ສະຖານທູດສິງກະໂປ ປະຈໍາ ສປປ ລາວ ເປັນເຈົ້າພາບຈັດ ງານລ້ຽງ ສະເຫລີມສະຫລອງວັນຊາດ ຄົບຮອບ 59 ປີ ຢູ່ທີ່ນະຄອນຫລວງວຽງຈັນ ໃນວັນທີ 29 ສິງຫາ 2024 ໂດຍມີ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະ ມົນຕີ ກະຊວງການຕ່າງປະເທດ, ທ່ານ ຊູເດັດ ມາເນຍ ເອກອັກ ຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ສິງກະໂປ ປະຈໍາລາວ, ມີບັນດາທູຕານຸທູດ, ຫົວໜ້າກົມ, ຮອງກົມ ແລະ ແຂກຖືກເຊີນເຂົ້າຮ່ວມ.
ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ມີຄຳເຫັນວ່າ: ຕະຫລອດໄລຍະ ຫ້າທົດສະວັດຜ່ານມາ, ການພົວພັນຮ່ວມື ລະຫວ່າງ ສປປ ລາວ ແລະ ສິງກະໂປ ໄດ້ຮັບການພັດທະນາ ຢ່າງແຂງແຮງ ໂດຍມີການຮ່ວມມືແລກປ່ຽນການຢ້ຽມຢາມ ຄະນະຜູ້ແທນຂັ້ນສູງ ເຊິ່ງກັນ ແລະ ກັນ, ພິເສດ ໃນເດືອນກໍລະກົດ ທີ່ຜ່ານມາ ທ່ານ ສອນໄຊ ສີພັນດອນ ນາຍົກລັດຖະມົນຕີ ສປປ ລາວ ໄດ້ໄປຢ້ຽມຢາມສິງກະໂປ ຢ່າງເປັນທາງການ ເຊິ່ງເປັນການປະກອບສ່ວນເຂົ້າໃນການສະເຫລີມສະຫລອງ ການສ້າງຕັ້ງສາຍພົວພັນການທູດ ຄົບຮອບ 50 ປີ. ໃນໄລຍະການຢ້ຽມຢາມ ສອງຝ່າຍໄດ້ລົງນາມບັດບັນທຶກຄວາມເຂົ້າໃຈ 2 ສະບັບ ເຊັ່ນ: ການ ຮ່ວມມືດ້ານການສຶກສາ ແລະ ການຮ່ວມມືດ້ານສິນເຊື່ອກາກ ບອນ.
ບົດບັນທຶກດັ່ງກ່າວ, ຈະເປັນການເສີມຂະຫຍາຍການພົວ ພັນຮ່ວມມືໃນຫລາຍຂົງເຂດ ເປັນຕົ້ນ ພະລັງງານໄຟຟ້າ, ກະສິກຳ ແລະ ການພັດທະນາຊັບພະຍາກອນມະນຸດ. ພ້ອມນີ້, ທ່ານ ຍັງໄດ້ຕາງ ໜ້າ ລັດຖະບານ ແລະ ປະຊາຊົນລາວ, ສະແດງຄວາມຂອບໃຈ ແລະ ຮູ້ບຸນຄຸນ ມາຍັງລັດຖະບານ ແລະ ປະຊາຊົນ ສິງກະ ໂປ ທີ່ໄດ້ໃຫ້ການປະກອບສ່ວນຊ່ວຍເຫລືອ ແລະ ໃຫ້ການສະ ໜັບສະໜູນໃນການພັດທະນາ ເສດຖະກິດ-ສັງຄົມ ຂອງ ສປປ ລາວ.
ພ້ອມນີ້, ຍັງໄດ້ຊ່ວຍໃນການພັດທະນາຊັບພະຍາກອນມະ ນຸດ ໃຫ້ແກ່ ສປປ ລາວ ໂດຍຜ່ານການຝຶກອົບຮົມລະຍະສັ້ນ ແລະ ຍາວ ພາຍໃຕ້ໂຄງການຮ່ວມມືສິງກະໂປ ແລະ ຂໍ້ລິເລີ່ມຂອງການເຊື່ອມໂຍງປະຊາຄົມອາຊຽນ, ການອົບຮົມພາສາອັງກິດສຳ ລັບບັນດາການນຳຂັ້ນສູງຂອງ ສປປ ລາວ ໃນຕະຫລອດຫລາຍປີທີ່ຜ່ານມາ.
ທ່ານ ຊູເດັດ ມາເນຍ ໄດ້ກ່າວວ່າ: ການພົວພັນຮ່ວມມືສອງຝ່າຍຂອງສອງປະເທດພວກເຮົາ ມີຄວາມອົບອຸ່ນ ແລະ ສະໜິດ ສະໜົມ ໄວ້ເນື້ອເຊື່ອໃຈເຊິ່ງກັນ ແລະ ກັນ, ມີຫລາຍຢ່າງທີ່ສອງປະເທດພວກເຮົາຄ້າຍຄືກັນ,ນັບແຕ່ມື້ສ້າງຕັ້ງສາຍພົວພັນການ ທູດຮ່ວມກັນ ສອງປະເທດ ລາວ-ສິງກະໂປ ກໍໄດ້ມີການແລກ ປ່ຽນການຢ້ຽມຢາມ ຂອງຄະນະຜູ້ແທນຂັ້ນສູງ ເຊິ່ງກັນ ແລະ ກັນ, ມີການຕິດຕໍ່ພົວພັນກັນ ຂອງນັກທຸລະກິດ, ການທ່ອງ ທ່ຽວ, ການສຶກສາ ແລະ ກິດຈະກໍາ ອາສາສະໝັກ ຊ່ວຍເຫລືອຊຸມຊົນ ແລະ ອື່ນໆ.
ທີ່ມາ: ຂປລ
