ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະມາຄົມມິດຕະພາບ ລາວ-ອາແຊັກໄບຊານ ຈັດງານພົບປະອະດີດນັກສຶກສາລາວ ຈາກປະເທດ ອາແຊັກໄບຊານ, ວັນທີ 02 ທັນວາ 2023.
ໃນວັນທີ 02 ທັນວາ 2023, ສະມາ ຄົມມິດຕະພາບ ລາວ-ອາແຊັກໄບຊານ ໄດ້ຈັດງານພົບປະອະດີດນັກສຶກສາລາວ ທີ່ຮຽນຈົບຈາກປະເທດ ອາແຊັກໄບຊານ ໃຫ້ກຽດເຂົ້າຮ່ວມງານດັ່ງກ່າວມີ ທ່ານ ທອງພັດ ອິນທະວົງ, ຮອງລັດຖະມົນຕີ ກະຊວງພະລັງງານ ແລະ ບໍ່ແຮ, ປະທານສະມາຄົມມິດຕະພາບ ລາວ-ອາແຊັກໄບຊານ, ທ່ານ ໂຊກີ ເມດດີຊາດາ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ອາແຊັກໄບຊານ ປະຈຳ ສປປ ລາວ, ທ່ານ ວາລະໄຊ ເລັ່ງສະຫັວດ, ຮອງຫົວໜ້າຄະນະພົວພັນຕ່າງປະເທດສູນກາງພັກ. ນອກນັ້ນຍັງມີ ຄະນະບໍລິຫານງານສະມາຄົມມິດຕະພາບ ລາວ-ອາແຊັກໄບຊານ ແລະ ບັນດາອະດີດນັກສຶກສາລາວ ຈາກ ປະເທດ ອາແຊັກໄບຊານ ເຂົ້າຮ່ວມທັງໜົດ 80 ກ່ວາທ່ານ.
ງານພົບປະຄັ້ງນີ້ ກໍ່ເພື່ອເປັນການຮັດແໜ້ນສາຍພົວພັນມິດຕະພາບ ແລະ ເຕົ້າໂຮມຄວາມສາມັກຄີ ລະຫ່ວາງ ສະມາຄົມມິດຕະພາບ ລາວ-ອາແຊັກໄບຊານ, ສະຖານທູດອາແຊັກໄບຊານ ປະຈຳ ລາວ ແລະ ອະດີດນັກສຶກສາລາວ ຈາກ ປະເທດອາແຊັກໄບຊານ ທັງເປັນການປະກອບສ່ວນພັດທະນາ ແລະ ເສີມຂະຫຍາຍສາຍພົວພັນມິດຕະພາບການຮ່ວມມືທີ່ດີ ລະຫ່ວາງ ສອງປະເທດ ແລະ ປະຊາຊົນສອງຊາດ ລາວ ແລະ ອາແຊັກໄບຊານ.
ສປປ ລາວ ແລະ ອາແຊັກໄບຊານ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 22 ພຶດສະພາ 1995ເປັນເວລາ 28 ປີ ທີ່ທັງສອງປະເທດໄດ້ຖະນຸຖະໜອມ ແລະ ເສີມຂະຫຍາຍສາຍພົວພັນມິດຕະພາບ ທີ່ມີມາແຕ່ຍາວນານໃຫ້ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ. ສຳລັບ ສະມາຄົມມິດຕະພາບ ລາວ-ອາແຊັກໄບຊານ ກໍ່ໄດ້ເຄື່ອນໄຫວຕາມພາລະບົດບາດ, ເງື່ອນໄຂ ແລະ ຄວາມສາມາດ ຮ່ວມກັບພາກສ່ວນກ່ຽວຂ້ອງ ຂອງ ອາແຊັກໄບຊານ ໂດຍສະເພາະກໍ່ແມ່ນ ສະຖານທູດອາແຊັກໄບຊານ ປະຈຳ ລາວ ທີ່ມີສຳນັກງານຕັ້ງ ຢູ່ ຮ່າໂນ້ຍ ສສ. ຫວຽດນາມ. ໂດຍຈັດກິດຈະກຳຮ່ວມກັນເນື່ອງໃນໂອກາດວັນສຳຄັນຕ່າງໆ ຂອງ ສອງປະເທດ ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ທີ່ ມີມູນເຊື້ອອັນດີງາມ ແລະ ການຮ່ວມມື ລະຫ່ວາງ ສອງປະເທດ ແລະ ປະຊາຊົນສອງຊາດ ລາວ-ອາແຊັກໄບຊານ ໃຫ້ໄດ້ຮັບການພັດທະນາ ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ ແລະ ເພື່ອປະກອບສ່ວນຢ່າງຕັ້ງໜ້າເຂົ້າໃນພາລະກິດ ສັນຕິພາບ, ມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.
ໃນໂອກາດດັ່ງກ່າວ, ທ່ານ ໂຊກີ ເມດດີຊາດາ ( SHOVGI MEHDIZADA ) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ອາແຊັກໄບຊານ ປະຈຳ ສປປ ລາວ ໄດ້ມອບຫຼຽນທີ່ລະນຶກສະເຫຼີມສະຫຼອງ ຄົບຮອບ 100 ປີ ຂອງ ວິທະຍາໄລອຸດສາຫະກຳ ແລະ ນ້ຳມັນລັດອາແຊັກໄບຊານ ໃຫ້ແກ່ ທ່ານ ປອ.ນາງ ສູນທອນ ໄຊຍະຈັກ, ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ, ສຈ.ປອ ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກະຊວງເຕັກໂນໂລຊີ ແລະ ການສືສານ, ທ່ານ ສົມດີ ບຸນຄຸ້ມ, ອະດີດຮອງຫົວໜ້າຄະນະພົວພັນຕ່າງປະເທດສູນກາງພັກ ແລະ ທ່ານ ປອ. ນາມ ວິຍະເກດ, ອະດີດລັດຖະມົນຕີ ປະຈຳ ສຳນັກງານນາຍົກລັດຖະມົນຕີ ທີ່ມີຜົນງານດີເດັ່ນປະກອບສ່ວນເຂົ້າໃນການພົວພັນຮ່ວມມື ແລະ ເສີມຂະຫຍາຍສາຍພົວພັນມິດຕະພາບ ລະຫ່ວາງ ສປປ ລາວ ແລະ ອາແຊັກໄບຊານ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ