ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະມາຄົມລາວ-ໄທ, ໄທ-ລາວ ປຶກສາຫາລືກ່ຽວກັບການກະກຽມ ຈັດກອງປະຊຸມຮ່ວມຂອງສອງສະມາຄົມ ປະຈໍາປີ 2018

ໃນຕອນເຊົ້າຂອງວັນທີ 14 ກັນຍາ 2018 ນີ້ ທີ່ສະໂມສອນຫ້ອງວ່າການແຂວງ ໄຊຍະບູລີ, ໄດ້ຈັດກອງປະຊຸມປຶກສາຫາລືກ່ຽວກັບການກະກຽມ ຈັດກອງປະຊຸມຮ່ວມຂອງສອງສະມາຄົມ ລາວ-ໄທ, ໄທ-ລາວ ປະຈໍາປີ 2018 ທີ່ຈະໄດ້ຈັດຂຶ້ນໃນກາງເດືອນ ພະຈິກ ປີນີ້, ເຂົ້າຮ່ວມກອງປະຊຸມມີ ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງ ໄຊຍະບູລີ, ມີທ່ານ ສຸກກະເສີມ ໂພທິສານ , ເລຂາທິການສະມາຄົມ ລາວ-ໄທ, ທ່ານ ປັນນະສານ ຈັນສົມສັກ, ເລຂາທິການສະມາຄົມ ໄທ-ລາວ, ມີຕາງໜ້າພະແນກການທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມເກືອບ 30 ຄົນ.

ກອງປະຊຸມດັ່ງກ່າວໂດຍມີຈຸດປະສົງເພື່ອປຶກສາຫາລືກ່ຽວກັບການກະກຽມຈັດກອງປະຊຸມຮ່ວມຂອງສອງສະມາຄົມ ລາວ-ໄທ, ໄທ-ລາວ ປະຈໍາປີ 2018 ແລະ ການທອດກະຖິນພະຣາດສະທານຂອງເຈົ້າຊີວິດ ແຫ່ງຣາສະອານາຈັກໄທ ທີ່ວັດ ສີສະຫວ່າງວົງ ເມືອງ ແລະ ແຂວງ ໄຊຍະບູລີ ລະຫວ່າງວັນທີ 17-18 ພະຈິກ ປີນີ້, ພ້ອມດຽວກັນ ຜູ້ແທນທັງສອງຝ່າຍກໍ່ໄດ້ປຶກສາຫາລືກັນໂດຍສະເພາະແມ່ນ: ການກະກຽມສະຖານທີ່ຫ້ອງປະຊຸມ ແລະ ເນື້ອໃນ-ວາລະດໍາເນີນກອງປະຊຸມ, ສະຖານທີ່ຈັດງານທອດກະຖິນ, ສະຖານທີ່ ຈັດຕະຫຼາດນັດວາງສະແດງສິນຄ້າຂອງສອງປະເທດ, ໃນງານດັ່ງກ່າວ ຈະໄດ້ມີການແຮ່ຂອງຂະບວນຊ້າງຄໍາຮູ້, ມີຕະຫຼາດນັດວາງສະແດງສິນຄ້າ, ມີການສອນກິລາບານເຕະໃຫ້ນັກຮຽນ ຍິງ-ຊາຍ ເຊິງຈະມີຄູຝຶກທີ່ມີຄວາມຊໍານານຈາກປະເທດໄທມາຝຶກສອນໃຫ້, ມີການກວດສຸຂະພາບຟີໃຫ້ນັກຮຽນ, ມີການກວບເຊັກລົດຟີຈາກບໍລິສັດ TOYOTA ທີ່ມາຈາກປະເທດໄທ, ມີການຄົບງັນ, ມີການສະແດງສິລະປະຂອງນ້ອງນັກຮຽນແຕ່ລະແຫ່ງພາຍໃນເມືອງ ໄຊຍະບູລີ ແລະ ມີນັກຮ້ອງຊື່ດັງຈາກປະເທດໄທ ແລະ ສປປລາວ ມາສະແດງໃຫ້ຊາວໄຊຍະບູລີໄດ້ຮັບຊົມ,  ມີການສົມໂພດພະ, ມີການຕັກບາດຖວາຍສັງຄະທານແກ່ພະສົງສໍາມະເນນ ແລະ ມີການແຮ່ກະຖິນ, ຈາກນັ້ນກໍ່ໄດ້ລົງກວດເບິ່ງສະຖານທີ່ຕົວຈິງທີ່ຈະຈັດງານ ແລະ ສະຖານທີ່ຕະຫຼາດນັດຕື່ມອີກ.

 

ຂ່າວຈາກ: ຫ້ອງວ່າການແຂວງ ໄຊຍະບູລີ

ໂດຍ: ອຸ່ນເຮືອນ ໂພທິລັກ