ສະຫລອງປີໃໝ່ສອງມື້ຜ່ານມາ ນະຄອນຫລວງວຽງຈັນ ມີອຸປະຕິເຫດທັງໝົດ 16ຄັ້ງ ມີຜູ້ເສຍຊີວິດແລ້ວ 2ຄົນ
ພັນໂທສັງຄົມ ພົມມະລາດ ຫົວໜ້າພະແນກຕໍາຫລວດຈາລະຈອນ ຫ້ອງຕໍາຫລວດ ປກສ ນະຄອນຫລວງວຽງຈັນ ໃຫ້ຮູ້ວ່າ: ຜ່ານການລົງອໍານວຍຄວາມສະດວກ ໃຫ້ແກ່ການສະເຫລີມສະຫລອງປີໃໝ່ລາວ ປີນີ້ຢູ່ນະຄອນຫລວງວຽງຈັນ ເຈົ້າໜ້າທີ່ ຈາລະຈອນ ໃຊ້ກໍາລັງທັງໝົດ 700ກວ່າຄົນ ໄດ້ລົງປະຕິບັດໜ້າທີ່ ອໍານວຍຄວາມສະດວກໃນການສັນຈອນໃຫ້ແກ່ຜູ້ໃຊ້ລົດໃຊ້ຖະໜົນກໍຄືນັກທ່ອງທ່ຽວຢ່າງເຕັມທີ ໂດຍສະເພາະຕາມເສັ້ນທາງ13ເໜືອ, ເສັ້ນທາງ13ໃຕ້, ເສັ້ນທາງເລກທີ 10, ເສັ້ນທາງເລກ11, ເສັ້ນທາງລະຫວ່າງນະຄອນຫລວງວຽງຈັນ ກັບແຂວງອ້ອມຂ້າງ ຖ້າພົບເຫັນຜູ້ຂັບຂີ່ດື່ມສິ່ງມຶນເມົາ ເປັນຕົ້ນ ຂັບລົດບໍ່ທ່ຽງ, ຂັບລົດໄວເກີນກໍານົດ ເຈົ້າໜ້າທີ່ກໍຈະກວດຫາທາດເຫລົ້າ ຖ້າພົບເຫັນກໍຈະໄດ້ປະຕິບັດຕາມລະບຽບກົດໝາຍຢ່າງເຂັ້ມງວດ.
ພັນໂທສັງຄົມ ພົມມະລາດ ໃຫ້ຮູ້ອີກວ່າ: ໃນໄລຍະສອງມື້ຜ່ານມາ ຄືວັນທີ 12 ເມສາ ມີອຸປະຕິເຫດເກີດຂຶ້ນ 9ລາຍ ເສຍຊີວິດ1 ລາຍ, ວັນທີ 13 ເມສາ ມີອຸປະຕິເຫດເກີດຂຶ້ນ 7ລາຍ ເສຍຊີວິດ1ລາຍ, ຄາດວ່າອຸປະຕິເຫດອາດຈະມີຫລາຍກວ່າປີຜ່ານມາ ເພາະຄູ່ກໍລະນີຕໍາກັນແລ້ວ ແກ້ໄຂກັນເອງ ບໍ່ໃຫ້ເຈົ້າໜ້າທີເຂົ້າແກ້ໄຂຊ່ວຍແມ່ນມີຫລາຍ, ສໍາລັບການສະຫລອງປີໃໝ່ລາວ ປີ 2023 ຜ່ານມາ ນະຄອນຫລວງວຽງຈັນ ມີຜູ້ເສຍຊີວິດພຽງ3ຄົນ.
