ສະມາຄົມມິດຕະພາບປະຊາຊົນແຂວງຢຸນນານກັບຕ່າງປະເທດ ສປ ຈີນ ຢ້ຽມຢາມ ສປປ ລາວ

ຕອບສະໜອງຕາມຄຳເຊີນ ຂອງສະມາຄົມມິດຕະພາບ ລາວ -ຈີນ ຂັ້ນສູນກາງ, ສະຫາຍ ເຟີງ ຊາວຢຸນ ເລຂາທິການສະມາຄົມມິດຕະພາບປະຊາຊົນແຂວງຢຸນນານ ກັບຕ່າງປະເທດ ສປ ຈີນ ໄດ້ນໍາພາຄະນະ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ລະຫວ່າງວັນທີ 25-29 ສິງຫາ 2024.

ສະເພາະວັນທີ 26 ສິງຫາ 2024, ຄະນະຜູ້ແທນໄດ້ເຂົ້າຢ້ຽມຂ່ຳນັບ ທ່ານ ເພັດ ພົມພິພັກ ລັດຖະມົນຕີ ກະຊວງແຜນ ການ ແລະ ການລົງທຶນ, ປະທານສະມາຄົມມິດຕະພາບ ລາວ-ຈີນ ຂັ້ນສູນກາງ ເຊິ່ງທ່ານ ເພັດ ພົມພິພັກ ໄດ້ສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ການມາຢ້ຽມຢາມ ແລະເຮັດວຽກ ຂອງຄະນະຜູ້ແທນດັ່ງກ່າວ ຖືເປັນການປະກອບສ່ວນເສີມ ຂະຫຍາຍ ແລະເພີ່ມພູນຄູນສ້າງສາຍພົວພັນມິດຕະພາບ ແລະການຮ່ວມມືແບບຄູ່ຮ່ວມຍຸດທະສາດ, ຮອບດ້ານ, ໝັ້ນຄົງຍາວ ນານ ຕາມທິດ 4 ດີ ແລະ ຄູ່ຮ່ວມຊາຕາກໍາ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ ແລະ ຈີນ.

ໂອກາດນີ້, ສະຫາຍ ເຟີງ ຊາວຢຸນ ໄດ້ແຈ້ງໃຫ້ຊາບຈຸດປະສົງ ຂອງການຢ້ຽມຢາມ ແລະຢືນຢັນວ່າ ສະມາຄົມຈະສືບຕໍ່ເສີມ ຂະຫຍາຍ ແລະ ຮັດແໜ້ນການພົວພັນຮ່ວມມືກັບສະມາຄົມມິດຕະພາບ ລາວ-ຈີນ ເພື່ອເຮັດບົດບາດເປັນຂົວຕໍ່ທີ່ດີ ຊຸກຍູ້ການພົວພັນຮ່ວມມື ຂອງບັນດາຂະແໜງການທີ່ສອງປະເທດເຄີຍປະຕິບັດຮ່ວມກັນ ເປັນຕົ້ນແມ່ນຊຸກຍູ້ການໄປມາຫາສູ່ກັນລະຫວ່າງປະຊາຊົນສອງປະເທດ ລາວ ແລະ ຈີນ ໂດຍສະເພາະແມ່ນປະຊາຊົນທີ່ອາໄສລຽບຕາມຊາຍແດນຮ່ວມກັນຂອງສອງປະເທດ ໃຫ້ມີການຈັດກິດຈະກໍາຮ່ວມກັນ, ແລກປ່ຽນສິນຄ້າ ເພື່ອສ້າງຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ຮ່ວມມືກັນເພື່ອພັດທະນາຊາຍແດນ ໃຫ້ກາຍເປັນເຂດຊາຍແດນແຫ່ງສັນຕິພາບ, ມິດຕະພາບ ແລະການຮ່ວມມືເພື່ອການພັດທະນາ.

ໃນໂອກາດມາຢ້ຽມຢາມ ສປປ ລາວ ຄັ້ງນີ້, ຄະນະຜູ້ແທນຍັງໄດ້ໄປສຳຫລວດ ແລະ ເກັບກຳຂໍ້ມູນສະຖານ ທີ່ຈະໃຫ້ການຊ່ວຍເຫລືອໂຄງການນ້ຳສະອາດ ຢູ່ແຂວງຫລວງພະບາງ ແລະ ແຂວງອຸດົມໄຊ (ໂຄງການນ້ຳດື່ມສະອາດແຂວງຫລວງພະບາງ“ເຊື່ອມຕໍ່ໃຈຢຸນນານ”.

ທີ່ມາ: ຂປລ