ໃນຕອນເຊົ້າຂອງວັນທີ 2 ພະຈິກ 2020 ນີ້ ທີ່ສະໂມສອນຫລັງເກົ່າຂອງແຂວງ ເມືອງຜົ້ງສາລີ ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບ ແຂວງຜົ້ງສາລີ ໄດ້ຈັດພິທີມອບ-ຮັບໃບຢັ້ງຢືນຖິ່ນກຳເນີດຊາກໍແມນ ໃຫ້ແກ່ສະມາຄົມສົ່ງເສີມຊາກໍແມນ ຂອງເມືອງຜົ້ງສາລີ, ແຂວງຜົ້ງສາລີ ໂດຍການເຂົ້າຮ່ວມຂອງທ່ານ ຄຳຜອຍ ວັນນະສານ ເລຂາພັກແຂວງ, ເຈົ້າແຂວງຜົ້ງສາລີ; ມີທ່ານ ປອ ສຸລິອຸດົງ ສູນດາລາ ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ; ມີບັນດາທ່ານຈາກກົມທີກ່ຽວຂ້ອງ, ຫົວຫນ້າພະແນກ, ພ້ອມພາກສວ່ນທີ່ກ່ຽວຂ້ອງຈາກຂັ້ນສູນກາງ, ຂັ້ນແຂວງ ແລະ ເມືອງເຂົ້າຮ່ວມນຳ.

ໃນພິທີທ່ານ ຄຳຈັນ ສິດທິລາດ ຫົວຫນ້າພະແນກວິທະຍາສາດ ແລະ ເຕັກໂນໂລຊີແຂວງຜົ້ງສາລີ ໄດ້ຂຶ້ນກ່າວຈຸດປະສົງ.ຈາກນັ້ນທ່ານ ຄຳຜອຍ ວັນນະສານ ເລຂາພັກແຂວງ, ເຈົ້າແຂວງຜົ້ງສາລີ ແລະ ທ່ານ ປອ ສຸລິອຸດົງ ສູນດາລາ ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ພ້ອມຄະນະນຳພາກສວ່ນທີ່ກ່ຽວຂ້ອງໄດ້ຂຶ້ນຕັດແຖບຜ້າ ແລະ ລັ່ນຄ້ອງ 9 ບາດ ເປີດພິທີຢ່າງເປັນທາງການ,

ໃນພິທີທ່ານ ປອ ນາງ ຂັນລາສີ ແກ້ວບຸນພັນ ຫົວຫນ້າກົມຊັບສິນທາງປັນຍາ  ກະຊວງວິທະຍາສາດ-ເຕັກໂນໂລຊີ ໄດ້ຂຶ້ນລາຍງານການກະກຽມຈົດຖິ່ນກຳເນີດຊາກໍແມນ ພ້ອມທັງມອບໃບຢັ້ງຢືນຖິ່ນກຳເນີດຊາກໍແມນ ແລະ ໃບອະນຸຍາດນຳໃຊ້ກາຫມາຍຖິ່ນກຳເນີດແຫ່ງຊາດ ໃຫ້ແກ່ສະມາຄົມສົ່ງເສີມຊາກໍແມນ ຂຶ້ນກ່າວຮັບໂດຍທ່ານ ຄຳພັນ ຈັງຕິງຢົງ ປະທານສະມາຄົມສົ່ງເສີມຊາກໍແມນ.

ໂອກາດນີ້ທ່ານ ຄຳຜອຍ ວັນນະສານ ເລຂາພັກແຂວງ, ເຈົ້າແຂວງຜົ້ງສາລີ ແລະ ທ່ານ ປອ ສຸລິອຸດົງ ສູນດາລາ ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ໄດ້ພັດປ່ຽນກັນຂຶ້ນມີຄຳເຫັນ ເຊິ່ງບາງຕອນທັງສອງທ່ານກ່າວວ່າ: ການຈົດທະບຽນຢັ້ງຢືນຖິ່ນກຳເນີດຊາກໍແມນ ແມ່ນແນໃສ່ປົກປ້ອງຊື່ສຽງ ແລະ ອະນຸລັກຮັກສາຄຸນນະພາບທີມີເອກະລັກສະເພາະຂອງຊາກໍແມນ ທີ່ມີປະຫວັດຄວາມເປັນມາອັນຍາວນານ ຕິດພັນກັບວັດທະນະທຳ ແລະ ວິຖີຊີວິດຂອງປະຊາຊົນເມືອງຜົ້ງສາລີ ມາໄດ້ຫລາຍສະຕະວັດແລ້ວ ແລະ ສົ່ງເສີມໃຫ້ມີການສືບທອດພູມປັນຍາທ້ອງຖິ່ນຈາກບັນພະບູລຸດສູ່ຄົນລຸ້ນປະຈຸບັນ ແລະ ໄດ້ຮັບການອະນຸລັກຕໍ່ໆໄປຢ່າງຢືນຍົງ; ພ້ອມນີ້ທັງສອງທ່ານຍັງຮຽກຮ້ອງມາຍັງສະມາຄົມສົ່ງເສີມຊາກໍແມນຈົ່ງຮ່ວມໃຈກັນຮັກສາພູມປັນຍາທ້ອງຖິ່ນແບບດັ່ງເດີມທີ່ຕິດພັນກັບການຜະລິດຊາ, ຮັກສາຄວາມອຸດົມສົມບູນຂອງລະບົບນິເວດທີ່ຖືເປັນປັດໃຈຕົ້ນຕໍ ເຮັດໃຫ້ຊາກໍແມນມີເອກະລັກສະເພາະ ແລະ ມີຊື່ສຽງມາໄດ້ຫລາຍສະຕະວັດແລ້ວໃຫ້ຍືນຍົງຄົງຕົວ, ສົ່ງເສີມໃຫ້ຊາກໍແມນໃຫ້ເປັນທີ່ຮັບຮູ້ທັງພາຍໃນ ແລະ ຕ່າງປະເທດ ແນໃສ່ສ້າງມູນຄ່າເພີ່ມ ແລະ ກາຍເປັນແຫລ່ງທ່ອງທ່ຽວແບບອະນຸລັກ ແລະ ຂະຫຍາຍສະມາຊິກໃຫ້ທົ່ວເຖິງ ພ້ອມທັງບໍລິຫານຄຸ້ມຄອງສະມາຄົມໃຫ້ເຂັ້ມແຂງ, ຫນັ້ນຄົງ ແລະ ຍືນຍົງ.

ໃນພິທີຍັງໄດ້ມອບໃບຍ້ອງຍໍຂອງທ່ານເຈົ້າແຂວງຜົ້ງສາລີ ໃຫ້ ກົມກອງ ແລະ ບຸກຄົນ ທີ່ມີຜົນງານດີເດັ່ນ ໃນການກະກຽມການຈົດທະບຽນຖິ່ນກຳເນີດຊາກໍແມ່ນ ໃຫ້ 2 ກົມກອງ ແລະ 14 ທ່ານ.

ໂອກາດນີ້ຜູ້ເຂົ້າຮ່ວມພິທີຍັງໄດ້ທ່ຽວຊົມບູດວາງສະແດງສິນຄ້າທີ່ຜະລິດຈາກຊາກໍແມນ, ລົງເຄື່ອນໄຫວຢ້ຽມຢາມເຂດການຜະລິດຊາຂອງສະມາຄົມສົ່ງເສີມຊາກໍແມນຕື່ມອີກ.

ຂ່າວ: ສົມຄິດ ແກ້ວນວນລາ

Loading...