ສະມາຄົມການທູດແຫ່ງ ສປ ຈີນ ໄດ້ຈັດພິທີປິດໂຄງການຂອງສູນແລກປ່ຽນຂ່າວສານສາກົນ ປະຈຳປີ 2024 ທີ່ ນະຄອນຫລວງປັກກິ່ງ ໂດຍມີທ່ານ ນາງ ຮົ້ວ ຊຸ່ນຫຍິງ ຮອງລັດຖະມົນຕີກະຊວງການຕ່າງປະເທດຈີນ, ທ່ານ ອູ ໄຫຫລົງ ປະທານສະມາຄົມການທູດແຫ່ງ ສປ ຈີນ ພອ້ມດ້ວຍຜູ້ຕາງໜ້າຈາກພາກສ່ວນກ່ຽວຂ້ອງຕ່າງໆ ແລະ ສື່ມວນຊົນ 100 ກວ່າຄົນ ມາຈາກ 97 ປະເທດ ທີ່ໄດ້ສຳເລັດໃນການໂຄງການນີ້ ເຂົ້າຮ່ວມ.
ໃນໂອກາດນີ້,ທ່ານ ນາງ ຮົ້ວ ຊຸ່ນຫຍິງ ກ່າວບາງຕອນສຳຄັນວ່າ: ຜ່ານການເຂົ້າຮ່ວມໂຄງການນີ້ເປັນເວລາ 4 ເດືອນ ເລີ່ມແຕ່ເດືອນມີນາ-ມິຖຸນາ ຊີ້ໃຫ້ເຫັນວ່າ ການພັດທະນາທີ່ມີຄຸນນະພາບສູງ ແລະ ການເປີດປະຕູສູ່ລະສູງຂອງຈີນ ແມ່ນປາສະຈາກບໍ່ໄດ້ຈາກປະເທດອື່ນໆໃນໂລກ. ແຕ່ປີ 2013-2021 ການປະກອບສວ່ນຂອງຈີນ ເຂົ້າໃນການເຕີບໂຕຂອງເສດຖະກິດໂລກມີເຖິງ 38,6 % ເຊິ່ງໄດ້ລື່ນກາຍ ກຸ່ມ G7 ທັງໝົດ.
ຈີນຍັງຄົງເປັນຜູ້ຂັບເຄື່ອນ ຂອງການເຕີບໂຕທາງດ້ານເສດຖະກິດໂລກ ແລະຈີນຍິນດີແບ່ງປັນໂອກາດກັບປະເທດອື່ນໆ ເພື່ອບັນລຸການພັດທະນາຮ່ວມກັນຕໍ່ໄປ ແລະຈີນເປັນຜູ້ປົກປອ້ງສັນຕິພາບແລະສະຖຽນລະພາບຂອງໂລກມາໂດຍຕະຫລອດ.
ທ່ານນາງ ຮົ້ວ ຊຸ່ນຫຍິງກ່າວຕື່ມວ່າ: ປີນີ້ເປັນປີ ຄົບຮອບ 10 ປີຂອງການສ້າງຕັ້ງສູນແລກປ່ຽນສື່ມວນຊົນສາກົນແຫ່ງ ສປ ຈີນ ຕະຫລອດໄລຍະ 10 ປີຜ່ານມາ ສູນນີ້ໄດ້ຂະຫຍາຍເພີ່ມຂຶ້ນຈາກສູນແລກປ່ຽນສຳລັບພາກພື້ນດຽວ ກາຍມາເປັນສູນແລກປ່ຽນຂ່າວລະດັບສາກົນສຳລັບພາກພື້ນທີ່ກວມເອົາທົ່ວໂລກ ໂດຍມີນັກຂ່າວ 620 ຄົນຈາກ 141 ປະເທດທົ່ວໂລກໄດ້ເຂົ້າຮ່ວມໂຄງການນີ້. ສປ ຈີນ ຂໍສະແດງຄວາມຂອບໃຈ ທີ່ຜູ້ເຂົ້າຮ່ວມໃຫ້ຄວາມສົນໃຈກັບຈີນຢ່າງຕໍ່ເນື່ອງ, ລາຍງານສິ່ງທີ່ດີໆກ່ຽວກັບຈີນ,ຮັກປະເທດຈີນ ແລະໃຫ້ການສະໜັບສະໜູນຈີນໃນທາງທີ່ດີ, ເສີມຂະຫຍາຍຄວາມເຂົ້າໃຈເຊິ່ງກັນແລະກັນທີ່ຖືກຕອ້ງ, ເປັນມິດທີ່ດີ ແລະການຮວ່ມມືລະຫວ່າງປະເທດກັບ ສປ ຈີນ.
ສ່ວນ ທ່ານ ອູ ໄຫຫລົງ ປະທານສິມາຄົມການທູດຈີນ ໄດ້ກ່າວວ່າ: ຕະຫລອດໄລຍະ 4 ເດືອນຜ່ານມາ ສື່ມວນຊົນໄດ້ໄປຢ້ຽມຢາມ 12 ແຂວງຂອງຈີນ ໄດ້ຮູ້ໄດ້ເຫັນປະເທດຈີນທີ່ມີປະຫວັດສາດແລະອະລິຍະທຳອັນຮຸ່ງເຮືອງ ແລະເຫັນວ່າປະເທດຈີນຍັງຄົງພັດທະນາແລະກ້າວໜ້າຕໍ່ໄປ, ເຫັນປະເທດຈີນສະອາດສວຍງາມ, ມີຄວາມສະຫງົບສຸກ ປະຊາຊົນມີຄວາມປອດໄພ, ແຕ່ເຖິງຢ່າງໃດກໍ່ຕາມ ຈີນຍັງມີຄວາມທ້າທາຍຫລາຍຢ່າງ ສະນັ້ນຈີນ ຈຶ່ງມີເປົ້າໝາຍໃນການສ້າງສັງຄົມນິຍົມສະໄໝໃໝ່ ເຊິ່ງມີຄວາມຈະແຈ້ງທີ່ສຸດ ແລະ ກຳລັງກ້າວໄປສູ່ເປົ້າໝາຍນີ້.
ຂ່າວ: ເພັດສະໝອນ ພົງພະໂຍສິດ
