ວັນທີ 4 ກໍລະກົດ 2024 ທີ່ສະພາແຫ່ງຊາດລາວ, ສອງສະພາແຫ່ງຊາດ ລາວ-ຫວຽດນາມ ຈັດສໍາມະນາວິທະຍາສາດ ກ່ຽວກັບບົດຮຽນການປັບປຸງລັດຖະທໍາມະນູນ ເພື່ອແລກປ່ຽນບົດຮຽນ ກ່ຽວກັບການສ້າງ ແລະ ປັບປຸງລັດຖະທຳມະນູນ ໂດຍການເຂົ້າຮ່ວມຂອງ ສະຫາຍ ຈະເລີນ ເຢຍປາວເຮີ ກໍາມະການສູນກາງພັກ, ຮອງປະທານສະພາແຫ່ງຊາດ, ສະຫາຍ ຫງວຽນ ຄັກ ດິ້ງ ກໍາມະການສູນກາງພັກກອມມູນິດຫວຽດນາມ, ຮອງປະທານ ສະພາແຫ່ງຊາດ ສສ ຫວຽດນາມ.
ຊຸດສໍາມະນາຄັ້ງນີ້, ຄະນະຜູ້ແທນ ສະພາແຫ່ງຊາດ ສສ ຫວຽດນາມ ໄດ້ບັນລະຍາຍເອກະສານຕ່າງໆ ທີ່ກ່ຽວຂ້ອງກັບການປັບປຸງລັດຖະທໍາມະນູນ ຂອງ ສສ ຫວຽດນາມ ເປັນຕົ້ນ ແນວຄິດ, ທັດສະນະຊີ້ນຳ ຂອງພັກກອມມູນິດ ຫວຽດນາມ ໃນຂະບວນການສ້າງລັດຖະທຳມະນູນ ປີ 2013; ການຫັນທັດສະ ນະໃຫ້ເປັນລະບົບຮອບດ້ານ, ແນວຄິດຊີ້ນຳຂອງພັກ ກ່ຽວກັບລະບອບການເມືອງ, ຫລັກການຈັດຕັ້ງອຳນາດລັດ, ສິດທິມະນຸດ, ສິດ ແລະ ພັນທະຂອງພົນລະເມືອງ ກຳນົດໃນລັດຖະທຳມະນູນ ປີ 2013; ການຫັນທັດສະນະ ໃຫ້ເປັນລະບົບຮອບດ້ານ, ແນວຄິດຊີ້ນຳຂອງພັກ ກ່ຽວກັບກົງຈັກການຈັດຕັ້ງ ກຳນົດໃນລັດຖະທຳມະນູນ ປີ 2013, ເຊິ່ງບັນດາບົດຮຽນເຫລົ່ານີ້ ຈະເປັນບົດຮຽນທີ່ມີຄວາມໝາຍ ແລະ ສໍາຄັນຫລາຍ ແກ່ຄະນະກໍາມະການລະດັບຊາດ ປັບປຸງລັດຖະທໍາມະນູນ ສະບັບປີ 2015 ຂອງ ສປປ ລາວ ໃນການນໍາເອົາບົດຮຽນ ແລະ ປະສົບການຂອງ ສສ ຫວຽດນາມ ໄປໝູນໃຊ້ເຂົ້າໃນການປັບປຸງລັດຖະທໍາມະນູນ ສະບັບປີ 2015 ຂອງ ສປປ ລາວ ໃຫ້ມີເນື້ອໃນສົມບູນ, ຮັດກຸມ ເພື່ອຮັບປະກັນການຈັດຕັ້ງ ແລະ ການເຄື່ອນໄຫວວຽກງານ ຂອງກົງຈັກການຕັ້ງຂອງພັກ, ລັດ ຂອງ ສປປ ລາວ ໃຫ້ມີຄວາມເຂັ້ມແຂງ, ຮັບປະກັນການຮັບໃຊ້ສິດ ແລະ ຜົນປະໂຫຍດອັນຊອບທໍາ ຂອງປະຊາຊົນລາວບັນດາເຜົ່າຢ່າງແທ້ຈິງ.
ຜູ້ແທນກອງປະຊຸມ ລາວ-ຫວຽດນາມ ໄດ້ແລກປ່ຽນຄວາມຄິດເຫັນ ຢ່າງກົງໄປກົງມາ, ມີລັກສະນະສ້າງສັນ ແລະ ວິທະຍາສາດ ໂດຍສຸມໃສ່ບົດຮຽນ ກ່ຽວກັບການສ້າງ ແລະ ປັບປຸງລັດຖະທຳມະນູນ ຂອງທັງສອງປະເທດ. ຜົນສຳເລັດຂອງຊຸດສຳມະນາວິທະຍາສາດ ກ່ຽວກັບການປັບປຸງລັດຖະທຳມະນູນ ຄັ້ງນີ້ ຈະເປັນການເສີມຂະຫຍາຍ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ທີ່ເປັນມູນເຊື້ອອັນດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເວົ້າລວມ ແລະ ເວົ້າສະເພາະ ການຜັນຂະຫຍາຍແຜນການຮ່ວມມື ແລະ ການພົວພັນທີ່ເປັນມູນເຊື້ອ ລະຫວ່າງ ສອງສະພາແຫ່ງຊາດ ລາວ ແລະ ຫວຽດນາມ ໃຫ້ແຕກດອກອອກຜົນຍິ່ງໆຂຶ້ນ.
