືຮອບດ້ານ ແລະ ພັດທະນາ ເພື່ອເປັນມໍລະດົກໃຫ້ຄົນຮຸ່ນໜຸ່ມໄດ້ສຶກສາ, ສືບທອດ ແລະ ປົກປັກຮັກສາສາຍພົວພັນ ແບບພິເສດ ລາວ- ຫວຽດນາມ ມີໜຶ່ງດຽວໃນໂລກ ໃຫ້ໝັ້ນຄົງຕະຫລອດໄປ; ສືບຕໍ່ໃຫ້ບົດຮຽນດ້ານການສ້າງນິຕິກໍາຕ່າງໆ ທີ່ຕິດພັນກັບການສ້າງ ແລະ ປັບປຸງກົດໝາຍ ໃຫ້ສະມາຊິກສະພາແຫ່ງຊາດ ແລະ ບັນດາຂະແໜງການທີ່ກ່ຽວຂ້ອງ ເພື່ອສ້າງລັດໃຫ້ຄຸ້ມຄອງດ້ວຍກົດ ໝາຍ, ພ້ອມນີ້ ຍັງໄດ້ສະເໜີໃຫ້ສືບຕໍ່ຝຶກອົບຮົມພາສາຫວຽດ ນາມ ແກ່ພະນັກງານ ຂອງສະພາແຫ່ງຊາດລາວ ໃນຊຸດຕໍ່ໄປ ແລະ ສືບຕໍ່ສະໜັບສະໜູນ ແລະ ຮ່ວມມືກັນ ໃນການເຄື່ອນໄຫວ ໃນອົງການລັດຖະສະພາພາກພື້ນ-ສາກົນ ແລະ ໃນທ້າຍເດືອນຕຸລາ 2024 ທີ່ຈະມາເຖິງນີ້, ສະພາແຫ່ງຊາດລາວ ຈະເປັນເຈົ້າພາບ ຈັດກອງປະຊຸມໃຫຍ່ໄອປາ (AIPA) ຄັ້ງທີ 45, ຫວັງຢ່າງຍິ່ງວ່າ ສະ ພາແຫ່ງຊາດຫວຽດນາມ ຈະສືບຕໍ່ໃຫ້ການຮ່ວມມື, ສະໜັບ ສະໜູນ ແລະ ຊ່ວຍເຫລືອ ສປປ ລາວ ໃນການປະຕິບັດພັນທະສາກົນ ໃຫ້ມີຜົນສໍາເລັດ.
ສະຫາຍ ຈະເລີນ ເຢຍປາວເຮີ ຍັງໄດ້ຕີລາຄາສູງ ແລະ ຊົມ ເຊີຍ ຕໍ່ບັນດາຜົນສໍາເລັດອັນໃຫຍ່ຫລວງຮອບດ້ານ ທີ່ປະຊາຊົນຫວຽດນາມອ້າຍນ້ອງ ຍາດມາໄດ້ ພາຍໃຕ້ການນໍາພາອັນສະ ຫລາດສ່ອງໃສ ຂອງພັກກອມມູນິດຫວຽດນາມ ໃນພາລະກິດພັດທະນາປະເທດຊາດ ຕາມມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ, ການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ແຫ່ງຊາດ 5 ປີ (2021-2025). ພິເສດ, ແມ່ນຜົນສໍາເລັດຂອງການດໍາເນີນ ກອງປະ ຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດຫວຽດນາມ ຊຸດທີ XV ໃນທ້າຍເດືອນຜ່ານມາ, ເຖິງແມ່ນວ່າໃນສະພາບການພາກພື້ນ ແລະ ສາກົນ ສືບຕໍ່ຜັນແປ ໄປຢ່າງສັບສົນ ແລະ ຄາດຄະເນໄດ້ຍາກ ແຕ່ ສສ ຫວຽດນາມ ສືບຕໍ່ພັດທະນາເສດຖະກິດ-ສັງຄົມ ໄດ້ຢ່າງໜັກແໜ້ນ, ເສດຖະກິດສືບຕໍ່ຂະຫຍາຍຕົວ ຢ່າງບໍ່ຢຸດຢັ້ງ ເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນເລື້ອຍໆ, ການພົວພັນການຕ່າງປະເທດ ໄດ້ຮັບການເປີດກວ້າງ, ບົດບາດອິດທິພົນ ຂອງ ສສ ຫວຽດນາມ ນັບມື້ນັບສູງເດັ່ນຂຶ້ນ ໃນເວທີພາກພື້ນ ແລະ ສາກົນ.
