ທ່ານ ນາງ ປິ່ງຄໍາ ລາຊະສີມມາ ສສຊ ປະຈຳເຂດເລືອກຕັ້ງທີ 11 ແຂວງບໍລິຄຳໄຊ ໄດ້ປະກອບຄໍາເຫັນຫລາຍບັນຫາຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 11 ມິຖຸນາ 2024 ທີ່ຫ້ອງປະຊຸມສະພາແຫ່ງຊາດ ໂດຍໄດ້ສະເໜີໃຫ້ລັດຖະບານ ນຳໃຊ້ເຕັກໂນໂລຊີທີ່ທັນສະໄໜ ເຂົ້າໃນການຜະລິດ, ການປັບປຸງໂຄງສ້າງການຜະລິດເປັນສິນຄ້າ ໂດຍສະເພາະການປຸງແຕ່ງໃຫ້ເປັນສິນຄ້າເພື່ອສົ່ງອອກ, ເພີ່ມທະວີການສົ່ງເສີມການຜະລິດໄຟຟ້າແບບສະອາດ, ໄຟຟ້າຈາກແສງຕາເວັນ ແລະ ພະລັງງານລົມ ເພື່ອຫລຸດຜ່ອນການຜະລິດໄຟຟ້າ ທີ່ມີຜົນກະທົບຕໍ່ທຳມະຊາດ ແລະ ສິ່ງເເວດລ້ອມ,ຕໍ່ວຽກງານດ້ານງົບປະມານ ສະເໜີໃຫ້
ລັດຖະບານ ເອົາໃຈໃສ່ເກັບກູ້ໜີ້ສິນຈາກລັດວິສາຫະກິດ ເອກະຊົນ ແລະ ພາກສ່ວນອື່ນໆທີ່ປ່ອຍກູ້ໃຫ້ມີການຕິດຕາມ, ກວດກາ ການປະຕິບັດ ພັນທະຂອງຫົວໜ່ວຍທຸລະກິດຕ່າງໆ ໃຫ້ເປັນປົກກະຕິ ແລະ ຄົບຖ້ວນ; ສະເໜີໃຫ້ທະນາຄານ ເເຫ່ງ ສປປ ລາວ ປະຕິບັດຕາມມາດຕະການການຄຸ້ມຄອງອັດຕາເງິນເຟີ້, ມາດຕະການຄຸ້ມຄອງອັດຕາແລກປ່ຽນ, ມາດຕະການຄຸ້ມຄ້ອງເງິນຕາຕ່າງປະເທດ, ມາດຕະການຄຸ້ມຄ້ອງສິນເຊື່ອ, ມາດຕະການຄຸ້ອມຄອງ ແລະ ພັດທະນາລະບົບຊໍາລະ, ມາດຕະການຄຸ້ມຄອງຕະຫລາດຫລັກຊັບ ແລະ ພັດທະນາຕະຫລາດທຶນ ທີ່ໄດ້ສະເໜີຕໍ່ກອງປະຊຸມ ໃຫ້ສຳເລັດໃນ 6 ເດືອນທ້າຍປີ 2024.
ນາງວັນນາ ພົມວິສອນ ສະມາຊິກສະພາແຫ່ງຊາດ ເຂດເລືກຕັ້ງທີ7 ແຂວງໄຊຍະບູລີ ມີຄໍາເຫັນຕໍ່ຂົງເຂດວັດທະນະທໍາ -ສັງຄົມ ໂດຍສະເໜີໃຫ້ລັດຖະບານ ປະເມີນຄືນຄວາມຮັບຜິດຊອບຂອງແຕ່ລະຂະແໜງການ ຕໍ່ວຽກງານພັດທະນາຊັບພະຍາກອນມະນຸດ ກໍຄືວຽກງານການສຶກສາ, ເຫັນດີໃຫ້ຫັນວຽກງານສຶກສາເປັນວາລະແຫ່ງຊາດ, ອີກບັນຫາໜຶ່ງແມ່ນການຮັບເອົາເດັກທີ່ອາຍຸຕໍ່າກວ່າກະສຽນໃນການອອກແຮງງານຢູ່ຫົວໜ່ວຍທຸລະກິດຕ່າງໆ ທີ່ດໍາເນີນທຸລະກິດຢູ່ລາວ ພວກເຮົາຈະມີມາດຕະການແນວໃດໃນການຄຸ້ມຄອງ ທັງຢາກໃຫ້ປະເມີນມະຕິ 07 ວ່າດ້ວຍຊັບພະຍາກອນມະນຸດ ແລະຂະແໜງການສຶກສາທີ່ເປັນບຸລິມະສິດ 17ມາດຕະການແກ້ໄຂຄູເຫຼືອ ບໍ່ພໍ, 9ມາດຕະການແກ້ໄຂພະຍາບານ, ມະຕິ13 ຄຸນນະພາບໃນການປິ່ນປົວຂອງແພດໝໍ ອັນນີ້ກໍຢາກໃຫ້ປະເມີນຄືນ.
ສໍາລັບແຮງງານໄລຍະຜ່ານມາ ມີກໍລະນີແຮງງານຫລັ່ງໄຫລໄປອອກແຮງງານຢູ່ຕ່າງປະເທດ ກໍຄືບັນດາແຂວງລຽບຕາມຊາຍແດນ ແມ່ນມີຈໍານວນຫລວງຫລາຍ ເຊິ່ງເວລາອອກໄປແມ່ນຖືກຕ້ອງຕາມລະບຽບ ອ້າງວ່າໄປຢາມພີ່ນ້ອງ, ໄປທ່ອງທ່ຽວ, ແຕ່ວ່າອອກໄປແລ້ວ ໄປປັບສະພາບຢູ່ພຸ້ນເປັນໄປອອກແຮງງານ ໝົດກໍານົດແລ້ວກໍມາຕໍ່ບັດອີກ ແລະກໍໄປອອກແຮງງານອີກ ສະນັ້ນຈຶ່ງເຮັດໃຫ້ການຄຸ້ມຄອງແຮງງານຈຶ່ງບໍ່ເຂົ້າລະບົບ ທັງມີຄວາມສ່ຽງຍ້ອນເດັກບໍ່ເຖິງເກນອາຍຸກະສຽນກໍໄປ ບັນຫານີ້ຈະແກ້ໄຂແນວໃດ.
ໂດຍ, ຂ່າວອອນລາຍ ວສລ
