ການດໍາເນີນກອງປະຊຸມສະໄຫມສາມັນເທື່ອທີ6ຂອງສະພາແຫ່ງຊາດຊຸດທີ9ໃນຕອນເຊົ້າວັນທີ 9 ພະຈິກ 2023 ຢູ່ຫໍສະພາແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ສະມາຊິກສະພາແຫ່ງຊາດເເຕ່ລະເຂດເລືອກຕັ້ງ ໄດ້ສືບຕໍ່ປະກອບຄໍາເຫັນໃສ່ບົດລາຍການຈັດຕັ້ງປະຕິບັດເເຜນການເຄື່ອນໄຫວວຽກງານກາງສະໄຫມ5ປີ 2021-2025, ທິດທາງເເຜນການທ້າຍສະໄຫມຮອດປີ2025,ການຈັດຕັ້ງປະຕິບັດເເຜນການປະຈໍາປີ2023 ເເລະ ທິດທາງເເຜນການປະຈໍາປີ2024 ຂອງສານປະຊາຊົນສູງສຸດ ເເລະ ອົງການໄອຍະການປະຊາຊົນສູງສຸດ ເຊີ່ງການປະກອບຄໍາເຫັນເເມ່ນດໍາເນີນໄປດ້ວຍບັນຍາກາດຟົດຟື້ນ ກົງໄປກົງມາ,ມີລັກສະນະສ້າງສັນ ເເລະ ເປັນໄປຕາມຄໍາເຫັນເຈາະຈີ້ມຂອງປະທານກອງປະຊຸມ ເພື່ອໃຫ້ສອງບົດລາຍລາຍມີເນື້ອໃນຄົບຖ້ວນຮັດກຸມ ມີປະສິດທະພາບເເລະປະສິດທິຜົນຫລາຍຂື້ນກວ່າເກົ່າ ເເນໃສ່ເຮັດໃຫ້ປະກົດການຫຍໍ້ທໍ້ທີ່ເກີດຂື້ນໃນສັງຄົມນັບມື້ຫລຸດລົງ.
ທ່ານ ສີຄໍາ ບຸນມີໄຊ ສະມາຊິກສະພາແຫ່ງຊາດເຂດເລືອກຕັ້ງທີ8 ເເຂວງຫົວພັນສະເຫນີໃຫ້ພາກສ່ວນສານປະຊາຊົນເອົາໃຈໃສ່ເພີ່ມຕື່ມໃນການຕິດຕາມກວດກາການເເກ້ໄຂຄະດີຢູ່ສານຂັ້ນລົບລ້າງ ໂດຍສະເພາະການຕັດສີນລົບລ້າງຄໍາຕັດສີນຂອງສານຂັ້ນຕົ້ນເຫັນວ່າຍັງເຫັນບໍ່ທັນໄດ້ດີເທົ່າທີ່ຄວນ ໂດຍສະເພາະການເກັບກໍາຂໍ້ມູນຈາກຄໍາໃຫ້ການຂອງໂຈດ ເເລະ ຈໍາເລີຍ ຍັງບໍ່ທັນລະອຽດຈະເເຈ້ງ ເເລະ ອື່ນໆ.
ທ່ານ ວຽງໄຊ ສີວິໄລ ສະມາຊິກສະພາແຫ່ງຊາດເຂດເລືອກຕັ້ງທີ9 ເເຂວງຊຽງຂວາງສະເເດງຄວາມຍ້ອງຍໍຊົມເຊີຍຕໍ່ການຈັດຕັ້ງປະຕິບັດວຽກງານວິຊາສະເພາະໃນໄລຍະຜ່ານມາຂອງສານປະຊາຊົນສູງສຸດເເລະອົງການໄອຍະການປະຊາຊົນສູງສຸດ ເຫັນວ່າມີຫລາຍວຽກງານປະສົບຜົນສໍາເລັດໂດຍພື້ນຖານ ເຖິງວ່າໄລຍະຜ່ານມາຈະພົບພໍ້ບັນຫາຫຍຸ້ງຍາກຫລາຍຢ່າງ,ເເຕ່ຢາກສະເຫນີໃຫ້ສອງອົງການເອົາໃຈໃສ່ເພີ່ມຕື່ມກ່ຽວກັບການຕິດຕາມກວດການຄໍາຕັດສີນຂອງສານ ເພາະເຫັນວ່າຍັງເຮັດບໍ່ທັນດີເທົ່າທີ່ຄວນ.
ທ່ານ ນາງ ວາລີ ເວດສະພົງ ສະມາຊິກສະພາແຫ່ງຊາດເຊດເລືອກຕັ້ງທີ1 ນະຄອນຫລວງວຽງຈັນ ສະເຫນີໃຫ້ອົງການຕຸລາການ ກໍ່ຄືສານປະຊາຊົນສູງສຸດ ເເລະ ອົງການໄອຍະການປະຊາຊົນສູງສຸດນໍາໃຊ້ເຄື່ອງມື້ທີ່ທັນສະໄຫມ ໂດຍສະເພາະເເມ່ນລະບົບ ເອໄອ ເຂົ້າມາຊ່ວຍໃນການຈັດຕັ້ງປະຕິບັດວຽກງານວິຊາສະເພາະ ເນື່ອງຈາກລະບົບນີ້ເເມ່ນສາມາດອໍານວຍຄວາມສະດວກໄດ້ຫລາຍຢ່າງ ເເລະ ມີຫລາຍໆປະເທດໃນໂລກກໍ່ນໍາໃຊ້ລະບົບນີ້ ລວມເຖີງບັນຫາອື່ນໆ.
