ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະພາແຫ່ງຊາດ ຮັບຮອງເອົາພົນໂທ ວິໄລ ຫຼ້າຄຳຟອງ ຄະນະເລຂາທິການສູນກາງພັກ-ຮອງລັດຖະມົນຕີກະຊວງປ້ອງກັນປະເທດເປັນລັດຖະມົນຕີກະຊວງປ້ອງກັນຄວາມສະຫງົບ

ໃນວັນທີ 5 ທັນວາ 2018. ກອງປະຊຸມສະໄໝສາມັນເທື່ອທີ່ 6 ຂອງສະພາແຫ່ງຊາດຊຸດທີ່ 8 ສືບຕໍ່ດຳເນີນໄປພາຍໃຕ້ການເປັນປະທານຂອງ ພົນໂທ ແສງນວນ ໄຊຍະລາດ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດໄດ້ຮັບຟັງ ແລະ ພິຈາລະນາ ປະກອບຄຳເຫັນໃສ່ໜັງສືສະເໜີຂອງນາຍົກລັດຖະມົນກ່ຽວກັບການປັບປຸງຄະນະລັດຖະບານໂດຍແຕ່ງຕັ້ງ ພົນໂທ ວິໄລ ຫຼ້າຄຳຟອງ ຄະນະເລຂາທິການສູນກາງພັກ-ຮອງລັດຖະມົນຕີກະຊວງປ້ອງກັນປະເທດເປັນລັດຖະມົນຕີກະຊວງປ້ອງກັນຄວາມສະຫງົບ ແລະ ຍົກຍ້າຍພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບໄປຮັບໜ້າທີ່ໃໝ່ຢູ່ກະຊວງປ້ອງກັນປະເທດ. ການແຕ່ງຕັ້ງລັດຖະມົນຕີກະຊວງປ້ອງກັນຄວາມສະຫງົບຄັ້ງນີ້ມີສະມາຊິກສະພາແຫ່ງຊາດອອກຄຳເຫັນຈຳນວນ 10 ທ່ານ ໃນນີ້ ພົນຈັດຕະວາ ພູມີ ວັນດີໄຊ ສະມາຊິກສະພາແຫ່ງຊາດເຂດເລືອກຕັ້ງທີ່ 18 ແຂວງໄຊສົມບູນ ມີຄຳເຫັນບາງຕອນວ່າ: ການແຕ່ງຕັ້ງລັດຖະມົນຕີກະຊວງປ້ອງກັນຄວາມສະຫງົບຄັ້ງນີ້ມີຄວາມເໝາະ ແລະ ມີມາດຕະຖານທີ່ດີ.

ທ່ານ ນາງ ສຸວັນເພັງ ບຸບຜານຸວົງ ສະມາຊິກສະພາແຫ່ງຊາດເຂດເລືອກຕັ້ງທີ່ 13 ແຂວງສະຫວັນນະເຂດມີຄຳເຫັນວ່າ: ລັດຖະມົນຕີກະຊວງປ້ອງກັນຄວາມສະຫງົບຄົນໃໝ່ມີມາດຕະຖານ-ເງື່ອນໄຂພຽງພໍເໝາະສົມແກ່ການເຮັດໜ້າທີ່ ທີ່ລັດຖະບານມອບໝາຍໃຫ້.

ຫຼັງຈາກລົງຄະແນນສຽງຮັບຮອງເອົາການຍແຕ່ງຕັ້ງລັດຖະມົນຕີກະຊວງປ້ອງກັນຄວາມສະຫງົບແລ້ວສະມາຊິກສະພາແຫ່ງຊາດໄດ້ຄົ້ນຄວ້າປະກອບຄຳເຫັນໃສ່ໜັງສືສະເໜີຂອງນາຍົກລັດຖະມົນຕີກ່ຽວກັບການແຕ່ງຕັ້ງຜູ້ວ່າການທະນາຄານແຫ່ງ ສປປລາວ ໂດຍແຕ່ງຕັ້ງ ທ່ານ ສອນໄຊ ສິດພະໄຊ ຮັກສາການຜູ້ວ່າການແຫ່ງ ສປປ ລາວເປັນຜູ້ວ່າການທະນາຄານແຫ່ງ ສປປ ລາວ.

ທ່ານ ນາງບົວຄຳ ທິບພະວົງ ສະມາຊິກສະພາແຫ່ງຊາດເຂດເລືອກຕັ້ງທີ່ 1 ນະຄອນຫຼວງວຽງຈັນມີຄຳເຫັນວ່າ: ການແຕ່ງຕັ້ງຜູ້ວ່າການທະນາຄານແຫ່ງ ສປປ ລາວ ຄົນໃໝ່ມີຄວາມຈຳເປັນແຕ່ສະເໜີໃຫ້ເອົາໃຈໃສ່ຄຸ້ມຄອງເງິນໃຫ້ເຂົ້າສູ່ລະບົບ ແລະ ເປັນໄປຕາມກົດໝາຍ.

ຫຼັງຈາກປະກອບຄຳຄິດເຫັນແລ້ວ ສະມາຊິກສະພາແຫ່ງຊາດໄດ້ລົງຄະແນນສຽງຮັບຮອງເອົາການແຕ່ງຕັ້ງຜູ້ວ່າການທະນາຄານແຫ່ງ ສປປ ລາວ ຄົນໃໝ່ດ້ວຍຄະແນນສຽງເຫັນດີເປັນສ່ວນຫຼາຍ.