ການດໍາເນີນກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ໃນວັັນທີ 7 ສິງຫາ 2021 ທີ່ຫໍສະພາແຫ່ງຊາດ, ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ຈະເລີນ ເຢຍປາວເຮີ, ຮອງປະທານສະພາແຫ່ງຊາດ, ປະທານກໍາມາທິການກົດໝາຍສະພາແຫ່ງຊາດ.
ທ່ານ ບຸນໂຈມ ອຸບົນປະເສີດ, ລັດຖະມົນຕີກະຊວງການເງິນ ໄດ້ຂຶ້ນລາຍງານກ່ຽວກັບການປັບປຸງບາງມາດຕາຂອງ 4 ຮ່າງກົດໝາຍໃນຂົງເຂດເສດຖະກິດ ຄື: ກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້ ແລະ ກົດໝາຍວ່າອາກອນຊົມໃຊ້. ທ່ານໄດ້ຍົກໃຫ້ເຫັນຄວາມເປັນມາ, ເຫດຜົນ ແລະ ຄວາມຈໍາເປັນ, ໂຄງປະກອບ ແລະ ຜົນປະໂຫຍດຄາດວ່າຈະໄດ້ຮັບຈາກການປັບປຸງທັງ 4 ຮ່າງກົດໝາຍດັ່ງກ່າວ ທີ່ໄດ້ປັບປຸງລວມທັງໝົດ 21 ມາດຕາ, ໃນນີ້ ກົດໝາຍວ່າດ້ວຍການຄຸ້ມຄອງສ່ວຍສາອາກອນ ປັບປຸງ 1 ມາດຕາ, ກົດໝາຍວ່າດ້ວຍອາກອນມູນຄ່າເພີ່ມ 12 ມາດຕາ, ກົດໝາຍວ່າດ້ວຍອາກອນລາຍໄດ້ 4 ມາດຕາແລະ ກົດໝາຍວ່າອາກອນຊົມໃຊ້ ປັບປຸງ 4 ມາດຕາ.
ທ່ານ ບຸນໂຈມ ອຸບົນປະເສີດ ຍົກໃຫ້ເຫັນວ່າ: ເຫດຜົນໃນການປັບປຸງທັງ 4 ຮ່າງກົດໝາຍໃນຄັ້ງນີ້ ເພື່ອຮັບປະກັນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ເຮັດໃຫ້ຫົວໜ່ວຍທຸລະ ກິດມີສະພາບຄ່ອງທາງດ້ານການເງິນ ໂດຍບໍ່ໄດ້ຈ່າຍເງິນພັນທະອາກອນຢູ່ດ່ານໃນເວລານໍາເຂົ້າ, ອໍານວຍຄວາມສະດວກໃຫ້ແກ່ການນໍາເຂົ້າສິນຄ້າ ແລະ ການບໍລິການຫລາຍຂຶ້ນ ໂດຍສະເພາະຫົວໜ່ວຍທະລຸກິດທີ່ມີເງື່ອນໄຂເປັນຜູ້ປະກອບການທີ່ດີເດັ່ນ, ປະຕິບັດກົດໝາຍ ແລະ ລະບຽບການໄດ້ດີ. ນອກຈາກນີ້ ຍັງເປັນການຊຸກຍູ້ຜູ້ປະກອບການເຂົ້າໃນລະບົບອາກອນມູນຄ່າເພີ່ມ, ສົ່ງເສີມໃຫ້ຜູ້ຊົມໃຊ້ມີກໍາລັງແຮງໃນການຊື້ຫລາຍຂຶ້ນ. ນອກຈາກນີ້ ຍັງເປັນການກໍານົດກົນໄກການປະຕິບັດລະບົບອາກອນມູນຄ່າເພີ່ມຂອງຂະແໜງພະລັງງານໄຟຟ້າ ແລະ ບໍ່ແຮ່ໃຫ້ເປັນຫລັກການສະເພາະທີ່ແຕກຕ່າງກັບກິດຈະການອື່ນ, ທັງສົ່ງເສີມຫົວໜ່ວຍທຸລະກິດ ໂດຍສະ ເພາະຈຸນລະວິສາຫະກິດ, ຫົວໜ່ວຍທຸລະກິດຂະໜາດນ້ອຍ ແລະ ກາງ ແລະ ອື່ນໆ.
ຂ່າວ: ບຸນຕຽງ ຈັນທະວົງ
ພາບ: ຄໍາກອງ ກິດຕິຄຸນ
Loading...